ارجو المشورة
انا مش محترف سواقة؛ وناس كتير بيقولولي هات مستعمل الأول اتعلم فيه وبعد كدة هات زيرو. تفتكروا ده الصح.
عرض للطباعة
ارجو المشورة
انا مش محترف سواقة؛ وناس كتير بيقولولي هات مستعمل الأول اتعلم فيه وبعد كدة هات زيرو. تفتكروا ده الصح.
ده الصح هات عربيه مستعمله اتعلم عليها تمام واكتسب خبره كويسه سنه مثلا وبعدين هات الزيرو
والله .. انا عاوز اقول لحضرتك حاجة ... لو معاك تمن الجديد هات عربية جديدة على طول ومن غير تفكير لاسباب
1- عربية جديده يعنى مش حتعطل
2- حتريحك فى السواقة
3-حتحافظ عليها وحتبقى حذر فى سواقتها
واوعى تقول اجيب عربية 128 علاشان اتعلم عليها السواقة واخبطها واكحتها ...... لان بجد دة حرام ... لانك لو مابتعرفش تسوق كويس ... يبقى ماتسوقش اى عربية لوحدك لا لما تتقن السواقة صح .. لانك لواعتمد على فكرة انك تجيب عربية قديمة وتخبطها .. يبقى بتعرض روحك وارواح الناس للخطر او على الاقل حتسبب الاذى للاخرين .
طبعا حضرتك اكيد مش فى نيتك انك تخبط وتكحت .... بس لاسف الكلام دة انا شوفته هنا فى المنتدى كتييييييييييييييييييييييي يير .... وعاوز اقول لكل واحد بينصح حد لسة بيتعلم سواقة انة يجيب عربية رخيصة علشان يخبط براحتة ... عاوز اقولة ((( اتقى الله ))) علاشان ماتلاقيش حد عملها فيك وخبطلك عربيتك .
خلاصة الموضوع ...
توكل على الله وهات عربية جديدة علاشان تريحك وماتفتحش بقها ... ولو حسيت انك مش متمكلها فى السواقة .. ودة طبيعى فى الاول مع اى عربية .. ممكن تسوقها فى الاول بليل خالص وفى الاماكن الفاضية .. علاشان تتعود عليها وعلى ابعادها ... ولو اضطر الامر ان تخلى حد من اصدقائك يكون معاك .
تجيب مستعمل .. لسبب .. معلش في الكلمه يعني .. العربيه هاتاخد تخبيطات كتيره (اللي خلاني انا باسوق من 11 سنه و لسه مازال التخبيط شغال) .. و الخبطه في الزيرو بتمنها ( مش بس تصليحها .. دي بتقلل من تمن العربيه كمان حتي لو اتصلحت)..
ده غير كمان حاجه الناس مش واخده بالها منها .. انا عن نفسي ماجبش زيرو ابداً .. علماً بأن انا تاجر قطع غيار سابق .. لسبب واحد .. الجديد اول ما علقت نمر .. بتخسر من تمنها .. قول مثلاً انا اشتريت عربيه ب 100 الف زيرو ..
100 الف .. علقت النمر .. يبقي كده خسيت من التمن 5000 او 10000 حسب العربيه و العرض و الطلب ..
تيجي بعد سنه لو قات يا بيع .. هاتبيع ب 80 او 85 الف ..
بعد سنتان .. هاتبيع ب 70 .. و هكذا .. و يا سلام بقي .. اسعار الزيرو يقل من هنا .. و انت سعر عربيتك يقل من هنا ..
عشان كده انا بانصح الناس اللي عاوزه تستري .. تجيب عربيه عمرها 5 سنين .. يعني لو جبت مثلاً عربيه مو 2003 ..تبقي عديت مرحله الخطر ( الخساره البحته) .. و من هنا تعرف تلعب بقي .. ممكن تجيبها مثلاُ ب 70 تبيعها ب 75 .. و ممكن تخسر ( حتي لو خسرت هاتخسر ححاجات بسيطه) ..
