اشتغلت او شغال في السعوديه؟

**amir** · 18-05-2010 03:16 AM

انا بفكر جديا خلاص اسافر اشتغل في السعوديه
و كأي واحد بيقدم علي خطوه جديده بيحتاج مشوره الناس الاكتر خبره
انا كنت عايش فتره في السعوديه زمان في الرياض
محتاج اعرف تفاصيل الحياه هناك بقت عامله ازاي
السكن بيكلف كام (انا بفكر اقعد لوحدي لأني نضيف جدا و من خلال تجارب مع ناس ايام الكليه انا مش برتاح غير في النضافه حتي في الجيش مع اني كنت عسكري الا اني كنت بخلي زمايلي يشاركوني حملات النضافه اليوميه)
و ممكن بعد قد ايه من الاستقرار هناك الواحد يتجوز و ياخد مراته هناك
و هل السكن بيكون كويس ولا بيحتاج توضيبات
و هل بيكون مفروش ولا الواحد بيفرشه بمعرفته
و متوسط اسعار الفرش بيكلف كام
و الاكل اخباره ايه اكيد طبعا بتكلم عن مطاعم و كده
انا عايز اعرف راسي من رجلي قبل ما اقدم علي القرار ده
انا كده كده لسه قدامي شهرين تلاته قبل ما اخلص التزاماتي هنا
اه نسيت
انا دكتور اسنان خريج 2005
كنت بحضر ماجستير بس للاسف شكلها خلاص علي كده
فممكن ابقي احضر mfds زماله جمعيه الجراحين الملكيه البريطانيه من هناك و ممكن بعد كده اكمل في اي دراسات عليا بس بره مصر زي البورد الامريكي او الكندي
انا حزين علي القرار ده لأني كنت ناوي اسافر بعد ما احضر الماجستير و مكنتش بفكر في دول عربيه اساسا
بس الوضع كده مش باين ليه انفراجه
فبدل ما اضيع سنين تانيه من عمري في حاجات مش رخيصه و مش سهله نويت اتكل علي الله و اخد خطوه ايجابيه و معتمد طبعا علي ربنا انه يكرمني و يعوضني السنتين اللي راحو عليا في وهم التعليم و الدراسات العليا في مصر
ياريت بقي الاعضاء ذوي الخبره يفيدوني و اكيد الموضوع هيفيد ناس كتير بتفكر في الموضوع ده بس كونه شيء جديد و مجهول فأكيد الناس بتخاف

**AshTurbo** · 18-05-2010 04:06 AM

في حاجة مهمة لازم أقولهالك الأول وهي أن كل ما درجتك العلمية زادت مرتبك هيزيد وزيادة محترمة مش ألف ولا أثنين فلو عاوز توصل بسرعة في حياتك المهنية ومتتغربش كتير ( قال يعني دة عيب ) خد الماجيستير دي نمرة واحد .

نمرة أثنين سافر وأشتغل تبع وزارة الصحة ودي هتفرق جامد جداً جداً في المرتب وفي السكن وفي تذاكر السفر لأن المرتب ينزل النص لو انت مش تبع الصحة والسكن بيبقى أي كلام لو أنت مش تبع الصحة بينما لو عقدك حكومي مع الصحة ليك تذاكر سفر أنت وأسرتك لحد 5 تذاكر والسكن ممتاز ولو مش عاوز تسكن تبعهم هتاخد بدل سكن محترم وليك رعاية صحية مجانية أنت وأسرتك يعني من الآخر هتقعد هناك ( باشا ) بس أفتكر كلمة السر وزارة الصحة ودلوقتي أطمنك أن في وظائف كتير للأسنان هناك وكمان أبشرك أن المرتبات في عهد الملك عبد الله زادت زيادة كبيرة ولكن مرة أخرى للعاملين في القطاع الحكومي وليس الخاص .

