الموضوع: السير عكس الطريق ... مشكلة شخصيه سائقين ولا مشكلة تصميم الطرق ؟؟؟

السلام عليكم
طول عمرى ايام ماكنت باحب السواقه فى حد ذاتها كنت باستغرب اللى يمشى عكس
وكنت باوصفه انه متخلف عقليا و ....الخ

ولكن انا اسكن فى اول زهراء م نصر
كل ماخرج من منزلى ورايح مثلا درس عند بنزينة موبيل الحى العاشر
اروح امشى كيلو داخل الزهراء واخد يوتيرن وارجعه تانى وكمان وانا راجع
فى نص كيلو كده بيتاخد فى تلت ساعه عشان الطريق واقف
مع انى لو خالفت هاخالف مسافه قصيره جدا

ركبت مع صديق لقيته قام مخالف مسافه 100 متر (صور المحكمه العسكريه) والطريق اصبح
دقيقتان بدل نصف ساعه
والمسافه اصبحت 200 متر بدل 2 كيلو متر

وطبعا كان رد فعلى انت انسان متخلف

قالى لا اللى مايخالفش الحته دى هو اللى متخلف لانه مسرف ومضيع لوقته
وبيلقى بنفسه فى التهلكه وشاورلى على الطريق الناحيه التانيه اللى واقف تماما ودحك

قولتلو انت ممكن تموت وتموت ناس عشان توفر وقت وفلوس

قالى لا السير عكس الطريق ليه قواعد لو اتبعتها هاتبئا ماشى فى امان اكتر من الزحمه اللى هناك دى

قولت اجرب اسمعه ايه يا سيدى القواعد دى ؟؟
1- تمشى تحت سرعة 30
2- كل ماتلاقى حد على الرصيف تدى كلاكس وتنتظره وانت متوقع نزوله فى اى لحظه لانه مش متوقع ان فى حد جاى عكس
3- تمشى فى صف الركن (صف تانى ) وبسرعه قليله جدا (اكنك راكن)
4- عند دخولك لطريق جانبى بعد السير عكس تدى كلاكسات جامد لان اللى خارج مش متوقع بردو وبينظر للاتجاه الطبيعى
5- اذا واحد جيه خبط فيك بعد ده كله سواء عربيه او شخص انزل اتأسفله بردو وده مش بيحصل اساسا لانك تعتبر راكن

طبعا انا عملت نفسى ولا سامع حاجه وقولت خلينى انا الصح

وكل يوم انزل اتعذب فى الجزء الزحمه وشايف اللى ماشى عكس الناحيه التانيه وحارق دمى
مع العلم ان كان ممكن يعملو يوتيرن فى اول الزهراء كان هايخف الزحمه فى ميدان العاشر لان غالبية الناس اللى جايه من
القاهره الجديده للزهراء بيلفو فى العاشر ويرجع يخش الزهراء فده مخلى الكثافه على يوتيرن العاشر كبيره جدا فالطريق بيقف


ولكن كان فى يوم حر جدا وانا رايح نفس الطريق
كررت اخالف واتبع القواعد الخمسه لانى متأخر وماعيش بنزين وكمان الجو حار مش مستحمل وقوف فى الشمس
وكمان لان صاحبى صاحب القواعد دى ماشاء الله خبير سواقه و طول عمره بيجرى وكله وولا حادثه تقريبا ماشاء الله

ومن ساعتها بقيت اخالف وانا متأكد ان السبب مصمم الطريق ده مش انا
وبردو متأكد ان اللى يمشى نفس الطريق فى الاتجاه الصحيح يعتبر متخلف عقليا

وطبعا الموقف ده متكرر كتييييييييير اوى فى مصر يعنى فى طرق كتير اوى تحس ان اللى صممها او لغى يوتيرن هنا
كان لمجرد انه يرخم عليك انت بس



ياترى ايه رأيكو فى المشكله دى ؟؟؟
وياترى ساعات بتخالفو وانتو عارفين انه غلط ولا لا !!!

المشاركة الأصلية كتبت بواسطة m.mosaad

you can walk these 200 m

لا ماهو اكيد انا مش رايح ال200 متر فقط انا داخل جوه بئا مسافه 2 كيلو كمان ولا حاجه بس طريق مفتوح

المشاركة الأصلية كتبت بواسطة shaddadfalcon1

طيب ده انت بتمشي كتيير وبتاخد وقت كتيير
امال بقي تعمل ايه في واحد مش هيمشي اكتر من 30 متر وياخد يوترن ويرجع عشان يطلع علي الزراعي وتلاقيه يقوم واخد عكسي
مع ان في اشاره محطوطه والناس مزنقه الطريق قوي عشان محدش يعرف يدخل عكسي ومع ذلك تلاقي ناس غبيه يفضل يطلع قدام ويرجع ورا عشان يدخل عكسي مع انه لو مشي صح هيوصل اسرع

النوعيه دي بقي ببقي عايز انزل اولع فيها والله

لا ده كده بئا انا باقوم واقف فى وشه اخليه يرجع الطريق كله مارشدير
وكل ماييجى يرجع ويحاول يفادينى اقوم زانق عليه واقوله لا ارجع وامشى عدل

لكن انا سؤالى عن لو الواحد مزنوق فى حته لازم يمشى عكس فيها كده يعمل ايه ؟؟ وطبعا مافيش اكتر من الكلام ده فى مصر