بسم الله الرحمن الرحيم

السلام عليكم ورحمة الله وبركاته

اولا انا بشكر الصدفة الجميلة اللى جمعتنى انا واحد اعضاء نايل موتورز عامة وقسم مازدا خاصة الاستاذ / وائل
عرفنا بعض صدفة ودون اى ترتيب لقيته بيتكلم على موضوع هو كتبه وكان ليا الشرف انى رديت عليه

بجد يا جماعة الاستاذ / وائل من الشخصيات المحترمة والمؤدبة جدا وياريت كلنا نتعرف على بعض ونعرف بعض اكتر

نبدأ التقييم.

انا انهاردة رحت غبور ميعاد الحجز بتاعى كان الساعة 11 رحت المكان فى ابو رواش بعد مركز صيانة هيونداى بكيلو تقريبا

الانطباع الاول المركز شكله محترم كلمة مازدا شكلها يفرح القلب

لقيت تقريبا حوالى 4 عربيات قبلى

قابلنى مهندس الاستقبال واخد البيانات وطبعا قالى شرفت غبور والكلام الجميل ده

العربية اخدت حوالى ساعة بتتفحص وجابلى التقرير

تغير 4 فرد كاوتش + 2 بيضة ميزان خلفى + الطنابير عاوزة تتخرط + تظبط الزوايا



العربية عاملة 60000 كيلو تمام

اللى انا فوجئت بيه واتصعقت منه الاسعار ده فعلا خراب بيوت وبالمستعجل


بسأله على تيل الفرامل عامل 1100 جنيه ايوة فعلا الف ومائة جنيه مصرى لاغير وطبعا غير المصنعية

2 بيضة ميزان عاملين 790 جنيه

خراطة الطنابير 150 جنيه

الطنابير نفسها عاملة حوالى 3000 جنيه ايوة ثلاثة الاف جنيه مصرى لاغير

ده طبعا مهندس الاستقبال اللى بيقولى الاسعار دى

قولتله عاوز اقابل مدير المركز المهندس رزق

قولتله يا بشمهندس يعنى انا بجيب تيل الفرامل من مازدا السعودية 200 ريال تيجى انت تبيعه هنا بالف ومائة جنيه ليه يعنى ده كله انت كده بتخسر العملاء مش بتكسبهم

قالى ماهو اصل دى قطع غيار اصلية

قولتله ولو ماتوصلش للسعر ده ده لو تيل مرسيدس مش هيبقى كده

المهم فى نهاية الحوار قالى قول الحمدلله ان بقا ليكم توكيل

قولتله انا بروح سمارت كار وناس محترمين جدا الصراحة والاسعار مش غالية

طبعا انتم عارفين الكلام اللى لا بيودى ولا بيجيب قالى سمارت وسونستا مش بيجيبوا قطع غيار اصلية

وقتها افتكرت كلام احد الاعضاء لما قال ان غبور واخد مازدا علشان يحرقها فى مصر

المهم المهندس رزق قالى انهم هيعيدوا تانى التسعير وكلمنا خلال 5 ايام

وفعلا ابقى سلملى على الترماى

وعلى راى المثل جات الحزينة تفرح ايه اللى حصلها

كملوا انتم بقا

الصراحة انا نصحت العملاء اللى كانوا هناك ان محدش يشترى من عندهم اى قطع غيار

وفكرت ليه اعضاء نايل موتورز ما يعملوش معرض لبيع قطع الغيار انا مش متخصص فى الموضوع ده بس اهى فكرة معرفش ايه مدى جدواها بس انا حاسس انها هتبقى مفيدة