صيانة 5000 للاوبترا في ابو غالي العبور

**dark_smoky** · 17-05-2010 05:22 PM

النهاردة الحمد لله عملت صيانة 5000 ك للاوبترا .. حجزت في ابوغالي العبور من يومين و انا كنت قاصد اني اخد ميعاد النهاردة الاتنين عشان الزحمة .. خدت ميعاد الساعة 9 صباحا 8.45 كنت هنا ... أصل انا ساكن في العبور :)

و قفت امام المركز بتاع الامن دخلني و خلاني ركنت و قاللي اتفضل في الاستقبال ، مهندس الاستقبال اسمة م/شريف شاب محترم و قمة في الزوق ، خد منني كتيب الضمان و الرخصة و قاللي صيانة كام قلتله 5000 اول صيانة.
قاللي عندك اي ملاحظات قلتله ملاحظاتي ان فرامل اليد عالية و مش قوية و دواسة الفرامل فيها تززيق بسيط ، النور العالي عندي مش قوي .. قاللي بس علي فكرة النور قوي او مش قوي دي بتبقي مسألة نسبية من واحد للتاني و اكيد هو ده قوة النور الاستاندرد ، عامة تعالي بينا علي العربية ....

رحنا العربية لاقيتهم مغطيين كورسي السائق و الدركسيون بكفر بلاستيك و دواسة كرتون علي الارضية و مرسوم عليهم اللوجو بتاع توتال ( هم عندهم هناك كل منتجات توتال ز يوت موتور و فتيس و مياه خضراء و حمراء) و قعد يجرب فرامل اليد و دواسة الفرامل و جرب التكييف ، قاللي ده مش بيبرد كويس قلتله خلاص خليه يبرد كوويس ( مع انني شايفه تمام) قاللي هاننظف فلتر التكييف قلتله أووك.

دخلنا المكتب تاني عمللي امر الشغل علي الكمبيوتر و كتب فيه كل الملاحظات قاللي الزيت نوعه ايه قلتله 10000 كتب توتال كوارتز 9000 سالته هو 9000 و لا 10000 قاللي لأ ده بيقعد 10000 بس هو اللي أسمه كده لاتقلق.

الكلام ده كله خد نص ساعة تقريبا دخل امر الشغل في المركز و طلع مهندس شاب محترم برضة اسمه شادي خد العربية و داخل فارحت وصيته و قلتله خللي بالك منها قاللي ماتقلقش و دخل بيها طبعا انا حاولت ادخل مع العربية يمين شمال منفعش خالص :(

المهم علي الساعة 11 تقريبا لاقيت المهندس شادي طالع بيها و واخد في وشه و طلع علي الطريق قلت لبتاع الامن هو رايح فين قللي بيجربها شوية و لاقيت مهندس شريف بتاع الاستقبال بيناديلي قللي حضرتك الحساب 252.50 اتفضل ادفع في الخزنة رحت دفعت و لاقيت الضمان هناك مختوم و مؤرخ و مكتوب العداد 4330 و اخدت الفاتورة و تصريح الخروج ....

لاقيت العربية واقفة لكن الحلو مايكملشي ....... لاقيتها مش مغسولة فتحت الموتور لاقيته يعني متنظف بهو و فوطة كدا .. قلت مش مهم خيرررر

فاجريت و فتحت الشنطة عشان كنت ناسي اخد منها شنطة اللاب توب عشان كنت طالع علي الشغل تاني ... معلش كنت مسطول شوية فالاقيته زي ماهو.

جربت التكييف لاقيته احسن من الاول فرامل اليد قوية جدا و تمام دواسة الرجل التزييق بتاعها راح النور لسه ماجربتوش هايبقي بليل بقي.

تقييمي للمركز هو كويس جدااا و كبير الناس معملتها كويسه و معظمهم شباب و محترمين في هناك منفذ بيع لقطع الغيار كبير قوي.

لو عربيتك هاتخد و قت في الصيانة ممكن تعدي الشارع 10 دقائق مشي هاتبقي عند كارفور و جولف سيتي سنتر و كافيهات و مطاعم لاتعد و لاتحصي و علي فكرة في سنيمات كمان ،، مش عايز يبقي تتفضل في ساحة انتظار الضيوف و اديها شاي و قهوة و نسكافية و كله ببلاش

و الله الموفق

**M!SHO** · 17-05-2010 05:32 PM

الف مبروك وعقبال ال 50 الف على خير ان شاء الله

**Hosam_Optrawy** · 17-05-2010 06:54 PM

الف مبروك ياباشا وعقبال صيانة ال 500 الف

**د.محمود صلاح** · 17-05-2010 08:04 PM

مبروك وعقبال ال 50 الف ..

**ahmed643** · 18-05-2010 10:10 PM

مبروك يا باشا وعقبال صيانه ال 500000 كيلو

بس جديده المشروبات الى بلاش دى

مش بيسبونى غير لما ادفع
:d

**smsmsmsm1983** · 19-05-2010 01:45 PM

الف مبروك وعقبال لما تعمل صيانة 900000
لى سؤال هل ممكن اشترى الزيت من برة و اخده معايا وانا رايح الصيانة

**islam_6110** · 19-05-2010 01:51 PM

الف مبروك ياباشا و ربنا يباركلك فيها و يديك خيرها و يكفيك شرها

**dark_smoky** · 19-05-2010 02:46 PM

المشاركة الأصلية كتبت بواسطة smsmsmsm1983

الف مبروك وعقبال لما تعمل صيانة 900000
لى سؤال هل ممكن اشترى الزيت من برة و اخده معايا وانا رايح الصيانة

هو بخصوص الزيت كنت سألت في الموضوع ده زمان و قالولي لأ ماينفعش من برة
بس علي فكرة زيوت توتال زيوت محترمة جداااا لاتقل جوده عن شل إطلاقا و اللي أعرفة ان توتال كوارتز 9000 معبأ في فرنسا و الله أعلم
عل الاقل أحسن من منتجات موبيل اللي موجودة في مصر خاليا.