نمرة ثلاثة السكن صعب جداً تعيش هناك لوحدك لأن السكن والأيجارات مرتفعة للغاية ومش هتقدر عليها لازم حد يسكن ويشير معاك أو تسكن مع أسرتك تبقى مبلوعة لكن لوحدك دي أنسى الا لو مرتبك عالي فوق ال10 آلاف ريال ويكفي أني أقولك أن 30 % فقط من السعوديين يملكون منازلهم بينما ال 70 % الباقيين مؤجري وليسوا ملاك تخيل ! .

بالنسبة للفرش غالبية الشقق اللي بتتأجر هناك متوضبة على الآخر مش فاضل غير أنك تجيب بوتجاز على ثلاجة على تلفزيون على مكيف وسرير وشوف الباقي ودي حاجات سهلة مش صعبة ومش هتكلفك كتير .

نمرة أربعة الأكل هناك عادي زي مصر هتلاقي كل اللي أنت عاوزة وبجودة أحسن من مصر بمراحل ولكن في حاجات ممكن تختلف في السعر عن مصر زي الخضروات والفكهة خاصة لو أنت في منطقة بعيدة أو صحراوية .

أتمنى أكون ساعدتك ولو عندك أسئلة تانية أتفضل واعتبرني زي أخوك وربنا يوفقك في سفرك وتلاقي عقد كويس .

**nodey** · 18-05-2010 08:22 AM

السلام عليكم اولا اتمني لحضرتك التفوفيق يا د ثانيا بارك الله في الاخوان ما تركوا شئ لكن احب ان انبهك الي ضروة التعاقد مع جهة حكومية مثلا الصحة المدرسية او مستشفيات وزارة الصحة نظرا للمزايا التي يعطونها والله يبارم لك تقبل وافر احترامي ابو خالد

**lonedoctor** · 18-05-2010 09:14 AM

انا عايش فى السعودية فى مكة من 10 سنوات وطبيب بشرى ويعنى بالتالى الظروف بيننا تعتبر مشتركة الى حد كبير ونصيحة منى خلى بالك من الاتى كويس وفتح عينك وطرطا ودانك على الاخر
حاول تخلص الماجستير الاول وتيجى اخصائى موش مقيم لان فارق الرواتب والبدلات تقريبا الضعف
حاول تكون الوظيفة فى وزارة الصحة واحذر تماما من القطاع الخاص وخلى بالك انه الوزارة نوعين فيه حاجة اسمها تشغيل ذاتى ابعد عنه خالص لانه موش هيفرق كتير عن الخاص لازم وزارة وزارة 100 % وعلامة الوزارة انه هتلاقى بدل سكن 3 شهور من الراتب اما التشغيل شهرين بس
لو هتسكن منفرد ممكن يشاركك فى السكن واح عزوبى زيك ويدفع معاك نص الايجار
العفش وتحهيز البيت مو مشكلة كله بيشترى عفش مستعمل وبيكون رخيص وبيبيعه وهو ماشى ولوجيت على عقد وزارة هتاخد راتب شهر ونص بدل تاثيث(هيص با عم)كمان
الاكل موش مشكلة المشكلة فيك انت لانه الاكل ثقافة واذواق انا مثلا بحب النواشف فقط واكره ما يسمى بالطبيخ يعنى اكلى كله مشويات ومقليات وانا اؤمن بميكنة المطبخ قدر المستطاع سواء عندى فى السعودية او مصر يعنى كل شئ له شئ لزوم الشئ فرن كهرباء وميكروويف وشواية وقلاية وطباخة ارز وكتشن ماشين حتى فتاحة التونة بالكهرباء موش فتاحة عادية وكله بالتايمر ياباشا لانه انا موش فاضى ابص كل شوية الاكل استوى ولا لا بحيث انا فلا خلال نص ساعة يكون كله جاهز يعنى اضبط كل حاجة واروح اصلى العصر وارجع اكل على طول
لو هتكمل فى الخليج لغاية المعاش لازم تفكر فى شهادة غربية من دلوقت لانه الشهادات المصربة خلاص كل سنة وانت طيب مالهاش لازمة والاماكن العالية زى مستشفيات الحرس الوطنى والعسكرى فى الغالب لا تقبل الا western qualifications
وتقبل تحياتى واى استفسار تانى انا فى الخدمة

