الموضوع: نصيحه لكل اخواتي الي هيجيبو عربيه زيرو او جابو ولسه مارخصوش

انا اول ما اشتريت عربيتى خليتهم شالوا الورق من قبل ما امشى من المعرض ، اولا مهمته انتهت لما استلمت العربية ، تانى حاجة الناس عندنا نفسيتها جميلة جدا ، أول ما تلاقى عربية فى الشارع ماشية بورقها عليها تلاقى الكل عمال يكسر و يغلس عليها ، زى ما يكون نية غلاسة و غل ان ما دام راكب عربية جديدة لازم يكسروا فرحته بيها بحكة او خربوش او خبطة حتى ... مافيش مانع ...
و دى بنشوفها كتير فعلا ..

تانى حاجة الناس عندها قناعة ان اللى بيشترى عربية غالية (أو رخيصة حتى) مادامت زيرو يبقى معاه فلوس بالهبل ، مش واحد حوش قرشين و دفعهم او استلف او عمل جمعية او قرض أو قسط يكمل بيه تمن العربية ... لأ ... ده اكيد مريش ... و بالتالى واجب يرش من خيرات الله على الناس .. الله .. هو مش جاب العربية بالشئ الفلانى ..؟؟؟ جت على الكام ملطوش اللى هايخدوهم فريق "الف مبروك يا باشا" و"كل سنة و انت طيب يا باشا" ؟؟؟

دول يا دوب عايزين خمسين ، مية ، ميتين ، عشرومية جنيه (قيمة متزايدة مع ثمن العربية) نظير شاى و حلاوة العربية الجديدة ... و بعدين يا بخيل يا جلدة ... تبقى صارف الفلوس دى كلها على حديد و كاوتش و تستخسر القرشين دول فى الغلابة اللى ماعملوش حاجة ...(قال يعنى بيعملوا ، هم كده كده واكلين ، و لو عملوا شغل يبقى لازم يلهطوا .. مش ياكلوا) ... ادفع بالتى هى احسن..

اما حكاية الغل فى شيل الورق ... ففكرتنى بحاجة شفتها من ييجى 20 - 25 سنة ... كنت نازل من السفر و فى المطار مستنى شنطتى على السير ، فلقيت واحد من العمل شاف شنط متكركبة فوق بعضها ، و راح ناطط على السير و راح ناحيتها ... انا فاكر انه هايعدلها باسلوب آدمى ... لقيته عمال يدى الشنط بالشلاليت ... و فجأة جرى خطوتين فوق السير المتحرك بتاع الشنط و وقف عند كرتونتين متلزق عليهم من كل ناحية علامات "قابل للكسر" و بكل اللغات و الرسوم التوضيحية ... و فوجئت بيه بيرفع الكرتونة الأولى و بيطوحها بره السير على الأرض و بيرفع التانية ... انا كنت هاتجنن ... اى نعم مش بتوعى لكن تخيلت ان حاجتى بيتعمل فيها كده (و كنت فعلا جايب كومبيوتر و لازق عليه نفس الأستيكر بتاع قابل للكسر) ... جريت عليه و هو بيشيل الكرتونة التانية و قلت له "حاسب .. دى عليها علامة.." و لقيته بيقاطعنى و بيكمل "قابل للكسر ... ايوه عارف ... هو صاحبها مش لو خايف على حاجته كان خلاها فى ايده بدل بطن الطيارة .. و بعدين دى ناس معاها فلوس و مش فارق معاها ... الدور و الباقى على الغلابة اللى زينا" ...

ده موقف من زمان و اعتقد ان مازالت النفسيات كما هى ..

و بدون تعليق ..

و تحياتى