تقريرى الخاص عن السيراتو مقارنه بباقى سيارات امتلكتها
السلام عليكم ورحمه الله وبركاته .. احب اشكر كل اعضاء المنتدى وبخاصه مالكى السيراتو اللى افادونى فى استفساراتى عن العربيه قبل مااشتريها .. والحمدلله اشتريت العربيه sx بفتحه سقف وكيل .. وبعد حوالى شهر استعمال اسمحولى اقولكم انطباعى عن العربيه بمنتهى الامانه ( مع العلم انى كنت من مالكى التويوتا 85 استعمال _ هوندا 91 استعمال _ ابيزا 94 زيرو _ دايو جولييت 99 زيرو _ واخيرا ماتريكس 2007 زيرو ) :
اولا : بالنسبه للموتور ماشاء الله قوى جدا رغم انى لسه فى التليين وماخدتش منه الاداء الكامل وعلى فكره انا قرصت عليه حبتين للتجربه فقط عشان اسمع الصوت العالى اللى كانو بيقولوا عليه ولاقيت الصوت طبيعى جدا زى اى عربيه بتقرص عليها حتى بعد سرعه ال120
ثانيا : بالنسبه للعفشه بصراحه مش حاسس بأنها ناشفه مقارنه بالماتريكس يعنى برده طبيعى جدا , بس لو قارنتها باى عربيه تانيه هتلاقيها ناشفه شويه بس برده مش للدرجه اللى قالو عليها (كلامهم خلانى افتكر ان هركب مراجيح العيد هههههههه)
ثالثا : بالنسبه للصالون مريح جدا وكله رفاهيه ولكن يعيبه رداءه الخامات خصوصا تجليد الكونسول والابواب ( تقريبا نفس خامات الدايو )
رابعا : بالنسبه للتكييف اداؤه معقول بس مش بكفاءه الماتريكس
خامسا : بالنسبه للثبات حدث ولا حرج جربت بيها كل الحوارات والملفات العاصيه والمستعصيه والداخله والخارجه ..ماشاء الله أسد على الطريق
سادسا : بالنسبه للفرامل ف دى بأه بالنيه يعنى لو نيتك تقف العربيه بإذن الله هتكلبش فى مكانها هههههه ودى بصراحه حاجه جديده عليا لأنى اول مره اركب عربيه فيها aps
الخلاصه من وجهه نظرى انى دلوقتى بمتلك سياره موتورها فى نعومه التويوتا وقوه الهوندا وعفشتها ماتريكس وثباتها ابيزا وخامات صالونها دايو والاحساس بالرفاهيه والدلع فى السيراتو .....
يارب اكون قدرت اوصل انطباعى بالظبط ويكون تقريرى ده مفيد لأى حد عايز يشترى العربيه دى من غير ما يدوخ ويسأل ويحتار ........ والف الف شكر لكل اعضاء منتدى نايل موتورز والقائمين عليه