حضرتك التخطي من الشمال و ليس اليمين

**Samir Elshahawy** · 24-05-2010 10:21 AM

صبحنا و صبح الملك لله

ياماشيين يكفيكوا شر المتخطيين

ماشي الصبح في حالي ورايح شغلي و ماسك أقصي اليمين و بدأت أهدي علشان في مطب صناعي قبل الملف اليمين و أديت أشارة يمين

عربية فيرنا ورايا تقودها سيدة يبدوا من شكلها أنها محترمة في الاربعينات و هي كمان ادت أشارة يمين و لكن ...
ايديها الاثنين و يمكن كمان رجليها علي الكلاكس مش عارف هي عايزة ايه

المهم لفيت يمين و أذا بيها ورايا و مصممة تدخل من بيني و بين الرصيف اللي علي يميني و انا لسه سايب الاشارة اليمين شغالة يبقي المفروض هي تعمل أيه ؟؟

المهم اخر مازهقت شغلت الانتظار ووقفت و أذا بيها تقف علي بعد مليمترات من أكصطدام سيارتي بعد أن سمعت صوت فرملة قوية هزت الشارع كله

طبعا نزلت من عربيتي بمنتهي الهدوء و توجهت أليها و دار بيننا هذا الحديث :

* هي : ايه ده حد يقف كده ؟؟ مش تفتح علي الصبح ؟

.... أنا : نعم !!!! حضرتك انا اديت أشارة يمين من قبل الملف و سيادتك لازقة فيا و بعدين فضلت عاطي لك أشارة يمين علشان تفهمي أني ماسك اليمين و لو عايزة تعدي الشمال كله مفتوح قدامك و بعدين أديت انتظار ووقفت

* هي : و حد برضه يمشي في اليمين ؟؟ أنت مش شايف أني عايزة أعدي من اليمين ؟؟ و لا أيه لازمتها المرايات اللي عندك دي ؟؟

.... أنا : أنا اسف جدا يا أفندم حضرتك شايفة أني لابس رقبة و مش بأقدر أبص في المرايات
بس هو حضرتك فيه معلومة ماحدش قالك عليها و أنتي بتطلعي الرخصة فحبيت أقولها لك و هي ان التخطي من الشمال مش من اليمين و اليمين ده للسير البطئ

* هي : نعم حضرتك فاضي و بتهزر علي الصبح

.... أنا : لأ حضرتك ده مش هزار دي أبسط قواعد المرور

* هي : طيب ياسيدي متشكرين علي المعلومة الهايلة دي و منكم نستفيد , ممكن بقي توسع علشان انا أتأخرت و لا الدرس ماخلصش لسه ؟؟

.... أنا : أيوه لسه فيه حاجة كمان تبقي تسيبي مسافة بينك و بين اللي قدامك و أسف علي أني عطلت حضرتك

طبعا هي رجعت لورا بأقصي سرعة و من غير ماتبص في المرايات و بأفكر حضراتكوا أننا كنا واقفين بعد الملف بحوالي 10 متر فطبعا كانت هاتلبس في عربية جيتا بتلف يمين و من غير ماتبص علي اللي وراها طلعت علي طول و عملت حركة امريكاني و هي بتبص لي شذرا

طبعا مشيت علي الصبح و انا مش عارف أبقي زعلان و لا أضحك فعلا شر البلية مايضحك
للدرجة دي انعدمت لدينا أبسط قواعد الذوق و المعرفة

مع خالص تحياتي
سمير الشهاوي

**Karim_Mohy** · 24-05-2010 10:27 AM

لا تضحك ....وفعلا شر البلية ما يضحك

واعتبرها يا سيدي في مقام اختك والدتك...........كبر الجمجمة......الشارع بقي فيه بلاوووي

**Hussein_Emara** · 24-05-2010 10:46 AM

احيي حضرتك على إيجابيتك و صبرك.

**zyadahmed** · 24-05-2010 11:00 AM

فى قاعدة مرورية فى مصر بتقول leadys first
وفى قاعدة تانية بتقول الست لو عايزة تعدى من الشمال وسع لها فى الحال ......
ولو عايزة تعدى من اليمين وسع لها حبتين ....
ولو خايف على الاكصدام ابعد مترين للامام .......
ولو خايف بقى على العربية اركن لو شوفت ست معدية

ههههههههههههه
روق يا باشا مش مستهلة احنا ياما شوفنا منهن فى البيت وبره البيت
ربنا يخليهن ويبارك فيهن

**hobaz** · 24-05-2010 11:05 AM

طيب كل اللي قولتوه ده تمام لكن تعملو ايه لما تلاقي نفسك في طريق سريع عبارة عن حارتين وفي واحد دماغة عالية ماشي بتريلا على الشمال والدنيا كلها فاضية.....؟!؟!؟!

**dolly13** · 24-05-2010 11:09 AM

leadys
لزم التنويه انها lady
وفى الجمع ladies

**kh_talaat** · 24-05-2010 11:11 AM

فعلا شر البلية ما يضحك

خصوصا لما يكون الخطأ في ابسط قواعد المرور والسائق معندوش فكرة عنها تماما وبيسوق من سنوات طويلة

وللأسف المشكلة جماعية ومحتاجة حملة شعبية بالتعاون مع الحكومة والمنظمات الأهلية لتعليم ابسط قواعد المرور في مصر

وبالمناسبة انا اول واحد هشترك

**mhamed70** · 24-05-2010 11:14 AM

الحلوة الي ذي دي أنا بوقفها في الأشارة وأنده الأمين يظبطها لعدم أنضباطها وأحترامها لتعليمات المرور - وطبعآ بتبقى صيدة ذي الفل للأمن والمتانة ومراجعة الرخص والملصقات - وح صلت معايا على الكورنيش وتم أبلاغ العمليات عن رقمها أبيزا حمراء رقم 640929 لسه فاكر رقمها