عايز أجيب طارة وعصاية فتيس مومو أصلي

**Jato.33** · 25-05-2010 11:43 AM

سلام عليكوا يا رجالة

أنا كنت ناوي أجيب طارة وعصاية فتيس مومو أصلي وروحت لأرابكم لاقيتهم غاليين أوي بس ده من فترة كانت الطارة بتبدأ من 750 جنية وعصاية الفتيس بتبدأ من 350 جنية
فكرت في أيمن مومو بالفعل الراجل قالي إنه ممكن يظبطني ولكن للأسف مبيردش على التليفون ومطنشني وأنا مش هروح بورسعيد مخصوص لحمادة غزي عشان الموضوع ده
فكرت أجيبهم من على النت وبالفعل عملت الكارت بتاع الإنترنت بس عايز أعرف الأول إن الدنيا هنا مقفولة قبل ما أتجه للنت
لو حد يعرف مكان ممكن أجيب منه تاني يفيدني ويكون سعره معقول مش لازم يكسب 400 % يقول يكون خدمني

**fakoussa** · 25-05-2010 11:50 AM

روح بورسعيد احسن . ممكن طبعا حمادة غزى - و رزق ديزاين دا جنبه برضه و ممكن تنزل بنك الاسكان عند بتوع قطع الغيار الاستيراد هتلاقى حاجت لقطة . الطارة من 100 جنيه

**Jato.33** · 25-05-2010 11:55 AM

لو طبعاً البدائل في بورسعيد كتير أنا ممكن أروح مخصوص عشان الموضوع ده أنا بس مكونتش أعرف هناك حد ممكن يكون عنده غير حمادة غزي وبصراحة مرة سألت هناك على كاسيت وسماعات لاقيتهم تقريباً في سعر القاهرة فخايف أروح هناك وبعدين أتسك في الحاجة أو الأسعار
بس ممكن أروح وألف على كام واحد كده وربنا يكرمني بإذن الله وألاقي حاجة كويسة بسعر معقول

**haysam2000** · 25-05-2010 02:51 PM

الأسعار فى بورسعيد هى هى عندنا فى اسكندريه او فى القاهرة انسى ان يكون فرق سعر بس ممكن تلاقى اشكال احسن انا سافرت و قعدت تلات ايام الف على حاجات مش لاقيت واللى لاقيته باسعار زى هنا هات من النت احسن

**lody4verna** · 26-05-2010 10:14 AM

بص يا صديقى
اولا حوار بورسعيد فاكس اخر حاجة لو هتفكر تجيب حاجة جديدة , حلو لو هتجيب حاجة استيراد
ثانيا هتلك حاجة مضروبة ووفر الفلوس هو فى الاخر شكل مش اكتر
انا مركب طارة ب150 جنية
ومركب مقبض فتيس مومو اصلى (850 جنية ) بس وخدوا اعارة من واحد صحبى كان مشترية من زمااااااااان اوى
بس منحوت علية كلمة مومو ايطالى
بس نصيحة تفكك وهات المضروب ارخص وشكلو حلو
وبقية الفلوس تجبلك حاجة ترفع اداء العربية

**lody4verna** · 26-05-2010 10:15 AM

نسيت اقولك انا طبعا مش دافع فلوس المقبض دة شحاتة لحد ما صحبى يجيب عربية تانى

**Jato.33** · 26-05-2010 10:30 AM

يا جماعة الحاجة الأصلي أنضف وأقيم وأريح وألذ وكل حاجة حلوة
أنا كتير شوفت حاجات مش ماركات لكن محدش يقولي إنها نفس الشكل !!!
الشكل بيبقى مختلف أكيد :b4_007:
وبعدين حتى الحجم نفسه وخامتها لازم يا جماعة تحسوا أد إيه الحاجة الأصلية بتبقى مختلفة أنا ممكن أعمل جمعية وأصبر شهور عشان أجيب حاجة أصلي بس برده مفيش مانع الواحد ياخد بالأسباب ويدور لو أنا وفرت 100 جنية العربية أولى بيهم متشكرين يا رجالة على ردكوا ومجهودكوا وإن شاء الله لما هجيبها هقولكوا منين وبكام