**amir** · 18-05-2010 10:02 AM

كتر الف خيركم يا جماعه
ده شويه شويه نايل موتورز هتغلب جوجل في كيفيه و سهوله الوصول للمعلومه
طيب الجزئيه الخاصه بالتحضير زي ما حكيت بالظبط
انا خلصت جزء اول و للاسف مشكله الدكاتره معايا و مع زمايلي مشكله مزمنه
هما مش عايزين حد يتخرج علشان الفرع ده ميتعملش قسم لوحده و عندهم مصالح شخصيه انه يفضل تابع للقسم الحالي
و للاسف القسم ده موجود منه في جامعه الاسكندريه
و لو بدئت هناك هبدء من الصفر تاني و بياخد 3 سنين و بيحتاج مرواح يومي و انا من سكان القاهره فالموضوع هيكون هجره داخليه صعبه عليا علشان مش معقوله اقضي 3 سنين و انا بستهلك من الموجود من غير ما اكون بشتغل بعائد مجزي
الله اعلم الخير فين بخصوص الماجستير ده كلها كام يوم و ابدء اشوف لو عرفت استفيد من الجزء الاول و احول لماده تانيه و اخد المواد الفرق اخلصهاا في ظرف 6 شهور و ابدء في الجزء التاني من الماجستير الجديد يبقي هكمل و امري لله
و في امكانيه اني احول لدبلومه و بكده اكون مخلص ان شاء الله في فتره زمنيه اقل بكتير
ده بالنسبه لمصر
فكرت اقدم في جامعه قناه السويس خصوصا ان الحضور بيكون اقل في الاسبوع و مش هيكون متعب قوي اني اروح في الاسبوع يوم او اتنين
و فكرت لفتره في جامعه الازهر خصوصا انها مش بعيده عليا لكن خوفي من ان الماجستير من هناك ميكونش ليه قيمه زي باقي الجامعات خلاني اصرف نظر و الله اعلم
و بخصوص كوني كده ممارس عام ففي فرق بين طبيب بشري و طبيب الاسنان
الطبيب البشري فعلا بيكون ممارس عام الي ان يحضر ماجستير و يكون اخصائي و ساعتها بيقدر يفتح عياده او يسافر
لكن احنا لما بنتخرج بعد الامتياز بناخد تصريح مزاوله المهنه و بنعتبر علي درجه اخصائي بعد انقضاء سنتين او تلاته
اكيد طبعا تحضير دراسات عليا من ماجستير او حتي دبلومه بيفرق
و هو ده التفكير اللي خلاني استحمل الفتره اللي فاتت
لكني تعبت
سنتين و انا بشتغل في عيادات و مفكرتش كتير في انشاء عيادتي لأن الماجستير بتاعي non clinical و شغلي بعد كده بيكون مع منظمات زي الصحه العالميه او حكومات سواء اجنبيه او عربيه
فعلشان كده و كأجراء لحد الخساير فكرت في السفر
و لما اسافر ادرس بقي الشهادات الاجنبيه زي الزماله البريطانيه كخطوه اولي و بعد كده ممكن ادخل في الامريكان بورد
بجد احساس في منتهي الالم ان مستقبلك و خط سير حياتك يكون في مستنقع من المصالح الشخصيه لشخصين اتنين فقط!!!
و لو امكن اني الاقي شغل في مكان في الاسكندريه محترم معنديش مانع اني استقر هناك ال 3 سنين بتوع الماجستير بتاعي هناك لأن العائد المنتظر من وراه كبير و بيفتح سكك مختلفه تماما عن مجرد مهنه طبيب الاسنان
مستني الردود و بجد ربنا يبارك فيكم كلكم و ربنا يديم المعروف