الموضوع: شكر واجب و تحيه لجميع الاعضاء الكرام

الاستاذ الفاضل ممدوح العربى اولا جزاك الله كل خير على مساهمتك و مساعدتك لينا
ثانيا انا عندى مشكله مع الجمعيه وهى تتلخص فى الاتى :
بفضل الله اخوك معاه لانسر 2007 قسط ومأمن عليها تبع الجمعيه ومن حوالى شهر واحد دخل فى الرفرف الشمالى اللى ورا والعربيه خدت خبطه بسيطه و الدلايه اللى ورا الكاوتش اتقطعت ونظرا لانى كنت مستعجل ساعتها فرديت الخبطه على البارد والحمد لله مش ملحوظه اوى ولما روحت علشان اعمل الصيانه فى التوكيل سألت عن تمن الدلايه ولقيتها ب 110 جنيه فكلمت المندوب بتاع الجمعيه قالى انه مش هاينفع اغير الدلايه وقال بالحرف (يعنى اكتب فى المعاينه دلايه مقطوعه ) قلتله ماهو اثر الخبطه واضح قالى لا مش هاينفع !!!.. فايه رأى حضرتك فى الموضوع ده ؟

انا عندي سؤال .. يمكن يكون غريب عليك شويه .. انا بكالوريوس تجاره .. المهم .. انا مازلت غير مقتنع بحوار التامين و الكلام ده .. بساطه .. لاءن اللي بيدخل جيب غيرك صعب يطلع تاني .. ده غير ان المفروض "الخطر" .. او الخساره دي تتقدر مثلاً .. و اللي بيحصل ان التقدير بيبقي غير الواقع .. (الكلام ده برضه بره نفس النظام ... عن تجربه ) .. المهم .. انت ايه رايك في الموضوع ده ؟ و عاوز اسباب مقنعه تخليني أأمن مثلاُ علي عربيتي ..بدل ما اذا اتخبطط اصلح كاش و اشتري دماغي ..
معلش هوه السوال فيه صراحه زياده عن اللزوم .. بس انا عاوز رايك بصراحه تامه ..(اصل انا كلاسيك في كل حاجه حتي التفكير)

السلام عليكم و رحمه الله و بركاته
استاذ احمد انور ياريت حضرتك متترددش لحظه ان لما حضرتك تنوي تعمل العربيه انك تتصل بيا ده طبعا شرف ليا و مفيهاش تعب يا راجل و لا حاجه. ده كلام.احنا جمبيعا اخوه .

استاذ كريم شاكر جدا لحضرتك ترحيبك بيا و اتمني من جميع الاعضاء ان يتقبلوا عذري عن قله مشاركاتي بس فعلا و الله الشغل مبيرحمش.و بالنسبه للموضوع انا فعلا بجهزه دلوقتي بكل تفاصيله و جوانبه.و اتمني و الله من كل قلبي اني اقدر افيد و لو بجزء بسيط جدا اخواني جميع الاعضاء. و يارب اكون عند حسنن ظن الجميع.

الاستاذ الفاضل ابو عبد الله انا اتمني جدا و الله من كل قلبي ان يبقي فيه تأمين تكافلي حقيقي و فعلي في مصر بس صدقني الموضوع عندنا مجرد تسميات و طبعا هكون انا من اول المؤيدين بس صدقني اكره ما بيضايق الواحد ان هما بيشتغلوا بالتسميات دلوقتي بس زي ما اوضحت قبل كده.و مثال علي كده بنك فيصل الاسلامي هي هي نفس الشروط و القواعد التي تطبق في اي بنك تجاري اخر و لكن الحق يقال ان عندهم حاجه واحده مختلفه ان البنك بيشتري العربيه لنفسه اولا و بعد كده يبيعها للعميل بالسعر اللي يحدده البنك طبعا بعض اضافه ما يسمي عوائد استخدام اصل مملوك للبنك اللي هيا الفوائد مفيش تغيير بس برده الموضوع ده لا يطبق علبي كل العملاء اصل الموضوع خالص ان فعلا مفيش فكر اسلامي يطبق بكل حذافيره في نواحي الاقتراض و التأمين في المجتمع المصري فدايما تلاقي حاجه ناقصه زي بنك فيصل و بيت التأمين المصري السعودي. و الله اعلي و اعلم و طبعا انا تحت امر حضرتك في اي استفسار تاني.علي فكره حتي في السعوديه اللي هما التأمين قايم عندهم علي التكافل فقط بس صدقني برده كلها تسميات و بيتعاملوا زي عندنا في مصر بالظبط . فعلا الواحد نفسه في حاجه بجد تبقي موجوده زي كده حتي علي الاقل يقدر يشيل من قلبه ادني شك.
يارب مكنش طولت عليكو
السلام عليكم و رحمه الله................

السلام عليكم................
استاذ اسلام المصري انا شاكر جدا لحضرتك الترحيب الجميل ده . و انا و الله اتمني اعتباري اخ صغير لجميهع الاخوه الاعضاء و اقدر فعلا افيد بجد...... شكرا يا باشا...................

