الموضوع: هانقل من مرور لمرور ممكن مساعدة

شوف يا استاذ كريم انت حاتعمل الاتى ان شاء الله:
1: تروح مرور عبود و تجيب شهادة مخالفات و تدفعها و تاخد مخالصة
2: لو ما عليهاش مخالفات حتاخد شهادة براءة زمة
3: لو عليك مخالفات مبالغ فيها ما تدخلش لوكيل النيابة لان الحد اللى ممكن ينزهولك من المخالفات مش كتير
فى الحالة دى اعمل معارضة و حايحدد لك جلسة فى خلال 3 شهور و لو الرخصة انتهت حايديلك تصريح .. و الميزة ان
مخالفاتك حاينظر فيها قاضى و ممكن ينزلها لك كتير ( صاحبى بعد المعارضة دفع 750 جنيه من اصل 3000 جنيه)
4:تاخد شهادة براءة الزمة و تروح مرور السلام
5: تشترى نموزج فحص و تدخل تفحص .. لو فى اى حاجة قلقاك هات واسطة للمهندس و كله بيعدى
6: ممكن يطلب منك انك تطابق فى مرور عبود و ممكن لأ
7: تروح على الشباك و الموظف حايقولك تجيب ايه و منيين .. يعنى هو حايكتب لك ورقة بالمطلوب اللى هو
رسوم+تأمين+ضريبة و الحاجات دى
نصيحة:
حاول تكون هناك 9:30 صباحا بالكتير لان اللى بيلحق الفحص بدرى بيروح على السبابيك و هى لسة فاضية و ده بيوفر وقت كبير قوى
ممكن تشوف اى مراسلة من بتوع الظباط يمشى معاك و تراضيه لانه حايمشى معاك بأسم الضابط بتاعه يعنى كأنك جبت واسطة بالضبط
خللى اعصابك هادية و متقولش غير اوكى بدون تذمر علشان محدش يعاكسك و يوقف لك ورقك
بالنسبة للضريبة اعتقد انها مش باثر رجعى لانها على الفترة اللى جاية مش على فترة مضت

يبقى لو حسبناها بالوقت يبقى بالكتير ساعتين فى مرور عبود علشان شهادة المخالفات و دفعها .. و انصحك تروح مرور السلام تانى يوم علشان عقبال ما تروح حاتبقى زحمة و تتخنق
لو رحت مرور السلام بدرى تانى يوم يبقى نقول من 9:30 الى 2 بعد الظهر بالكتير .. هو اللى بيأخر الكمبيوتر بس انت ممكن بعد ما تكمل الدوسيه تقعد فى كافيتريا و تجيلهم بعد ساعة او اتنين حتلاقى رخصتك علشان ما تزهقش بس ما تتأخرش علشان تلاقى حد يعلق لك النمر .. و ربنا يوفقك

المشاركة الأصلية كتبت بواسطة mo7a_mo7a

اولا لو في واسطة ممكن تجدد في المرور بتاعك لو مفيش يبقي لازم تنقل
حتعمل ملف وورق فحص وشهادة مخالفات وشهادة بيانات وتروح بيهم المرور الجديد وتفحص وترخص هناك

بس كده

وايه لزوم شهادة البيانات مادام الرخصه ساريه ؟

هو اساسا وانت بترخص ايه اللى هيعرفهم انك غيرت محل سكنك ؟؟ , اعتقد انت بتجدد من غير ما يبص فى بطاقتك او رخصتك

هو ده نظام جديد ؟

على العموم اللى اكيد منه , كومبو تجديد وشنطه ومثلث ده خلص من بعد العرض ما نزل بربع ساعه فى مرور عبود , كدا انت هتعدى على الكشك اللى جنب كشك الطفايات تغرم لك 80 جنيه شنطه ومثلث علشان الفحص

ومصاريف التجديد 3 سنين انا كنت عاملها من اقل من سنه فى عربيتى 2008 كانت 470 , يعنى انت بتتكلم فى رنج ال 400 مثلا او اقل

الفاميه بقى والزينون هى مشكلتك الرئيسيه , المهندس اللى هناك ارخم من الرخامه بعشرين مره

اول ما هيشوف عربيتك جنوط وخلافه هتلاقيه قام اتنطر وقعد يتشقلب حواليها وهيقولك ولع النور وافتح الكبوت واقفل الشبابيك , انا ايام البرايد برده رفضلى الفحص على فاميه مش عارف اسمه ايه بس كان شفاف تماما لدرجه انى والله ما كنت اعرف ان فيها فاميه اساسا وهو اللى لفت نظرى وحاولت اراضيه مرضيش ومن عصبيتى رحت بمفتاح العربيه مبهدل العربيه كلها تقطيع فى الفاميه علشان يمضيلى ويخلصنى , اتصرف قبل ما تروح وشيله احسن

الزينون كذلك حاول تشيله بس لو حوار توكل على الله وادخل بيه يمكن تعدى منه انما الفاميه معندوش فيه رحمه مش عارف ليه

واخيرا اهلا بك فى عالم ام دعاء ومرور عبود :)

بيراجع البطاقه في التجديد

ربنا يعينك يا كريم ,,, قلبي معاك ,,, لو هتروح يوم السبت قوللي و انا أفضي نفسي و آجي معاك ....