معقوله الدايو تجيب كبالن بعد 30 الف كيلو؟

**SkyBird** · 26-05-2010 02:02 AM

زميل لي في العمل معاه دايو شيفروليه مو 97 اشتراها زيرو ولما كلمتو عن المنتدى الرائع ده وخصوصا ان عمالقة المنتدى موجودين في هذا القسم المحظوظ ...سمير عياد ومحمد ممدوح وابوفارس و...و...
هو طلب مني ان اعرض مشكلته عليكم
هو خبرة في العربيات لمده تزيد عن 20 سنه واشترى الدايو زيرو ومشي بيها 30 الف كيلو وبيقول ان معظم سواقته على طرق مستقيمه من المنصورة لشمال سيناء والطرق عندنا ممتازة وهو حريص انو ما يخدش ملفات جامده واستعماله استعمال طبيب لان هو طبيب كمان لدرجة ان الكياس البلاستيك لازالت موجوده على الفرش
من كام اسبوع سمع صوت طقطقه متكرره وهو ماشي بالعربية من ناحية الكوبلن اليمين وكان هيجنن ازاي العربية تجيب كوبلن بعد 30 الف كيلو والمشكلة زادت لما الصوت بقى ناحية الكوبلن الشمال برضو
هو يسأل حضراتكم
ايه رأيكم في الموضوع ده هل يمكن ان يكون كوبلن
انا قلت له ان ممكن يكون المشكله في الاتياش او بلي عجل لان انا مسمعتش الصوت بنفسي
قال مش عارف يحدد بالضبط
السؤال اللي هيجننه ان الكبالن ممكن تبوظ في الدايو بعد 30 الف كيلو؟
اجابة السؤال ده هتخليه يروح للميكانيكي وعنده نظرة واضحه للمشكلة

**احمد المصرى** · 26-05-2010 08:34 AM

اذاى دايو شيفروليه موديل 97 اكيد فى غلط مطبعى

المهم العيب دا كان عندى مشابه ليه وكنت هتجنن والعربيه عامله 10 الاف كيلو وبعد البحث لقيته جاى من البارات مش عارف المسمى العلمى بتاعها ايه بس الصنيعيه بيسموها بارات ودى حلها اما التغيير او انها تتزيت بزيته عند ميكانيكى

انا شخصيا زيتها والحمد لله الصوت اختفى

**mahmoudbadr** · 26-05-2010 01:01 PM

أولا لازم يتأكد إن الصوت (الطقطقة) من الكوبلن

من وضع الوقوف يكسر العجل للآخر و يطلع هيسمع صوت الطقة واضح لو الكوبلن

يعنى الصوت بيطلع مع كسر العجلة

و ممكن طبعا يبوظ الكوبلن و فى مسافة أقل من كدة لو كاوتشة الكوبلن إتقطعت لأى سبب

و طلع الشحم منه و دخل رمل و تراب داخل الكوبلن

علشان كدة لازم دوريا كل واحد يبص على كاوتش الكوبلن كل فترة ( شهر مثلا) بحيث لو إتقطعت تتغير فورا و يتحط شحم

...و على العموم الكوبلن جديد بيعمل من 150 - 200 حسب الصناعة

الصينى ب 100 تقريبا

**M.Zaher** · 26-05-2010 01:59 PM

ان شاء الله ماتكونش كوبلن
خليه يجرب يزيت البطاحات كده

**Yasser_Basiony** · 26-05-2010 02:18 PM

ممكن حدوث الصوت من الكوبلن في حالة تهالك الكاوتشة الحاميه له وعدم نغييرها ودخول التراب للكوبلن مما يتسبب في تلفه لذا يجب الكشف عليها باستمرار

**SkyBird** · 26-05-2010 08:49 PM

ذاى دايو شيفروليه موديل 97 اكيد فى غلط مطبعى

العربية موديل 2007 طبعا
انا اسف للخطأ ده

**SkyBird** · 26-05-2010 08:52 PM

كوتشه الكبالن سليمة
هنشوف موضوع البارات (الاتياش)
وتزييت البطاحات
وسأوافيكم بالنتيجه

**SkyBird** · 26-05-2010 08:54 PM

أولا لازم يتأكد إن الصوت (الطقطقة) من الكوبلن

من وضع الوقوف يكسر العجل للآخر و يطلع هيسمع صوت الطقة واضح لو الكوبلن

يعنى الصوت بيطلع مع كسر العجلة

و ممكن طبعا يبوظ الكوبلن و فى مسافة أقل من كدة لو كاوتشة الكوبلن إتقطعت لأى سبب

و طلع الشحم منه و دخل رمل و تراب داخل الكوبلن

كلام جميل
والصوت بيظهر برضو وهو ماشي ولا على الواقف بس ؟