الموضوع: تحذير من الذهاب الى بريدجستون فرع طنطا

بسم الله الرحمن الرحيم ...
الى هقوله دلوقت ده والله العظيم هو الى حصل بالظبط و الله على ما اقول شهيد ...
و بما اننا فى منتدى مع بعض عشان نفيد بعض ..
لازم اقول و انصح الناس ..
و الموضوع كالاتى:
من حوالى 3 شهور روحت مركز بريدجستون فى طنطا اشتريت 4 فرد كاوتش للاوكتافيا ...
تم تركيب فرده منهم و حطيتها استبن ..
و ال 3 التانيين حطيتهم عندى ..
امبارح روحت عشان اركب الكاوتش كله فى العربيه ...
تم تركيب الكاوتش و الترصيص ..(مجانا) و كل شىء تمام من ناحيه المعامله ...
و المهندس ايمن الى هناك ادالى كتاب كده فيه شرح لكيفيه استخدام الكاوتش عموما و الحفاظ عليه و الحقيقه مفيد جدا ...
المهم قلت للمهندس ايمن ..
عاوز اظبط زوايا ..
قالى ليه ؟؟
قلتله العربيه مش مستقره اوى فوق ال140 او 150
قالى يبقى نظبط زوايا ...و كمان المهندس فى التوكيل كان قايلى ان العجله الى ورا شمال مش مظبوطه و محتاجه ظبط زوايا ...
و كمان قلتله ان فى عوجه خفيفه اووووووووووووووووووى يمين فى التاره ..
دخلت العربيه على جهاز الزوايا ...
الفنى (محمد)
اشتغل فيها و خلاص قالى كده تمام ..
و هو نازل بالعربيه خبط المصفحه الى تحت الموتور(فيبر) فى جزء حديد كان تحت العربيه (عشان يرفعها بيه)..
و صوت الخبط كان عالى و مع ابتسامه سخبفه منه لا تدل الا على الغباء ..
قالى متخفش ..
قلت ماشى ..
طلعت اجرب ..
حدفه يمين مرعببببه !!!
و عوجه شمال فى التاره جامده جدا جدا ...
رجعت ..
قالى مستحيل تحدف ..
و مرضاش يركب يجرب ...
المهم بعد لعب فى العربيه على جهاز الزوايا و تجارب لاكتر من 5 مرات ( و خبط المصفحه 3 مرات فى نفس المكان)
كانت النتيجه بتختلف من حدفه يمين لحدفه شمال ...
و هكذا ...
و فى الاخر لقيته بيقولى اصل القنطره معووجه ...
قلتله معووجه ازاى ما هى كانت ماشيه من غير ما تحدف ...؟؟
قالى القنطره بتحدفها يمين و العجل الى ورا بيحدفها شمال ..
فكانت بتمشى مظبوط !!!
قلتله يعنى دى نطلق عليها لقب اتفاقيه الحدف المعتدل ؟؟
العجل بيقسم مع بعضه عشان يظبط الاتجاه ؟؟
يا عم انت فاكرنى هندى ولا جاى معلق الزمزميه فى صدرى و شنطه المدرسه على ضهرى ؟؟
برده قعد يجرب مفيش فايده ..
قلتله طيب رجع الزوايا زى ما كانت بالظبط ..
معرفش يرجعها تانى !!
جه المهندس ايمن يديلى فلوس الزوايا (25 جنيه) و بيقولى اعملها فى التوكيل احنا جيبنا اخرنا ...
قلتله رجعولى العربيه زى ما كانت ..
برده حاولو فيها معرفوش ...
ملحوظات:
1-المصفحه الى تحت الموتور فيها جزء اتكسر و مسمارين و قعو و الفنى بيقولو لا دى كانت كده !!!و لو مش مصدق دور على المسمارين الى وقعو على الارض هنا مش هتلاقيهم !!
2-العربيه داخله مش بتحدف طلعت بتحدف شمال جامد جدا و التاره معووجه اوى اكتر من الاول
3-الفنى الى هناك كداب و مش بيفهم اى حاجه ..لان لما هى القنطره معووجه اشتغل فيها من الاول ليه ؟؟
و ليه معرفش يرجع العربيه زى ما كانت ؟؟
و ليه معرفش يعدل التاره ؟؟
4-عليت صوتى على الفنى و لكن لم اتلفظ بأى لفظ غير لائق احتراما للمهندس ايمن لانه فعلا محترم
5-العربيه النهارده اتظبطت عند مركز فى المنصوره و جهاز الزوايا بتاعه مش كمبيوتر !!! و الزوايا بتاعها كانت بايظه و مفيش لا حدفه ولا عوجه حاليا
6-اخر مره فى حياتى اتعامل مع بيرجستون
7-لا انصح اى حد بالتوجه ليه
8-مستعد لاى استفسارات او مناقشات