عايز تعمل مشروع ؟ .... تعالى ندرسه مع بعض و نفكر فيه

**MaZaGAngeE** · 26-05-2010 06:39 PM

قريت موضوع زميل معانا في المنتدى بيسأل عن دراسات الجدوى للمشاريع , و ازاي تتعمل .
و ده شجعني أشارك معاكم شوية افكار و قرءات لبعض المشاريع اللي قمت بدراستها بناء على طلب بعض المستثمرين .

في الأول اعرفكم بنفسي : مهندس عمر الصاوي . و هاوي عمل دراسات مشروعات صناعية يمكن في يوم ربنا يقدرني و أنفذ مشروع منهم لنفسي , و لكن حاليا بنشرها للفايدة العامة .

أهم و أول خطوة في المشروع هيه فكرته ... يعني حضرتك عايز تعمل مشروع ايه ؟ و هل المشروع ده بناسب شخصيتك و خبراتك ؟ هتقدر تسوق المنتج بتاعك ( من خلال زياراتي لكثير من المدن الصناعية بحري و قبلي لقيت أفكار كتير ممتازة و مشروعات المفروض انها ناجحة جدا لكن المصنع مقفول و معروض للبيع عشان صاحبه بعد ما عمله مش عارف يبيع ) ؟

طيب هنجيب الفكرة منين ؟؟؟
فاكرين اعلان تنظيم الأسرة بتاع انظر حولك ؟
انت كمان انظر حولك ... بس مش على العيال , لأ على المنطقة اللي انت عايش فيها ايه الخامات المتوفرة و ممكن تستغلها ... ايه المشروعات الموجودة في أقرب منطقة صناعية ليك ؟ طيب شغالين و لا لأ ؟ اللي مش شغال واقف ليه ؟
مش دايما التسويق هوه السبب في توقف المشروعات ( 60% واقف بسبب التسويق ) لكن فيه أسباب تانية كتيرة خد عندك :
عدم وجود عمالة ماهرة
صعوبة توفير مكونات المنتج
مشاكل مع جهاز البيئة
مشاكل مع الضرائب
مشاكل مع المحافظة
مشاكل مع الجمارك

أنا مش عايزك يجيلك احباط .... انا بس عايزك تبقى عارف انت هتعمل ايه .. هتعمله ازاي .... ايه اللي ممكن يطلعلك من تحت رجليك و انت مش عامل حسابك ...........

**MaZaGAngeE** · 26-05-2010 06:47 PM

زي ما قلنا .... أول حاجة فكرة المشروع ..........

شوف انت خبراتك ايه و مؤهلاتك ايه و تعرف تعمل ايه .. و ده هيسهل عليك كتير في تحديد مجموعة أفكار لمشروعك ..

مثلا ::::
واحد مهندس زراعي ممكن يعمل ايه :
منحل , مشتل , مركز تقاوي , ....... و كده

واحد كيميائي ممكن يعمل ايه :
مصنع مبيدات , مصنع سماد , معمل تقطير , ....

مهندس ميكانيكا ممكن يعمل ايه :
مصنع معدات , مركز صيانة , .....

طبعا مش شرط انك تعمل مشروع في مجال دراستك او تخصصك بس ده هيسهل عليك كتير في دراسة المشروع و التفكير فيه .................

**Fouad Ezz** · 26-05-2010 07:03 PM

المشاركة الأصلية كتبت بواسطة mazagangee

زي ما قلنا .... أول حاجة فكرة المشروع ..........

شوف انت خبراتك ايه و مؤهلاتك ايه و تعرف تعمل ايه .. و ده هيسهل عليك كتير في تحديد مجموعة أفكار لمشروعك ..

مثلا ::::
واحد مهندس زراعي ممكن يعمل ايه :
منحل , مشتل , مركز تقاوي , ....... و كده

واحد كيميائي ممكن يعمل ايه :
مصنع مبيدات , مصنع سماد , معمل تقطير , ....

مهندس ميكانيكا ممكن يعمل ايه :
مصنع معدات , مركز صيانة , .....

طبعا مش شرط انك تعمل مشروع في مجال دراستك او تخصصك بس ده هيسهل عليك كتير في دراسة المشروع و التفكير فيه .................

واحد "مدرس" ... ممكن يعمل إية؟

**FunnyMickey** · 26-05-2010 07:14 PM

مصنع طباشير وشبورات
:)
ويبيع للمدرسه

هههههههههه

هوا فيه غير الدروس الخصوصيه ومراكز التقويه ياباشا
ربنا يديهم كمان وكمان

**Omar.Shawki** · 26-05-2010 07:51 PM

السلا م عليكم ورحمة الله وبركاته
انا من فترة بفكر اعمل مشروع وعندى الفكرة ومحتاجة حتة ارض فى زهراء المعادى المنطقة الصناعية اللى هناك اللى عند الاقصى للسيارات وشركات البترول
كنت عايز اعرف سعر المتر بحوالى كام وايه الاجراءات يعنى دراسة جدوى بمعنى اصح عشان ادخل على الحاج بقلب جامد
ياترى حد ممكن يساعدنى؟؟

**MaZaGAngeE** · 26-05-2010 08:07 PM

أنا عايز أحط هنا نماذج لمشروعات قمت بدراستها خلال ال 5 سنين اللي فاتوا :

مشروع طوب طفلي
مشروع مصنع كربونات كاليسيوم
مشروع جير حي
مشروع STPP
مشروع صابون سائل و صلب