مادا باشا انا طبعا شرف كبير ليا ان اقدر فعلا اساعد اخواني الاعضاء.
اما بالنسبه للموضوع بتاع عربيه حضرتك فا انا الصراحه مش فاهمه اوي بس احب اطمن حضرتك ان حتي لو عندك فانوس الغماز اللي في الرفرف بس هو للي مكسور فده ان شاء الله اغيره لحضرتك فما بالك بشيئ اكبر. بس الصراحه انا مش واخد بالي ان اللانسر فيها دلايات او جيز حضرتك تقصد حاجه غير اللي انا فاكرها بس عالعموم برده انا تحت امرك في اي حاجه.و مفيش حاجه اسمها يكتب ايه او ميكتبش ايه ده حادث و حضرتك ليك تعويض و لازم تاخده انا بعتذر طبعا عن وجود بعض الزملاء دخلت مجال التأمين من الابواب الخلفيه بدون وجود الخبره و الكفاءه اللازمه.ياريت حضرتك تمدني ببعض التفاصيل التانيه عن الموضوع.

السلام عليكم و رحمه الله

expert باشا ياراجل ده انت خريج تجاره يبقي شكلك كده مكنتش بتحضر
بص يا سيدي اولا التأمين ده عقد بينك و بين منظمه كبيره يعني مش اي حد و خلاص و هو زي اي عقد فيه حقوق و التزامات و التزاماتك ان حضرتك بس تدفع القسط و ليك جميع الحقوق اللي بتكفلها الوثيقه زي ما انا ان شاء الله هوضح في الموضوع اللي هعمله.طبعا مفيش حاجه اسمها اللي يدخل جيب غيرك ميطلعش و الكلام ده لأن طالما حضرتك ليك حق فا انت بتاخده ده مبدئيا تاني حاجه دلوقتي ان كل شركه بتخاف علي سمعتها جدااااااااااااااااا و حريصه علي العملاء بتوعها و ما سكه فيهم بايديها و سنانها لان دلوقتي الدنيا بقت صغيره اوي و اي شكاوي بتسمع في السوق كله علي طول و طبعا كلامي ده بقصد يه جمييييييييييييييييييييييي يع الشركات الا الثلاث شركات بتوع الحكومه ( مصر و الشرق و الاهليه ) امن في الهند و متأمنش في اي شركه من بتوع الحكومه لأكبر سبب و هو انهم مبيخافوش علي سمعتهم اصلاو تلاقي التلاكيك طلعت من تحت الارض ده طبعا غير الروتين اللي يخنق.
و علي فكره جميع الشركات في مصر عليهم رقابه من الهيئه المصريه للرقابه علي التأمين و ديه بتبقي مرجع لأي عميل ليه شكوي و هيا عامله كده زي جمعيه حقوق المستهلك و طبعا كل ما الشكاوي بتزيد عند الهيئه من شركه معينه بيتم الحجز علي الاحتياطي المالي بتاع الشركه ديه لدي الهيئه و بالتالي اطمن جدا دلوقتي ان ميبقاش في اي تلاكيك او تلاعب لو ليك حق هتاخده هتاخده.
انا طبعا عارف ان حضرتك بتسأل برده عن المعاينه قبل الاصلاح و ان المهندس يعتمد حاجات و يكبر دماغه من حاجات فا انا برده بطمنك ان المهندس ده غير تابع لاي شركه و انما تابع للهيئه نفسها يعني طرف محايد.
ارجو ان انا كده وضحت شويه من اسئله حضرتك و يارب اكون خدت بالي من كل حاجه . و انا تحت امرك في اي استفسار تاني او اكون مخدتش بالي كويس منن سؤال حضرتك.
في حاجه بس اخيره ان في اعتقاد عند كثير من الناس ان الشركات ديه اكيد بتخسر و كلام من ده و علي فكره الاعتقاد ده كان عندي انا قبل ما اشتغل في التأمين هو اولا بالنسبه لقطاع تأمين السيارات فده اكيد بيخسر و طبعا كل الكلام ده معمول له دراسات اكتواريه و كلام من ده بس نيجي بقي للمنظمه ككل ففيها فرووووووووووع تأمين كتير مبتصرفش تعويضات خالص او نادرا مثل الحريق و السطو و اجسام السفن و النقل البحري وفروع تانيه كتير اي نعم لما بيجي تعويض في حاجه من الحاجات ديه بتبقي كارثه بس برده في حاجه اسمها اعاده تأمين خارج مصر بمعني ان الشركه بتأمن علي الحاجات اللي قبلت تأمينها تاني في شركات بره مصر عشان لا قدر الله لو حصل حاجه ميبقاش في اهتزاز كبير في المركز المالي بتاع اي شركه و حضرتك تأكد تماما ان مفيش حد بيخسر ابداااااااااااااااااااااا اااااااااااااااا لأن كل الكلام ده معتمد علي دراسات كبيره اوي مش انا لميت 10 مليون اقساط و عليا 12 مليون تعويضات يبقي انا كده خسرت لا ده في حاجات تانيه كتير بتعوض ده غير الاحتياطيات اللي بتتكون لتفادي اي زياده في التعويضات.
يارب مكنش طولت علي حضرتك و اعتباري ضيف خفيف.......
السلام عليكم..............................