الكلام ده يطبق علي اي عربيه عاليه .. ياعني بالنسبه لعربيات الدعك التام زي الشاهين الكلام ده لا يطبق عليها يهذه الصوره .. لاءن ببساطه حته حديده .. هاتخسر اه .. انما كبيرك تخسر 10 الاف بعد 5 سنين !
انا بتفق مع fiatmomo فى اللى قالة يعنى ممكن تجيب ماروتى او التو زيرو
عربية ابعادها حلوة للتعليم و هاتريحك كتير و تتعلم فى حتة فاضية براحتك و حتى لو جيت تبيع الماروتى او الالتو بتقل الف جنية كل سنة تقريباً ..يعنى كدة كدة انت الكسبان
تعليم بسرعة-مفيش اعطال -هاتحبها و ممكن تستمر بيها فترة طويلة
بس ماتمشيش بيها فى وسط الزحمة غير لما تبقى متقن السواقة جداً
ملحوظة : حتى لو خبطت فى حد(لا قدر الله ) انت اللى هتتأثر و هو غالبا مش هايتأثر أوى و تلفياتك تصليحها هايبقى بسيط اوى .
انت هجيب ايه زيرو الاول ؟
انا اتعلمت علي زيرو...ودلوقتي بقالي 7 شهور..والحمد لله مفيش خبطات غير واحده بس في الباب اللي ورا يمين وانا طالع من الجراج وده علشان كنت لسه مش حافظ العربيه...الخبطه بسيطه اصلا ومش باينه
اشتري زيرو وتوكل علي الله و في الاول حاول تكون هادي ومركز جامد...هتتعب في الاول بس مع الوقت كل شيء هيبقي تمام
بما انك لسه جديد مش خبرة فى السواقة طبيعى حتبقى عرضة اكتر للخبطات و بالتالى حتشوة العربية الجديدة و حتلاقى مصاريف تصليحها عالية
ولاحظ ان فى مصر الناس اللى سايقة (غالبا التكسجية و المكرباصنجية) بيبصوا على العربية الاول قبل ما يرموا بلاهم عليك... لو عربيتك جديدة بيرموا و بيبقوا عارفين انك خايف عليها فا حتوسع فورا (لاحظ انك مش سواق جامد و ممكن تتخض او تتصرف غلط ساعتها)
اما لو عربيتك قديمة فا بيتوقعوا انك ممكن متفرقش معاك و بالتالى حيفكروا مرتين قبل الحركة دى... ايم زمان قبل اللانوس مكنش حد يستجرى يرمى عليا بالفولكس البيتلز
و د برضة بيحصل لما يلاقوا اللى سايق واحدة ست
فيه نقطة كمان و هى ان العربية الزيرو حتبقى ناعمة و خفيفة و حتسهل عليك السواقة مووووت... انا شايف ان دة عيب مش ميزة بالنسبة لواحد بيتعلم زى كدة ما تتعلم على اوتوماتك حتبقى صعب اوى تسوق مانوال فا العربية القديمة حتخليك تشتغل اكتر و تخليك سواق احسن و لما تركب الزيرو ان شاء الله حتلاقى الحياه ظريفة جدا... لو لاى ظرف حصل العكس حتلعن اليوم اللى اتعلمت فيه السواقة
MMamdouh
لو كنت بتسوق كويس ومتمكن هات جديد مش هاتفرق معاك ... انما لو جديد فى السواقه زى ماحضرتك بتقول يبقى هات مستعمل احسن
هى الفكره مش فى مستعمل وجديد بس على قد ما الفكره فى رخص قطع غيار وصيانه العربيه اللى هاتجيبها يعنى انت كده كده هاتخبط وتتخبط وتحك .. انما احتماليه ان ده يحصل وانت جديد فى السواقه اكتر من احتماليته بالنسبه للسواق العادى فبالتالى يفضل تجيب عربيه "رخيصه مستعمله" فى الاول لغايه ماتتعود على السواقه
يعنى مش تروح تجيب فكترا وللا لانسر مستعمله :) لأ مثلا 128 او ريجاتا او 132 أو 131 بحيث تكون صيانتها رخيصة وسعر اعاده بيعها كويس ... وربنا يوفقك إن شاء الله