وزير الإسكان يؤكد تغطية جميع المدن والقرى بشبكة الصرف الصحي بحلول 2040

**hobaz** · 22-05-2010 11:34 AM

والله عيب اللي بيحصل ده جايين يفتكروا دلوقتي في 2010....!!!!!!
يعني الدول دلوقتي بتفكر في النووي والوقود البديل واحنا حطينا خطة للصرف الصحي.....
ربنا يتولانا وياخد بأيد مصر......

**elassar2010** · 22-05-2010 12:37 PM

المشاركة الأصلية كتبت بواسطة بحري

في الحديث الشريف:" إن مما أدرك الناس من كلام النبوة الأولى..إذا لم تستح فاصنع ما شئت"
هي الناس دي مش بتتكسف..2040...يعني المجاري حتفضل ضاربة في أماكن كثيرة من مصر المنهوبة لمدة 30 سنة...إلى الله المشتكى

+999999999

**elassar2010** · 22-05-2010 12:40 PM

يعنى هو بيرمى انة يعد فى الوزارة لحد 2040!!!!!!!!!!

**M.Elwan** · 22-05-2010 04:49 PM

المشاركة الأصلية كتبت بواسطة بحري

التلاتين سنة اللي فاتوا كانوا بتوع الكباري حضرتك....هو إنت مش واخد بالك وللا إيه

كويس قوى 30 سنة كبارى و30 سنة صرف صحى يعنى عالبال ما يوصلو المية والكهربا والغاز لمصر كلها وبالمرة يخلصو المترو نبيقى وصلنا لسنة 3000

**Ahmed Nouh** · 22-05-2010 09:02 PM

هى الحكومه دى قاعده معانا ل 2040 ؟؟

وبعدين على فرض ان فى ادميين كان عندهم القدره على التطور الجينى لمواكبه 30 سنه كمان من الحياه مع الحكومه

2040 دى هتكون الناس برا ( اعزكم الله ) بطلت تعمل اللى بنعمله دلوقتى

مش عارف ايه المعضله اللى محتاجه 30 سنه عمل من دوله كامله , ده مش مشروع تقنى عسكرى مثلا يادوب دى شويه مواسير ومحطات صرف

الناس برا بتعمل ناطحات سحاب فى 5 سنين واحنا مش عارفين نمد مواسير !!!!!

**NaderNabil** · 22-05-2010 09:11 PM

طب الواحد يلم نفسه في الاكل و الشرب بعد كده....محدش عارف الصرف الصحي هايبقى عامل إيه بعد كده...

**بحري** · 22-05-2010 09:59 PM

المشاركة الأصلية كتبت بواسطة ahmed nouh

مش عارف ايه المعضله اللى محتاجه 30 سنه عمل من دوله كامله , ده مش مشروع تقنى عسكرى مثلا يادوب دى شويه مواسير ومحطات صرف

الناس برا بتعمل ناطحات سحاب فى 5 سنين واحنا مش عارفين نمد مواسير !!!!!

شكلك بتشكك في أهمية (اللامؤاخذة)...ده موضوع من أهم العمليات الفسيولوجية في جسم الإنسان يا أحمد باشا..إنت فاكر الموضوع بالساهل كده

**Ahmed Nouh** · 22-05-2010 10:28 PM

المشاركة الأصلية كتبت بواسطة بحري

شكلك بتشكك في أهمية (اللامؤاخذة)...ده موضوع من أهم العمليات الفسيولوجية في جسم الإنسان يا أحمد باشا..إنت فاكر الموضوع بالساهل كده

والله يا دكتور انا بقول الحكومه تعبت نفسها كفايه , الناس دى بقا تطلع شرم الشيخ واحنا نصرف نفسنا

فيه ايه يعنى لو كل واحد بقا مسؤول عن عملياته الفسيولوجيه لمده سنتين ولا حاجه , الناس اهى بتأكلنا وتشربنا وتفسيولوجيينا واحنا قاعدين فى البيت , لا وكمان هيمدولنا شبكه الصرف علشان يبقى فى تواصل من نوع جديد بين كل فئات الشعب

يخليهم وياخدهم فى حته هاديه صافيه بعيده عننا وعن وجع القلب , حاجه بعمق 2000 متر تحت سطح المحيط الهادى مثلا