الموضوع: خلاصة الكلام فى ظبط فيشة الاوكتان ( بالصور )

بسم الله

موضوعنا انهارده بيتكلم على فيشة الاوكتان وظبطتها المثاليه المناسبه لدرجة اوكتان البنزين ( 80 , 90 , 92 , 95 ) المستخدم فى السياره

فحبيت اوضح ظبطة الفيشه الصحيحه لكل نوع بنزين للتسهيل على الجميع

وايضا لتحقيق الأستفاده القصوى ( عزم , قدره حصانيه ) من كل لتر بنزين يوضع بالسياره

مع العلم ان اغلب مواتير ( الدايو والأوبل والشيفورليه ) بها نفس فيشة الأوكتان

ولاكن

تختلف اماكنها والوان سلوكها بأختلاف السياره

ولزم التنويه ان بعض سيارات هذه الماركات ليس بها فيشة اوكتان مثل ( النوبيرا الأوروبى )

وللعلم الظبطات الموجوده بالموضوع خاصه بالدايو لانوس


بسم الله نبدأ

ما هى فيشة الاوكتان ؟

هى عباره عن jamper او كوبرى مثل الموجود فى هارد الكومبيوتر تختلف الفائده منه بحسب طريقة توصيله للاطراف المختلفه

وكل توصيله مختلفه من الجامبر للفيشه الأساسيه بتدى اوامر حريق مختلفه لكومبيوتر السياره

ودى صوره لمخطط التوصيل من الأليكتريك مانيوال الخاص بالانوس




معناه ايه الكلام ده ؟

الفيشه فى الانوس لها أربعة اوضاع مختلفه للتوصيل يتناسب كل وضع منها مع نوع البنزين المستخدم فى التشغيل ( 83 , 87, 91 , 95 ) ده فى بلاد بره

وما يعادلهم بالنسبه للبنزين الموجود فى مصر ( 83 = 80 ) , ( 87 = 90 ) , ( 91 = 92 ) , ( 95 = 95 )

وطبعاٌ توصيلها الصحيح المتوافق مع نوع البنزين المستخدم يؤثر بالايجاب على اداء العربيه بصوره خياليه

طيب مكانها فين ؟

تحت الكرسى اللى جنب السواق مباشره

هنقدم الكرسى لقدام على الآخر و هنرفع فتحة الموكيت من تحته

( فى الانوس 1 هنلاقيها جنب الكومبيوتر )

زى كده



( فى الانوس 2 هنلاقيها جنب الضفيره الماره تحت الكرسى )

وده الشكل بتاعها



طيب لقيناها شكلها ايه ؟

عباره عن فيشه داخل ليها ثلاثة اطراف ( بنى , اسود , بنى فى ابيض )



وفيشه موصوله بيها ( نصفها التانى ) موصله الطرفين ( الاسود , البنى فى ابيض ) بسلك اسود عليه ملصق مكتوب عليه 87 او 83



وده رقم الاوكتان اللى المفروض العربيه مظبوطه عليه

وطبعا ده مش موجود بمصر الحبيبه

طيب ممكن نظبطها على البنزين الموجود بمصر بأنواعه المختلفه علشان نحقق اعلى استفاده من الموتور ؟

ممكن طبعاٌ

المصممين للسياره كتر خيرهم تركولنا المجال اننا نلعب برقم الاوكتان المناسب لكل واحد فينا ( بعكس عربيات تانيه كتير ) لايوجد بها هذا الخيار ( وده من احد مميزات الدايو )

خلص الكلام النظرى

نخش بقى على العملى

قبل اى حاجه نفتح الكابوت و نفك القطاش السالب من البطاريه بمفتاح عشره وده ضرورى اوى عشان نحافظ على كومبيوتر السياره من اى دوائر قصر ( قافله يعنى )

ونخش تحت الكرسى اليمين ونرفع الموكيت ونمسك الجمبر والفيشه

هنشيل نصف الفيشه الموجود به الملصق بالضغط على سوكت المنتصف مع الشد للخارج

هيطلع الجمبر فى ايدك وده شكله



ونظبطه تبعاٌ لنوع البنزين المستخدم فى العربيه

وليه 3 ظبطات

ونبداء بكيس التوفير ( اقصدى بنزين التوفير )

1 - البنزين ( 80 ) اللى هو ( 83 ) بره

الجمبر فى ايدينا له ثلاثة فتحات اتنين متوصلين ببعض بالسلك الاسود والثالثه من غير اسلاك

وده شكله



بكل بساطه هنوصل طرف تالت من السلك الوسطانى الى الفتحه الفاضيه ( زى متكون بتوصل شعرة فيوز بالظبط )

