الموضوع: الاساتذة الافاضل اخر اسعار الصنى كام

المشاركة الأصلية كتبت بواسطة sskarim

الجدول اللي سيادتك كتبته مشكورا يمثل أسعار الوكيل الرسمية المعلنة التي لايمكن ان يزيد عنها السعر أبدا..الا في حالة عدم وجود العربية في السوق..وهنا يطلق عليه الاوفر بريس مثلا للاستلام الفوري ..أوالحصول علي لون نادر وهكذا...والناس بتقدر الاوفر بريس طبعا من الهاي واتر مارك الذي يدعي أسعار التوكيل..

جزئية الفصال دي لها اعتبارات كتير..يعني المعرض بيشوفك داخل تتفرج ولا هاتحجز وتشتري ...وهنا الكلام يختلف..قسط ولا كاش...ولفيت في معارض تانية واخذت عرض أسعار منهم وعرفت أقل سعر ممكن العربية تتجاب بيه ولا انت داخل له كأول معرض وانت بتشتري ....وحاجات تانية كتير..

مصر البلد الوحيدة اللي فيها فصال من الابرة للصاروخ ..لاتوجد أسعار معلنة لكثير من السلع ...انا مش عارف امتي ال e-commerce يدخل مصر ..ونلاقي مواقع زي امازون وكل حاجة عليه سعرها واضح ومحدد.

ياسيدي الفاضل مصر للطيران لما حاولت تعتمد في منظمة الطيران العالمية IATA في شوية حاجات مثل الحجز الالكتروني واصدار التذاكر الالكترونية..فوجئوا بأن المصري تذكرته بسعر والاجنبي بسعر..طب السيستم هايعرف الجنسية ازاي من ورا الكيبورد...وبالتالي الاسعار اتوحدت والكل بيشتري من الموقع الالكتروني لمصر للطيران بسعر محدد.....

انا كنت مع واحد اجنبي فبيقولي انتوا في مصر بيتصحوا من الساعة كام...استغربت السؤال..قالي عشان انتو بتقضوا وقت كبير قوي وانتوا بتفاصلوا..كان الراجل زار الاقصر واسوان وجرب شراء السوفونيرس وهكذا..المهم اللي اثارني انه كان بيحذر واحد تاني صاحبنا اجنبي برده من موضوع الفصال ده... سمعة مش ظريفة وكلنا تعبانين من الموضوع ده....

لازلت أكرر ...التفاوت بين المعارض في الخصم ممكن يصل الي 2000 جنيه بدون أسباب منطقية أو عقلانية..عن تجربة حديثة جدا

شكرا واسف علي التطويل

يا اخى العزيز ما احنا كده رجعنا لنفس النقطة اللى انا قلتها ...

مافيش guide قدامى الا سعر الوكيل المعلن عنه ، لأن كل المعارض مختلفة ، و ما اقدرش أقوا ان فلان اشترى العربية من المعرض الفلانى بكذا مع الفصال لكن فلان اللى مابيعرفش يفاصل اشتراها من نفس المعرض بكذا ، و علان اشتراها من معرض تانى بكذا ، و المعرض الفلانى عامل عرض خاص فتبقى بكذا ...

كده مايبقاش عرض اسعار ... تبقى نشرة اخبار اعلانية ، و هل يعقل ان لما حد يسأل عن سعر العربية أنزل الف على المعارض و افاصل و بعدين اقول له كل واحد قال ايه ؟؟؟ ولا اقول له انزل انت و شوف ؟؟؟

اعتقد انى لما اقول له اسعار الوكيل هايبقى عنده فكرة لا بأس بها تخليه يعرف يتكلم ازاى فى السعر و هو بيشترى ... و لا ايه رأيكم ؟؟؟

أما حكاية الأوفر برايس ، فمش عارف هاتصدقنى ولا لأ لما اقول لحضرتك حصلت معايا لما جيت اشترى عربيتى ، طلعت المصرية للسيارات حسب الأعلانات ، و لما سألت على اللانسر البومة الخليجى ادانى سعر اعلى من سعر الرواس ، و حتى مع الفصال القاتل فضل السعر اعلى ، أتاريه بيجيبها منه و بيضيف عليها مكسب (بس مبالغ فيه حبتين) ، و لما سألت عليها فى عربيات اللى فى المهندسين وصلت معاه لسعر اغلى 500 جنيه من الرواس برضه ، و فى الآخر جبتها من اوتوداينامكس ارخص 2000 جنيه عن الرواس ، بس كنت عارف سعر مصرية (الوكيل) و الرواس (الوكيل + وكيل الخليجى) و باتكلم على الأساس ده...