تعالى ناخد واحد واحد كده و نشوف سبب الفكرة ايه ؟
الطوب الطفلي ده اللي هوه الطوب الأحمر اللي كلنا بنبني بيه فيما عدا بعض المناطق القليلة جدا في مصر ..
كان محدد للمشروع مكان من 3 أماكن :
اسماعيلية , المنيا , الفيوم
سبب اختيار الأماكن دي
1- توافرالمادة الخام ( الطفلة )
الطفلة دي عبارة عن بقايا الحجر الرسوبي الناتج عن فيضان النيل خلال آلاف السنين اللي فاتوا و تتواجد بكميات كبيرة جدا في محافظات المنيا , الفيوم , البحيرة , الشرقية , أسوان , ... و غيرها كتير

2- وجود سوق واسع جدا في المناطق القريبة ليها
لو المصنع في الفيوم : السوق جنوب القاهرة , أكتوبر , الطريق الصحراوي لحد اسكندرية
المنيا : سوقها المنيا , أسيوط , سوهاج .... جنوبا و بني سويف , الفيوم شمالا و غربا
اسماعيلية : سوقها شمال و جنوب سيناء , خط القنال , القاهرة الجديدة , مدينتي , الشروق ..

3- رخص الأرض في المناطق الصناعية
يتراوح سعر المتر في المناطق الصناعية ما بين مجانا( بشروط ) في المنيا و حتى 500 جنيه في اسماعيلية و 280 في الفيوم
4- توفر العمالة الرخيصة
لا تحتاج صناعة الطوب الطفلي الى عمالة عالية المهارة و لكنها بالمقابل صناعة كثيفة العمالة , لذا متوسط مرتب العامل من العوامل الهامة جدا في هذه الصناعة .
5- توفر الطاقة
تتوافر في المناطق الصناعية الثلاثة , الكهرباء , الغاز , المياه , و غيرها من أشكال الطقة المختلفة اللازمة .

صورة للمنتج النهائي :

طبعا ده من المشروعات اللي حجمها متوسط الى كبير , يعني رأس مال من مليون الى 50 مليون جنيه على حسب الطاقة الانتاجية المطلوبة ...

**MaZaGAngeE** · 26-05-2010 08:11 PM

المشاركة الأصلية كتبت بواسطة afterburner

السلا م عليكم ورحمة الله وبركاته
انا من فترة بفكر اعمل مشروع وعندى الفكرة ومحتاجة حتة ارض فى زهراء المعادى المنطقة الصناعية اللى هناك اللى عند الاقصى للسيارات وشركات البترول
كنت عايز اعرف سعر المتر بحوالى كام وايه الاجراءات يعنى دراسة جدوى بمعنى اصح عشان ادخل على الحاج بقلب جامد
ياترى حد ممكن يساعدنى؟؟

ممكن تروح جهاز المدينة الصناعية تسأل , و ان كنت أظن ان المنطقة دي مفيهاش مكان من الجهاز بس ممكن تشتري من أهالي داخل كردون المنطقة الصناعية .
مش عارف سعر المتر هناك كام بصراحة

الاجراءات تختلف باختلاف النشاط اللي انت عايزه و على حسب نوع الشركة (( فردية , شراكة , تضامنية , توصية , مساهمة ) كل نوع و ليه اجراءاته

**Omar.Shawki** · 26-05-2010 08:21 PM

المشاركة الأصلية كتبت بواسطة mazagangee

ممكن تروح جهاز المدينة الصناعية تسأل , و ان كنت أظن ان المنطقة دي مفيهاش مكان من الجهاز بس ممكن تشتري من أهالي داخل كردون المنطقة الصناعية .
مش عارف سعر المتر هناك كام بصراحة

الاجراءات تختلف باختلاف النشاط اللي انت عايزه و على حسب نوع الشركة (( فردية , شراكة , تضامنية , توصية , مساهمة ) كل نوع و ليه اجراءاته

انا مش عارف ايه الفرق (( فردية , شراكة , تضامنية , توصية , مساهمة ) اعتقد هتبقى فردية
بس هو هيبقى فيه معدات تقيلة زى كمبروسور هواء 10 بار ورمالات وكده ..
ولو حد عارف سعر المتر او اى معلومة ياريت يساعدنى..

**MaZaGAngeE** · 26-05-2010 08:25 PM

صورة للطين ( الطفلة )

طبعا لازم يكون قريب من مكان المصنع محجر الطفلة و محجر الرملة , و ده من أسباب اختيار المناطق التلاتة عشان الطوب عبارة عن خلطة من الطفلة و الرملة و المياه .
كمان لازم يكون متوفر مصدر مياه بكميات كبيرة لو المصنع يعمل باستخدام الطريقة الرطبة لصناعة الطوب .

-

الموضوع: عايز تعمل مشروع ؟ .... تعالى ندرسه مع بعض و نفكر فيه

LinkBack

أدوات الموضوع

عرض

عايز تعمل مشروع ؟ .... تعالى ندرسه مع بعض و نفكر فيه - انشر الموضوع فى :

فكرة المشروع -

-

-

-

-

المواضيع المتشابهه

لو عاوز تريح دماغك من اضطرابات الاقتصادية في البلد و تعمل مشروع تعالي اقرا و مش هتندم

لو عايز تعمل صيانه عربيتك البولو بنفسك تعالى

تعالى اقولك تعمل ايه لو ... رميت على حد !!

معاك 700 جنيه وعايز تعمل حاجه مفيده اوى فى الياريس تعالى

بتفكر تعمل مشروع ؟ أول خطوة هي دراسة الجدوى - أتفضلوا دراسات جدوى لمشروعات كتير

الكلمات الدلالية لهذا الموضوع

المفضلات

المفضلات

ضوابط المشاركة