الموضوع: العجله الاماميه اخرت

السلام عليكم
انا اسف يا جماعه الموضوع ده انا حطيته فى الفيات بس انا مش قادر اصبر فانا حطيته تانى هنا ارجوكم ساعدونى القصه كالتالى

امبارح وانا ماشى دست على زجاجه وفرقعت بصوت عالى بعدها مباشرة سمعت صراخ شديد
وطبعا انا اتخضيت واترعبت احسن يكون الزجاج طار فى وش حد و بتلقائيه بصيت ورايا و مفيش ثانيه العربيه دخلت بالكاوتش فى الرصيف
ولاقيت ان الصراخ صراخ عيل من بتوع اليومين دول بيهزر ولا حول ولا قوه الا بالله
المهم روحت اولادى وطلعت على الطريق اجرب العربيه لاقيتها بتحدف شمال طلعت على بتاع الزوايا وقالى التالى:
احمد ربنا ان الموضوع جه على كده العجله اخرت (فهمت من كلامه انها اتحركت من مكانها) فسالته اخرت اد ايه قالى حوالى 1.5 سم
وطبعا كانت الساعه حوالى 9 مساء فقالى هتجيلى يوم الاثنين وانا هشدهالك بالزرجينه على البارد
بس الموضوع ده هياخد بتاع 4 او 5 ساعات شغل
المهم روحت وانا عندى احباط لانى مش فاهم قوى مدى تاثير الموضوع ده على العربيه
ارجوكم تنصحونى ولو فى حد فاهم يشرحلى كويس القصه
وتاثيرها على الاتزان وبالذات فى السرعه
وهل بعد ما يعمل موضوع الزرجينه ده العربيه هترجع زى ما كانت وهل ده بياثر على حاجه ثانى
ولو الموضوع خطير هل فى مكان كويس اروح فيه ولا اروح للراجل بتاع الزوايا ده
وشكرا

المشاركة الأصلية كتبت بواسطة sameh127

السلام عليكم التأخير ده ببساطة هو عبارة عن عوجة فى بيضة المقص (دورها هو عمل ارتباط ما بين المقص و الطنبور/الديسك و الحفاظ على الإرتباط بينهم حتي فى حالة المطبات وفى حالة كسر الدركسيون يمينا او يسارا فالطنبور بيتجه يمينا او يسارا مع البقاء مرتبطا مع المقص الأمامي"ارتباط رأسي وارتباط محورى دوراني")
العوجة فى البيضة بسبب إصطدام السيارة فى الرصيف وممكن يصل الى ان يعوج المقص بسيطا ويستلزم تدخل عفشجي حتي يعيد عدل المقص للوضع الأصلى اللى كان عليه و يستعدل بيضة المقص من العوجة او التأخيرة اللى حصلت لها.
التأخيرة او التقديمة فى وضعية تثبيت البيضة فى المقص بتخلى العربية تحدف يمين او شمال اعتمادا على وضعية العجلة المصابة لأنها بتسبق العجلة الأخرى فى الحركة و بتشد العربية الأول فى اتجاها و خطورتها ايضا فى السرعات لأن مع الفرامل بتخلى العربية تحدف جامد ناحية العجلة المأخرة وحاجة تانية هى ان السيطرة على حركة العربية و وحركة الدركسيون يمينا و يسارا بتبقى بايظة خالص و انت بتجري بالعربية و كمان و انت بتفرمل (فأءمن شئ المشى بسرعة منخفضة و المناورة بالعربية بهدوء و بدون حركات مفاجئة) الى ان يتم تصليح ما فسد
و استعدال المقص أو بيضة المقص يستغرق نصف ساعة من الوقت فقط بخلاف الوقت المستغرق فى فك و تركيب العفشة وعدد العربيات الموجودة عند الصنايعي شغال فيها.

السلام عليكم
جازاك الله خيرا
فعلا كلامك صحيح انا بعد اللف والدوران وسؤال اخوانى فى المنتدى والذهاب للزوايا والميكانيكى
وصلت للنتيجه دى
فعلا بض المقص اصبح مش مضبوط لكن الحمد لله الموضوع بسيط ومش مسبب مشاكل كبيرة
والميكانيكى وعدنى انه هيغيرهولى لما اكون جاهز
وادعيلى ربنا يسهلى
ومرة تانيه باشكرك على تحليلك الجامد
وجزاك الله خيرا