الموضوع: منتهى الغباء البشري

المشاركة الأصلية كتبت بواسطة a7med_pharma

فاكرين رسالة الشيخ أحمد (حامل مفاتيح الحرم المكي)

النهاردة دخل عليا واحد الصيدلية ..وإداني الورقة المعروفة بتاعت الشيخ أحمد لما راحت عليه نومة
وهوباااااااااااااااااا
الرسول جاله في المنام ..وقاله إن الفساد ظهر ..ومش عارف الستات بقوا بيعملوا ايه ..وإن الرسام الدانماركي مات غرقان..وهوا بيغرق إتحرق ..وهوا بيتحرق وقع عليه بيانو من طيارة كانت معدية بالصدفة من فوق المحيط الأطلسي..أصل الكمسري بتاع الطيارة نسي يققل الباب كويس
المهم
لازم تنشر الرسالة ..على الأقل 50 نسخة(مطبوعة)
وإن واحد (ابن ^%^#$^$@) رمالها وقال انها اشتغالات ...مات بعد 9 أياااااااااااام

فأنا قولت بقا
أجيبها ليكم هنا ..وطبعا محدش فيكم هينشرها
يعني كلكم هتموتوا ..وأفضل لوحدي في المنتدى بقا وأهيص
وأبقى المشرف العام ..والمنسق العام كمان
وأعمل إلي أنا عاوزه

حاجة تقرف
كل يومين الرسايل دي بتلف..على النت ..وفي الشارع والمحلات
انا مش متخيل إن عقووووووول الناس مش مستوعبة الهبل ده

أنا عارف إنه موضوع قديم ...بس حاجة تجيب الحرحر

مره استضافوا شيخ في التليفزيون وسالوه عن الحاجات دي وعن الموضوع ده بالذات
فقال يعني هو الرسول عليه الصلاه والسلام نسي حاجه في رسالته مثلا وبيبلغ الشخص ده انه يكمل الرساله
انتشار الموضوع ده بيعلن جهلنا بديننا
وبيخلينا ننشر الضلاله بين الناس واحنا فرحانين ومستنيين اجرها
اسلامنا مش مستني رضيع ينطق شهاده
ولا عجل يقول الله
ولا شجر يكتب كلام
ولا سمك مطبوع الناس بتصطاده
المنتديات العلمانيه بتطلع الاشاعات والضلالات دي
والناس من عينه اللي بيروحوا يتمسحوا في السيده ويكنسوا الحسين ويتشفعوا لابو العباس بيصدقوها
والناس بتنشر وتصقف
وانا قاعد معاك يا فارما
انا اصلا بمسح الحاجات دي من ايميلي ومش ببعتها حتي لو كانت فيها جزء صحيح