الموضوع: شفت بعينى محدش قالى !!!!!

اولا : ايه اخبار الوحوش جميعا معلش انا مقصر شويه فى المشاركات بس انا وقتى ضايع ضايع ياولدى يا اما فى الشغل او سايق او نايم ولو دخلت المنتدى بقرا بس كده على السريع واطلع تانى

وانا رايح ماموريه كده على الماشى ( فى البحر الاحمر ) وقبل محافظه البحر الاحمر عدى جنبى واحد بميجان بانوراما طاير انا كنت ماشى 100 ( العبد لله ممكن يكون اكتر واحد فى مصر بيلتزم بقوانين المرور ) المهم حب ياخد غرزه على السرعه دى بين لادا وعربيه تانيه

وتقديره مكنش مظبوط واللادا قفل عليه وخبطه فى الرفف اللى ورا بقوه وعلى السرعه دى خبطه زى دى تضيع اكبر توازن

المهم الادا لف نص لفه وهوب فى الميجان والميجان مش عايز اقول قعد يتشقلب قد ايه وطلع بره السكه وكمان اللادا طلع بره ودخل فى يافطه كده حديد

وقفت وكان واحد ورايا معاه ناس فى تويوتا مشروع وقف وطلعنا نجرى على الميجان بحكم المنظر المروع اللى شفناه

اول حاجه رحنا لصاحب الميجان لقيناه فتح الباب والعربيه مقلوبه وطلع انا مش عارف ازاى !!!! انا قولت الراجل دا بقا كفته واللى يجن اكتر ان العربيه مش متخرشمه يعنى كام خربوش تقيل شويه على كام حته معوجه والرفرف اللى ورا طار بس سليم !!! وطبعا كان فى دخان طالع من العربيه وزيت متسرب وكدا

بقول لصاحب الميجان انت سليم مردش اخدته من ايده علشان يقف وقف عادى بس كان مخضوض من اللى حصل هوا كان متعور فى ايده كده حاجه بتاعت غرزتين !!!

شربناه ميه واكنه مكنش مصدق انه طلع من العربيه

نروح بقا بالكاميرا للعربيه اللادا طبعا وش العربيه من قدام بقا كفته والباب مش بيفتح طلعت اجرى على عربيتى معايا جرندر صغير كده اضطريت انشر حته من الرفرف الامامى كانت زانقه على الباب ومحدش حاول يطلع الراجل من الزجاج لانه كان تعبان ومتبهدل جامد وخفنا لنرفعه غلط يحصل مضاعفات لو حاجه مكسور فيه او حاجه

الاسعاف جت واحنا لسه بنطلع فيه وخدوه على طول والمثير للدهشه انا بتاع الميجان كان بيساعد معانا ومرديش يروح مع الاسعاف على اساس انه مفهوش حاجه وخلاهم يروحوا بالراجل التانى الاول بس هما ربطوله ايده كده علشان كان متعور

بعد ما فاق كده من تاثير الصدمه بقوله انت تحمد ربنا اولا انه نجاك ووفقك انك تركب العربيه دى ابتسم وقالى قال وانا اللى كنت عايز ابيعها العربيه دى ماتتبعش

رحنا بصينا عليها تحس ان مفهاش حاجه جمدا جبنا حبل وعدلنا العربيه ( ربطتها من فوق وجبتها على جنبها وبعدين على العجل طبعا شديتها بعربيتى اللوجان )

الكوميديا بقا انه دخل قعد فيها مستنى حد هوا كلمه حايجى يقطرها لا واللى جننى ان الكاسيت والتكييف شغال عادى بس طبعا العربيه ماداريتش

اطمنت عليه وقولتله متخفش بسيطه مش حتتكلف كتير شويه بويه على سمكره ولو حتغير الرفرف اللى ورا والميكانيكا روح التوكيل وبنظره سريعه ملقتش اى تلف كسر او شرخ ظاهرى بس طبعا محتاج يشيك بالكمبيوتر وكان رده ان شالله لو حتتكلف تمنها كفايه ان انا سليم وكان عنده حق

حبيت انقلكم حادثه وقعت قدامى واللى ضايقنى انى مع الاحداث نسيت اصور حاجه مكنش حد حيصدق ان العربيه دى اتشقلبت بتاع 5 مرات

فعلا الحافظ هو الله والميجان مجرد سبب

والايرباجز فتحت طبعا

ومشكور سياده العقيد خالد على الاضافه انا مكنتش قريت موضوع الاخ رامى قبل كده


وان شاء الله عربيتى القادمه ستكون ميجان مع انى اكن كل الحب لحماله الاسيه لوجان والله لو احكيلكم اللى بعمله فيها محدش حيصدق

وعامه انا مش راكب غير رينو حتى لو قالوا ايه العمر مش بعزقه