الموضوع: عايز تعمل مشروع ؟ .... تعالى ندرسه مع بعض و نفكر فيه

المشاركة الأصلية كتبت بواسطة afterburner

انا مش عارف ايه الفرق (( فردية , شراكة , تضامنية , توصية , مساهمة ) اعتقد هتبقى فردية
بس هو هيبقى فيه معدات تقيلة زى كمبروسور هواء 10 بار ورمالات وكده ..
ولو حد عارف سعر المتر او اى معلومة ياريت يساعدنى..

الشركة الفردية دي شركة فرد واحد لوحده بدون شركاء

تضامنية : شراكة بين أكتر من فرد يكونوا متضامنين في حالة الخسارة و ممكن يكون واحد فيهم شريك مش متضامن و الباقي متضامنين , يعني لو الشركة خسرانة أكتر من رأس مالها الشريك المتضامن ملزم بتسديد الخسارة من أملاكه الخاصة عكس الشريك غير المتضامن بيخسر حصته في الشركة فقط

توصية : شراكة بين أفراد بعضهم متضامن و له قرار الادارة و البعض موصي يعني ليس له حق ادارة الشركة

مساهمة : شراكة بين أفراد أو هيئات و تكون الحصص حسب قيمة أسهم الشركة و بيكون في أعضاء مساهمين مؤسسين و مساهميين عاديين و المساهم صاحب أكير نسبة في رأس المال له حق الادارة من خلال مجلس ادارة و دول زي الشركات اللي بعضنا هيفلس بسببهم في البورصة المصرية

نبدأ في أول بنود دراسة الجدوى المبدئية :

حجم الطلب :
عشان نقدر نتوقع حجم الطلب على الطوب الطفلي في المناطق المستهدفة , لازم ندرس حركة العمران خلال ال 5 سنوات القادمة و ده نقدر نعمله من خلال مراجعة مركز أبحاث مواد البناء و من تقارير شركات المقاولات و خط الحكومة في التوسع العمراني . و من خلال متابعة كل الحاجات دي نقدر نقول ان في جميع المحافظات هناك توسع ضخم جدا في حركة العمران من خلال مشروعات ابني بيتك , و بيت العيلة , و اسكان مبارك , و كمان فيه حركة قوية جدا في انشاء المصانع ( خطة ال 1000 مصنع بتاعة مبارك ) و مش عايزين ننسى حركة العمران القوية في مختلف مراكز و مدن المحافظات ....
.
سوق السلعة :
الطوب الطفلي سلعة استراتيجية زيها زي رغيف العيش كده بالظبط لأن المعمار من الجالات شديدة الكثافة في العمالة و يعتمد على سوق المعمار أكثر من 90 حرفة من الحرف المهنية ... عشان كده الطوب و الأسمنت و الحديد من السلع الاستراتيجية ... طيب السوق هيكون مين ؟
خد عندك يا باشا :::
1- الحكومة ممثلة في قطاع المشروعات من شركات المقاولات العامة , و هيئة الأبنية التعليمية و غيرها كتير و طبعا دول لازم يتظبطوا ( مش حكومة ) ... ( يعني طوبة نمرة 2 )
2- المكاتب الإستشارية , و دول لازم يكون عندك في المصنع معمل و قسم للجودة عشان تقدر تطلع الطوبة بالمواصفات القياسية ( طوبة درجة أولى ) اللي هتعرضها على المكتب الاستشاري ( دول بقى قطاع خاص )
3- موزعين أهالي ممكن تتفق مع موزعين أسمنت و حديد يكونوا موزعين ليك أو تعمل شبكة توزيع خاصة بيك لو عندك امكانيات مادية . ( طوبة نمرة 2 برضه و هيكون مبسوط ) .
4- شركات المقاولات الخاصة متوسطة و صغيرة الحجم و دول كتير جدا بس هتديهم بالآجل مش كاش من خلال الموزعين بتوعك ( طوبة نمرة 1 بس بسعر أقل شوية من الاستشاريين ) .

كمان انت مش هتنتج نوع واحد و لا مقاس واحد من الطوب , لا لازم يكون عندك اكتر من مقاس و أكتر من مواصفة عشان نحقق النتشار النوعي لأن الزبون مش دايما ليه طلب واحد ما يغركش ان احنا بنعمل طوب يا باشا الطوب منه المصمت و منه المفرغ و منه العازل للحرارة و منه العازل للصوت و منه الملون ومنه الخاص بالحدائق ومنه الخاص بالديكور ومنه الخاص بالأفران و غيرها كتير جدا مما لا تتخيل وجوده من الطوب الطفلي و دول شوية امثلة عن استخدامات الطوب الطفلي من شركة انجليزية :
Export Brochure March 2008.pdf
Florentine Limestone reprint Apr2005.pdf
Commercial paving brochure May 2005.pdf
Classique reprint July 2008.pdf
Crossover Guide.pdf


هتقولي يا عم عمر احنا في مصر و ده عالم عربي و الناس تعبانة و انت بتقول عزل صوت و عزل حرارة و ديكور ده أنا طلعت روحي على ما حوشت قرشين أبني بيهم .. كلامك سليم طيب تعالى نشوف العالم العربي بيعمل طوب طفلي ازاي و ايه أشكاله و مواصفاته :

دي أكبر شركة مصرية لصناعة الطوب الطفلي ( موجودة في المنيا )
Egyptian Greek Brick
و همه حاليا بيعملوا تطوير و تحديث للخطوط عشان يدخل منتجات جديدة بس همه تركيزهم الأكبر على أوراسكوم للانشاءات عشان همه شركة تابعة لأواراسكوم

ودي شركة في السعودية اتفرج كده على الأنواع و المنتجات بتاعتهم عشان تعرف ان مصر متخلفة حتى في الطوب
Yamama Factories For Red Bricks and Clay Products.

وده كاتلوج من شركة تانية سعودية برضه
Al-Maimani3.pdf