الموضوع: محتارجدا و أرجو منكم الرأي والمساعدة

لسلام عليكم إخواني

معلش لو كنت حطول عليكم بس إستحملوني شوية عشان مساعدتكم مهمة جدا بالنسبة ليا وأشكركم لمجهودكم وصبركم
الحكاية إني أن شاء الله ناوي أجيب عربية [overline] أوتوماتك[/overline] بعد 7- 8 أشهر فمعلش إذا كنت بسأل بدري شوية بس ده عشان أخد بالأراء وأقرا وأسأل .

في الأول أنا كنت ناوي اجيب عربية في حدود السبيعينات أو الثمانينات بس البدائل كانت مش مقنعة بالأضافة قولت أني طالما هقسط يبقي أقسط و أجيب حاجة محترمة ومقنعة وتفضل معايا فترة علي الأقل 10-12 سنة علي ما الواحد يفكر يبعها.
أن شاء الله هيبقي في إستطاعتي أدفع مقدم من 45 - 50 ألف وقسط شهري من 1000 - 1200 لمدة 5 أو 7 سنين علي حسب القيمة وده أخري يعني بتكلم في عربية في حدود من 100 إلي 120 ألف.

في البداية لما كنت بفكر أشتري العربية في حدود السبيعينات و الثمانينات كنت بفكر في الريو 2010 أو النيو أكسنت أو الرينو السيمبول وكلها عربيات محترمة وكنت ميال أوي للريو 2010 عشان سعرها مناسب للإمكانيات في فئتها مع التوكيل المحترم بس مشكلة سعرإعادة البيع سئ جدا ونقلت التفكير علي النيو أكسنت عشان بردوا سعر إعادة البيع وكمان مع واحد صديقي ووسوقتها وكانت كويسة ولما دخلت علي منتدي هيونداي عشان اقرا علي العربية أتصدمت من اللي شوفته و اللي غبور عاملة في الناس وغيرت رأي 180 درجة وقلت أعلي شوية وأشوف البدائل.

المهم نقلت التفكير في الفئات الأعلي شوية وكانت البدائل نيسان صني وكيا سيراتو وهيونداي إلنترا و رينو سكالا وميتسوبيشي شارك دي كانت أعتقد أنسب الإختيارات في الأمكانيات المادية علي ما أعتقد.

رجعت تاني أدخل منتدي هيونداي علي أمل ألاقي حاجة كويسة عن الإلنترا أتصدمت مرة تانيةلاقيت ناس مبلغة حماية المستهلك و ناس عايزة تطلع التلفزيون تفضح غبور وبلاوي الصراحة نفس أتغمت و قفلت تماما وقررت إستبعاد هيونداي للأبد من حياتي حتي لو أخر عربية (مع الإعتذار لكل مالكي هيونداي ولهم كل الإحترام) عشان هتبقي مخاطرة أدي فلوس لغبور وبعد كدة أدوخ وراهم.
تبقي عندي 4 إختيارات صنفتهم كالأتي :-

1- نيسان صني السوبر صالون ومشكلة التقفيل المصري السيئ اللي شوفته بعيني في المعارض ومشكلة العزل السئ اللي بيشكو منه مالكي الصني .

2- الكيا سيراتو العربية التحفة اللي أنتشرت في مصر بطريقة رهيبة وكأن كل مصر أشترت العربية ودخلت برضة علي منتدي الكيا ولقيت بعض الشكاوي من مالكي العربية في العفشة وإنها قريبة جدا من الأرض وبتاخد كل المطبات ومش هي دي المشكلة اللي هزتني أنما الكارثة والرعب عن المواضيع في وجود شكاوي عن عربيات مقلوبة ومباعة عن طريق موزعين والناس بتشتكي في حماية المستهلك ويا عالم ممكن الواحد يقع في حاجة زي كده.

3- الرينو السكالا اللي بيقولوا عليها أنها الصني بعلامة الرينو مع فروقات التقفيل والتوكيل طبعا بس بردة مع قطع الغيار النااار ولسه طبعا مش مجربة ولا في أي معلومات عن حد إشتراها أو ساقها ومش عارف خلال ال7 أو ال 8 أشهر القادمين هيكون توفرت معلومات ولا لأ.

4- يتبقى الإختيار الأخير وهو اللانسر الشارك بس المشكلة معنديش معلومات كفاية عنها ولا عن التوكيل أو قطع الغيار كمان موجود الخليجي منها في الأسواق و مشكلة التوكيل الأخيرة ليها تأثير علي الصيانة فيما بعد ولا لأ.

الحقيقة أنا محتار جدا في الإختيار ومش عارف أجيب بدايل تانية كمان مش عارف إختياراتي دي مناسبة ولا لأ

أنا محتاج عربية عائلية وتتحمل مشوار شغلي من حدائق الأهرام للتجمع الخامس ده بالإضافة لإختيارها الأتوماتيك عشان أهدي شوية وأبطل شد وحرق وعصبية لأني هلبس مصيبة لو جبت مانيوال.

أنا أسف مرة تانية للأطالة ومحدش يزعل مني من ملاك العربيات السابقة عشان ده رأي الشخصي المحدود وأشكر صبركم ومستني مساعدتكم وردودكم.

أحمد