ارجو اكون وضحت وجهة نظرى ...

اما بالنسبة للتاجر المصرى فأنا رأيي انه اسوأ تاجر ممكن تتعامل معاه ، عايز اعلى سعر حتى لو البضاعة ما تسواش ، و بدون التقيد بنظم او اعراف او قوانين ، و مش بيقبل الفصال بسهولة ، و ماعندوش مانع يبوظ البيعة على قرش ملح بدل ما يتنازل شوية و يبيع و يكسب و يبقى كسب زبون كمان ، ده غير المنطق الأصيل اللى عندنا احنا بس "البضاعة المباعة لا ترد و لا تستبدل" ... و غيره و غيره ...

بلاش نخرج عن موضوعنا..

اتمنى اكون وضحت رأيي فى ذكر اسعار الوكيل

و تحياتى

المشاركة الأصلية كتبت بواسطة sskarim

السلام عليكم,

وجهة نظرك واضحة يادكتور شريف..
الموجود والمعلن هو اسعار الوكيل وده اللي انت تشرفت وكتبته...

اما بخصوص تجربتك مع اللانسر فمع غرابة ان الديلرس تبيع أغلي من التوكيل ..الا ان الدرس هنا ضرورة معرفة علي الاقل عرضين او ثلاثة ان امكن قبل الشراء النهائي.

شكرا

شكرا لحضرتك ..

كده حضرتك جبت المفيد ... الواحد بيبقى عارف السعر حوالى كام و ينزل يدور و يفاصل لغاية اما ربنا يوفقه و يجيب أحسن سعر ان شاء الله..

بمناسبة مصر للطيران حضرتك فكرتنى بحاجة من ضمن عجائب مصر للطيران ... كل شركات السفريات (مش الطيران بس) فى العالم لما بتكون حضرتك هاتتصل بيهم علشان تحجز و تشترى تذكرة من عندهم بيعمل خدمة الرقم المجانى 0800 يعنى تكلمهم على حسابهم ... و ده طبعا لأنك هاتنفعهم و تشترى من عندهم و تسافر معاهم ... و لكن عباقرة و جهابذة شركتنا العريقة عملوا نمرة واحدة لل call center و خلوها 0900 و الدقيقة حتى مش بسعر الدقيقة العادية .. لأ ... دى ب 1.5 جنيه ... يعنى مادامت حتسافر معانا و تدفع لنا فلوس يبقى لازم ندفعك اكتر كمان و كمان .. حتى فى الحجز ... ليه تدفع اقل مادام ممكن تدفع اكتر !!!

بمناسبة الفصال فأنا شفت كتيب للأجانب اللى جايين عندنا بينصحهم انهم يفاصلوا فى كل الأسعار حتى اسعار التاكسى ... و المفاجأة ان مين اللى عامل الكتاب ده ؟؟ شركة محلية كبيرة .. و اعفونى من ذكر اسمها ..!!!

المشاركة الأصلية كتبت بواسطة mohamedfadel

يا جماعة انا اشتريت الحمد لله الصني اوتوماتيك abs و جميع الكمليات ب 89500 و السوبر صالون ب 98000

ألف ألف مبروك .. و ربنا يديلك خيرها و يبعد عنك شرها.

ممكن لو سمحت أعرف حضرتك اشتريتها من أنهو معرض ... أختى ناوية تجيب واحدة اليومين دول ان شاء الله و اعتقد ان السعر ده كده يبقى ممتاز ما شاء الله..

و شكرا