الموضوع: استهلاك البنزين في الفليشيا وشوية مشاكل

السلام عليكم
ازيكوا يا رجالة الاسكودا

عربية خالى فليشيا 99
فيها شوية مشاكل
اولا بتستهلك بنزين جامد جدا احيانا بيكون 150 كيلو بس في الصفيحة ! وعلى احسن تقدير 180 او بالكتير اوى 200 كيلو ده لو كانت مظبوطة (ملحوظة : بنحط بنزين 80 )

طبعا الاستهلاك عالى مفيهاش كلام بس ايه الاستهلاك الطبيعى لعربية زي دى 1300 سي سي وللفليشيا تحديدا ؟
وهل لو حطيت 90 او 92 هتوفر جامد والاستهلاك هيتعدل ؟ وهل نسبة انضغاطها مصممة على الـ 80 ولا الـ 90 ولا ايه؟

تانى حاجة
امبارح سقتها على طريق زراعى كله مطبات بس سحبها كان تعبان جدا لدرجة انى بين كل مطب والتانى على ما بقف واطلع من الاول ماكنتش بلحق اجيب الـ 60 الا بعد مسافة طويلة واغلب الطريق كنت ماشى على 40-50 لصعوبة الطريق وبرضه لأنها بتجمع بعد وقت كبير

لدرجة ان بعد كل مطب الاقى الناس كلها بتعدينى و مضايقة منى من بطء طلعتى
( هى ممكن تجيب سرعات عالية عادي بس مش بتجمع بسرعة وصوت الموتور بيعلى اوى )

3 - كمان لاحظت حاجة انها بتنتش في الدبرياج لو سبته مرة واحدة على السرعة البطيئة

وبتكلبش كأنها هتفرمل اول ما بشيل رجلى من ع البنزين على اي سرعة تقريبا مش عارف ده عيب فرامل ولا عيب ايه
مع انها لو متمورة بتمشى عادى و مش بتقف بسرعة ( يعنى بحس ان المكنة بس هى اللى تقيلة على العربية لما بشيل رجلى من ع البنزين بس فى نفس الوقت العربية خفيفة في التموير عادى )



4 - صوت الموتور فيه خشونة وصفارة خفيفة ، مع العلم انها مغيرة كاتينة من قريب

5 - الكربراتير مش مظبوط وساعات تطلع دخنة سودا من الشكمان على السلانسيه و سااعات نشم ريحة بنزين جنب العربية ، والسلانسيه كل ماا يتظبط يوطى تانى بعدها بفترة وفي مرة من المرات الميكانيكى ظبطه ووطى تانى يوم لوحده لدرجة انها بقت تبطل في اليوم ده


6 - ساعات لو بطلتها وركنت وجيت اشغلها تانى ما ترضاش تدور بسهولة مع انها سخنة وكانت لسه شغالة
وفي مرة من المرات ما رضيتش تدور خالص بعد تبطيلها بـ 5 دقايق بس ودارت بالزق على طول

بس البطارية والمارش يفترض انهم كويسين بدليل انها بتدور الصبح كويس جدا


كفاية كدة دلوقتى

مع العلم العربية كانت مغيرة بوجيهات من اقل من سنة والعربية ما بتمشيش كتير اوى وكمان مغيرة
طقم دبرياج من سنة برضه
وحالة الموتور المفروض انها حلوة وكانت بتجيب مية من الشكمان

ومع العلم برضه ان خالى راح لميكانيكية كتير وماحدش عارف يظبطها لحد دلوقتى

ومعلش طولت انا عارف
بس انا عشمى في الرجالة كبير