اوبل من الصعيد الجوانى الحلقة الثانية

**emadelnagy** · 25-05-2010 02:00 AM

السلام عليكم ورحمة الله وبركاته على اروع منتديات نايل موتورز ......الاوبلاية الغاليين عليا واخص بسلامى الحار طنانى باشا والدكتور هلالى وتامر باشا والباشمهندس احمد وجميع احبابى فى المنتدى الاوبلاوى
واشكركم جميعا على مشاركتكم لى بالنصائح الغالية والتى افادنتى كثيرا
وكنت قد قمت بعمل تغيير شامل لسيارتى كالتالى
تغيير فرش صالون الابواب + شراء 2 مرايا للابواب كهرباء + دوكو فرن+ فرش صالون كامل جلد
اما بالنسبة للموتور فحدث ولا حرج عن القوة الجبارة لل2000 c.c وثبات العربية لسه محتاج يتظبط مع العفشة انشاء الله عند نزولى للقاهرة

بس خسارة الحلو مايكملش ....اليومين اللى فاتوا اللى كان يحصل معايا انى اشغل التكييف ومع االسرعات العالية خارج المدينة مافيش اى مشكلة مع السخونة
بس داخل المدينة على السرعات المنخفضة 20-60 او خلال التوقف لدقائق مع استمرار تشغيل التكييف فوجئت بارتفاع درجة الحرارة الى مستوى ال100
المهم افتى لى احد الميكانيكية بان لامشكلة فى المراوح بل ان المشكلة فى تسييخ الراديتير
ماشى وماله.......نسيخ الراديتير
وقمت بتسييخ الراديتير عند احد الاخصائيين اللى بيقولوا عليهم صنايعى فاهم
وقال لى بعد اتمام عملية التسييخ امامى
ياباشمهندس راديتيرك مافهوش صدا لكن فيه تنديع ميه بسيط عند الزور فانا حالحموا وربنا يسهلها ويبقى تمام
الشهادة لله قربة المية مابتنقصش من ساعة ما عمله .......بس نفس موضوع السخونة مازال موجود
وفيه ناس اصحابى قالولى ده تظبيط تاكيهات وناس تقولى لا دى الكاتينة مأخرة
وبالاضافة لكده واللى زاد وغطى ان العربية بتفتف ومخنوقة فى سحبها وإستهلاكها للصفيحة داخل المدينة 140 ك
قالولى الأسبوع اللى فات ده حساس الماف غيره والدنيا حتظبط
والغريب ان ده مابيحصلش الأ لما أشغل التكييف
فارجو النجدة يارجال الأوبلاوية ومستنى ردودكم

**thug** · 25-05-2010 04:58 AM

حسب كلام الأعضاء ان 100 درجه متألقش

**nab!l** · 25-05-2010 08:44 AM

لاء
يقلق
بس استنى ملاك فيكترا a

**Ahmed_lol2007** · 25-05-2010 01:19 PM

لا ياباشا 100 درجة كتير طبعا وبعدين التكييف المفروض إنه بيساعد زيادة سرعة التبريد
عموما نستنى طنانى والدكتور هما أدرى بالفيكترا a

**ENG\AHMED** · 25-05-2010 02:15 PM

المروحتين بيشتغلوا مع التكييف؟؟

المروحة اللى ورا الاكصدام شغالة طول مالتكييف شغال ولا بتفصل وتشتغل؟

ثرموستات الكوعة اية نظامة... لما العربية بتسخن بيبقى الرادياتير سخن ولا بارد والمراوح شغالة ؟؟

**emadelnagy** · 25-05-2010 06:21 PM

ايوة المروحتين شغالين بس السخونة هي هي وعلى العموم ان متشكر على تعبكم ونستنى رأى أسود الأوبل a طنانى باشا والدكتور هلالى وربن يخليكم لينا

**tananybasha** · 25-05-2010 11:01 PM

غطا القربة وحش
ده الحل بمنتهى البساطه
طالما كانت كويسه هى مش هتتهبل مره واحد
و بص بصه شوف طرمبة المية معرقة ولا فى التمام

**cayman69300** · 26-05-2010 10:08 AM

المشاركة الأصلية كتبت بواسطة emadelnagy

يا طنانى باشا متشكر على إهتمامك بس غطا القربة لو نوعية وحشة كانت الميه نقصت كتير وانا اسف لو كنت باتعبك بأسألتى
بس لو طرمبة المية معرقة هل ده يسبب الحرارة العالية دى؟
ولك منى جزيل الشكر والأحترام

السلام عليكم يا رجالة
الراى دة صح جدا .............. و فعلا انا عما اقرى الكلام دةمش عايز ادخل تجاربى الشخصية فى الحكايةعلشان مبقاش منحاز لتشخيص غلط
الدورة كويسة جدا و دةباين ان المية مش بتنقص ( نستبعد الاتى غطا القربة - الردياتير - الخراطيم - الكوليهات - الطرمبة الخاة بالمية )
امال المية بتسخن لية ؟
يبقى احتمال كبير يكون حاجة فى سريان الدورة ( السرعة )
و اللى بيقلل السرعة و يخلى الميةتلحق تبرد هى الترموستات بتاعة المية
فك الكوعة اللى عندك و بص عليها
لو موجودة بص و ركز اوى لتكون مملحة او تقيلة
والاحسن انك تغييرها
التاكيهات احتمال بعيد اوى لانها على كستبانات و مش زى الشاكوش فنادرا لما تحتاج تظبيط
برضوا ممكن مجارى سريان المية ضيقة ( يعنى زى تراكم الكوليسترول جوا الشرايين ) و دى حلها لما تفك الكوعة وانت بتكشف عليها اغسل الدورة بتاعة المية تحت ضغط عالى و بعدين حط مية خضرا يكون نوع نضيف و شوف لون المية النازلة و لون المية بعد وضع المية الخضرا و دة هيبين كمية الصدا الموجودة
الحاجة التانيةحساس الماف بيبرجل العربية على طول مش مع التكيف بس
دة احتمال نضافة فى الايديال و الماف و بوابة الانجكشن
الحاجة التالتة البنزبن العالى
لو مع التكييف يبقى اقعد ساكت لان العربية غول استهلاك مع التكييف
لو من غير تكييف هات حساس كولانت جديد من مصدر موثوق و ركبة و شوف الاخبار ( تمنة 65 جنية )
و طمنا بالاخبار

**tananybasha** · 26-05-2010 03:32 PM

مين اللى قال لو الغطا بايظ المية تنقص
ده لو مشروخ بس
انما لو مكتوم و مش بينفس ضغط الهوا الزياده اللى فى الدورة يسخن العربية
و دى عن تجارب كتير مع ناس كتير
الطرمبة لما تعرق ضغط ميتها يضعف و تضعف عزم التبريد
انا قلت اللى عندى و جربة مش هتخسر حاجة