يعنى هنوصل الثلاثة اطراف ببعض

تمام كده

هنرجع الجامبر للفيشه تانى

ونرجعه مكانه ونغطيه بالموكيت

ونوصل كابل البطاريه السالب تانى

ونعمل ايدل ليرن علشان كومبيوتر العربيه يظبط نفسه على الوضع الجديد

و بسم الله

واطلع جرب


2 - البنزين ال ( 90 ) اللى هو ( 87 ) بره

هنسيب الفيشه زى ما هى ( لو جايه مكتوب عليها 87 زى اغلب عربياتنا )

اما لو مش مكتوب عليها 87

يبقى هنوصل الطرف الأرضى ( الأوسط ) بالطرف البنى ( الطرفانى ) كما بالصوره




تمام كده

هنرجع الجامبر للفيشه تانى

ونرجعه مكانه ونغطيه بالموكيت

ونوصل كابل البطاريه السالب تانى

ونعمل ايدل ليرن علشان كومبيوتر العربيه يظبط نفسه على الوضع الجديد

و بسم الله

واطلع جرب


3 - البنزين ال ( 92 ) اللى هو ( 91 ) بره

المره دى هنشيل الفيشه

وبس

يعنى مش هنوصل اى حاجه

هنسيب الفيشه فى الهواء كده ونعين الجمبر فى البيت

زى كده



نرجع الفيشه مكانها ونغطيها بالموكيت

ونوصل كابل البطاريه السالب تانى

ونعمل ايدل ليرن علشان كومبيوتر العربيه يظبط نفسه على الوضع الجديد

و بسم الله

واطلع جرب


4 - البنزين ( 95 ) اللى هو ( 95 ) هنا

هنعيد خطوات الفك الاولى

هنمسك الجامبر فى ايدينا ونفك الكلبسين اللى فى اطرافه بالضغط للخارج بشويش ونرجع الغطا البلاستيك للخلف

وده شكله




هنجيب مسمار 3 سم وندخله مع الفيشه اللى فى الطرف بالضغط لجوه

بالشكل ده



وبعدين نشد المسمار والسلك لبره

هيطلع السلك معانا

هندخله تانى بس الناحيه التانيه يعنى هننقله من الطرف ده الى الطرف ده مع الحفاظ على الطرف الاوسط متوصل زى ما هو

وده شكله الجديد




تمام كده

هنرجع الجامبر للفيشه تانى

وده شكله النهائى





نرجعه مكانه ونغطيه بالموكيت

ونوصل كابل البطاريه السالب تانى

ونعمل ايدل ليرن علشان كومبيوتر العربيه يظبط نفسه على الوضع الجديد

و بسم الله

واطلع جرب

توصيلة البنزين ال 95 الأخيره انا موصلها فى عربيتى وبمون بنزين 92

والنتيجه خرافيه فى الآداء والأستهلاك

لأننا ببساطه بنبقى مقدمين شرارة الأشتعال سنه صغيره ودى بتخلى العربيه احمى فى الجرى واسرع فى الأستجابه مع التسارع المفاجئ

بالتجربه ( من 0 الى 100 ) فى 12 ثانيه و اقصى سرعه بدون مشكله ( 180 )


انا عن نفسى جربت كل التوصيلات دى فى عربيتى قبل ما اقولكم عليها

وان شاء الله مفيش منها اى ضرر

وده للأمانه



بالنسبه لموضوع الأيدل ليرن اللى المفروض نعمله بعد كل ظبطه للفيشه وكمان بعد كل شغل فى الموتور اى كان ( لأنه بيخلى الكومبيوتر ياخد قراية الحساسات كلها من اول وجديد ويخزنها فى ذاكرته المؤقته ويظبط بلف الأيدل لتنظيم وثبات سرعة دوران المحرك فى وضع الثبات ( السلانسيه ) مع وبدون احمال ( تكييف و إضائه )

دى صوره لطريقته



ودى الطريقه بكل بساطه

والعربيه بارده

1 هنفك الكابل السالب من البطاريه لمدة 3 دقايق

2 هنوصله تانى

3 هنفتح الكونتاك لمده 5 ثوانى ونقفله لمدة 5 ثوانى 3 مرات متتاليه ( عشان الكومبيوتر يفهم اننا عايزين نعمل ايدل ليرن )

4 هندور العربيه لمدة 3 قايق من غير اى احمال ( نور , تكييف , طقم صوت )

5 بعد مرور ال3 دقايق هنفتح كل الأحمال ( التكييف على اعلى سرعه , النور العالى , الشبوره , سخانات الزجاج لو موجوده , طقم الصوت لو موجود ) لدة 2 دقيقه

6 بعد مرور 5 دقايق ( 3 + 2 ) هنطفى كل الأحمال ونطفى الموتور

وبكده نبقى عملنا الأيدل ليرن



المهم الموضوع كده خلص




ارجو ان تتذكرونى بصالح دعائكم

( بالشفاء لى ولزوجتى ولاولادى وبالستر وسعة الرزق )

اخوكم عصام غنايم

سلام مؤقت