الموضوع: التأمـــــــــــــــين و جميع بنوده و شروطه

اخواني الكرام الواحد و الله حاسس ان هو فعلا وسط اخواته من كم الروح الاسريه الموجوده في المنتدي ماشاء الله.انا ان شاء الله عامل الموضوع ده عشان اشرح كل و جميع مايتعلق بالتأمين
و طبعا كل الكلام اللي هقوله ساري علي جميع الشركات في مصر لأن جميع الشروط و القواعد موضوعه من قبل الهيئه المصريه للرقابه علي التأمين.
الفصل الأول.
تتعهد الشركه (ايا كان اسمها) بتعويض المؤمن له عن الخسائر الناتجه عن :-
1-التصادم بجميع انواعه و الانقلاب ايا كان سبب الحادث و سواء كان المؤمن له هو المخطيء او سواء كان خطأ الغير.
2-الحريق او الانفجار او الاشتعال الذاتي و الفعل المتعمد من الغير و ما اكثره من هواه الرسم علي السيارات و تكسير الفوانيس و الخناقات اللي بتتم في الشارع
3-اثناء نقل السياره سواء بطريق البر او البحر او بأي شيء اخر- و طبعا جميع عمليات السرقه او الشروع فيها سواء للسياره بالكامل او للاكسسوارات المثبته بها مثل الكاسيت و شاشات العرض .
لا يشمل التأمين اي ضرر يصيب السياره و يكون في الاجهزه الميكانيكيه او الكهربائيه في السياره و التلف طبعا الذي يصيب الاطارات من خلال الاستعمال العادي.
( ملخص الموضوع ان التأمين بيغطي اي حاجه تنتج عن حادث سواء كان كان خطأك او خطأ الغير.)

نيجي بقي لأهم حاجه في موضوع الـتأمين هو خطوات المطالبه بالتعويض عند حدوث حادث لا قدر الله.
1- يجب تقديم اخطار الحادث
2- اختيار مكان الاصلاح و هنا يقابلنا خياران اولهم التصليح في التوكيل و ده يتم فيه اصلاح العربيه طالما لم يتم علي سنه الصنع اكثر من خمس سنوات و في هذه الحاله فالمؤمن له هو اللي بيدفع و بعد كده يطلع الشيك .
تاني حاجه الاصلاح في المراكز المعتمده بكل شركه و في هذه الحاله المؤمن له لا يدفع اي شيئ و المركز المصلح يحاسب شركه التأمين بمعرفته.

ما يتم دفعه عند اي حادث فقط.
1/ من 5 الي 20% من قييمه قطع الغيار المستبدله نتيجه الحادث و هي عباره عن قيمه الاستهلاك بين قطع الغيار الجديده و قطع الغيار التالفه .( يتوقف علي سنه الصنع)
2/ تسليم قطع الغيار التالفه للشركه او خصم 5 % من التعويض.
3/ اذا نتج عن الحادث تلف للايرباج يتحمل المؤمن له ما قيمته 25% من قيمه الايرباج المفتوحه
4/ للحوادث اكتر من 5 الاف جنيه يجب عمل محضر شرطه و اذا لم يتم عمل المحضر يتم خصم 25 % من قيمه التعويض. ( علي فكره يا جماعه عمل المحضر ده حاجه سهله جدا مش زي ما كل الناس فاكره انه شيء عويص)
ديه بس كل التكاليف اللي ممكن تدفعها بعد تصليح السياره و لا يتم دفع اكتر من كده مليم واحد
نأتي للمرحله التالته و هي المعاينه قبل الاصلاح و يتم فيها معاينه السياره من قبل خبير معتمد من الهيئه المصريه للرقابه علي التأمين لتقدير قيمه التليفات و اعطاء امر بالاصلاح .

نأتي للمرحله القادمه و هي بعد الاصلاح يجب معاينه السياره مره اخري للتأكد من ان الاعمال المعتمده قد تم تنفيذها و تقديم الفواتير الي الشركه لبدء تنفيذ عمليه سير الملف و صدور الشيك الخاص بالتعويض.
اعتقد اني كده اكون وضحت كل ما يهم جميع الاخوه الاعضاء بالنسبه للتأمين و يارب بس مكنش نسيت حاجه. و انا تحت امركم جمبيعا في اي استفسار او مساعده هو طبعا في حاجات تانيه كتير زي الاشتراطات في حاله الهلاك الكلي مثلا لا قدر الله فأنا ان شاء الله مستني اسئلتكم علي اي شيء داخل الموضوع و انا طبعا تحت امركم لأني مهما كتبت مش هقدر الم كل حاجه في نفس الموضوع و احسن حاجه طبعا اني ارد علي اسئلتكم و استفساراتكم و بكده يتكون لدينا مرجع كامل عن كل ما يخص التأمين...............
تحياتي لكم جميعا.....
اخوكم / ممدوح العربي
السلام عليكم و رحمه الله و بركاته