اسعار بعض الخدمات التي تقدمها بنزينة وطنيه

**casperinoo** · 05-02-2008 04:56 AM

غسيل محرك 7 جنيه
غسيل يدوي 7 جنيه
غسيل شاسيه 7 جنيه
هوفر هواء 7 جنيه
غسيل رادياتير 20 جنيه
تغير زيت 3 جنيه
تغير فلتر 5 جنيه
ترصيص العجله 6 جنيه
ضبط زوايا حسب الخدمه
تنظيف صالون 75 جنيه
تنظيف موتور جاف 30 او 20 جنيه مش فاكر
تلميع بوليش 45 جنيه
خدمه كامله 140 جنيه
خدمة تكيف حسب الخدمه

**أبو ياسين** · 05-02-2008 09:13 AM

شكرا على المعلومه

**fahd_628** · 05-02-2008 12:13 PM

شكرا على المعلومة يا نجم

**sab3aawy** · 05-02-2008 12:53 PM

انا جر بت التعامل معاهم مرة واحدة بس واعتقد انى مش هكررها تانى

حطيت زيت فتيس 90 من الخرطوم فى محطة وطنية مدينة نصر اللى وراء المدافن والمنطقة الحرة العامة فى طريق امتداد المخيم الدائم للعربية الريجاتا بعد ما كنت غيرتلها طقم دبرياج

علما بإن الزيت اللى نزل من العربية ساعة تغيير طاقم الدبرياج عند الميكانيكى لا يتعدى كيلوجرام واحد، يعنى فيها لسة كمية

ملأ العربية، اولا مافيش اى جهاز بيقيس الكمية وبالتالى انا معرفش حسبها على اساس ايه لكن هى لا يمكن تكون خدت اكتر من كيلو ونص بحال من الأحوال لأن سعتها 2 كيلو ونص

ولقيته جاييلى فاتورة ب 45 جنيه

يعنى كيلو زيت الفتيس ال90 السايب تمنه 30 جنيه!!!!!!!!!!!!!!!!!!!!!!!!!!!!!!!!!!!!!

بصراحة حسيت انى اتنصب عليا ، بس انا كنت اصلا مخنوق لكذا سبب وعلى ذلك دفعت الفلوس زى الباشا وخرجت لأانى لو كنت فتحت بقى كنت هافش فيهم غلى كله وغالبا الشرار اللى كان هيطلع منى كان هيتسبب فى اشتعال البنزين والمحطة كلها، فدفعت الفلوس حار ونار فى جتتهم وقررت انى مش هتعامل مع وطنية تانى، اضف الى ذلك الرسالة اللى كان باعتها زميل لن على المنتدى عن ان وطنية ذاكر حسين هى كمان بتغش فى كمية البنزين ، فانا استبعدت وطنية تماما من قائمة المحطات اللى بتعامل معاها

**al_manara** · 05-02-2008 01:00 PM

تسلم ايدك
انا جربت وطنية الي في طريق الحي العاشر مدينة نصر الي فاتحة من قريب
بصراحة خدمتهم زفت جدا
اولا : الغسيل جربت اكتر من واحد هناك كلهم مابيعرفوش يعملوا حاجة اخرهم يفضل ماسك لك خرطوم المية علي العربية ربع ساعة كانها مهببة ومش راضية تنضف (بيحسسك انة بيعمل شغل كبير اوي )

ثانيا : تقريبا كل الموجودين في قسم غسيل السيارات لسة جداد ماحدش منهم بيعرف يغسل تلاقيهم تايهيين كدة دة غير طبعا ان العربية بتطلع (الزجاج ملعوط-العربية من جوة في الدواسات فيها تراب كتير)
ودة بعد تجربة 4 مرات لانهم في طريق شغلي

ثالثا : مدة الغسيل بياخدوا فيها وقت طويل جدا وفي الاخر ياريت بيعملوها

رابعا : جربت مرة واحد بس عندهم غسيل الشاسية بيهروا العربية مية من تحت كانها مزعلاهم والمية دي مالهاش حساب ولا حاسيين كمان ان بطريقيتهم دي بياذو العربية

خامسا : غسيل الريدياتير تحفة يحط لك خرطوم فية ويسيب لك الخرطوم التاني ينزل المية في الارض لانة بايظ ويسيب المية تنزل علي مكان الشكمان من ناحية الموتور وهو سخن ويقولي عادي والمفروض الخرطوم دة يركب للموتور عشان المية تاخد دورة كاملة (مش عارف صلحوة ولا لا عشان ما اظلمهمش ) اديتة ال 20 جنية وسميت بيها جسمة بعد كدة وقلتلة ركب الخراطيم مش عاوز حاجة

خامسا: الكهربائي هناك اية مش عاوز اقول لكم تحفة الله يكرمة ماكانش عارف يركب لي الكلاكس
(mixo ) وكان عاوز يحطلي كل جزء من الكلاكس في مكان ويركبة من غير الكتاوت انا اول مالقيتة بيعمل كدة سالتة بتعمل اية قالي مش هاينفع غير كدة قلتلة طيب شكرا واديتة 5 جنية ومشيت

بصراحة البنزينة الي جربتها ولقيت غسيلها ممتاز جدا موبيل الاوتوستراد الي في طريق شيراتون وكمان تغيير الزيت عندهم راجل بيغير الزيت زي الفل
دة غير معاملتهم المحترمة

واسف للاطالة بس كنت مخنوق منهم وكنت ناوي احط لهم موضوع مخصوص

**al_manara** · 05-02-2008 01:03 PM

الجميل اني وانا بكت الرد الاخ سبعاوي هو كمان بيكتب في نفس الوقت وسبقني في الرد واية سبحان الله نفس البنزينة المهببة دي

**eng_mkhalaf** · 05-02-2008 02:39 PM

يا جماعة دة شىء عادى لأنهم مجندين يعنى جايين يقضوا سنة ولا سنتين ويمشوا وكلهم عمرهم ما أشتغلوا قبل كدة شغلانة زى دية - هما بس كويسين فى البنزين لأن التنكات لسة جديدة

**Powert** · 05-02-2008 04:29 PM

ياجماعة البنزينة دي مابقتش كويسة غير في البنزين بتاعهم بنزنهم حلو بيخلي العربية تجري

بس خدمتهم زي الزفت انا بعدي عليهم كل يوم تقريباً وبتحديد الفرع اللي جنب سيتي ستارز

لانه قدام البيت الخدمة سيئة واسعار بحس انها اغلى من برة ومعرفش بحس انه بيتنصب عليا فيها