انتباة أيها القاهريين , يبدو إن فى عاصفة ترابية شديدة فى الطريق !!
لسه راجع من برا حالا , الجو مكتوم بشكل فظيع ومفيش ولا نسمه هوا برغم ان الايام اللى فاتت كان الجو فى الوقت ده فيه هوا
لكن المميز انى من ساعه ما خرجت من البيت لحد ما رجعت مش شايف قصادى اكتر من امتار والجو مغيم جدا زى الشبورة بالظبط لكن تراب , سحابه كثيفه من التراب مغطيه المنطقه عندنا كلها والسما صفراء بشكل غير طبيعى وحتى سلم البيت وانا نازل كان كله تراب من الجو
ريحه الجو كمان صعبه قوى من كتر التراب والناس تقريبا كلها ماشيه بتكح فى الشارع من التراب اللى فى الجو لأن فعلا كثيف زى ما يكون قاعد فى غرفه مغلقه وحد بينفض جنبك بشده , ياريت الكل ياخد حذره خصوصا اخواننا اللى عندهم مشاكل فى التنفس وحساسيه من الحاجات دى
الغريبه انى لما راجعت نشرات الارصاد الجويه دلوقتى لقيت مكتوب ان فى رياح محمله بالرمال والاتربه هتكون موجوده النهارده لكن مكتوب انها معتدله وده مش منظر الشارع نهائى دلوقتى
ياريت الكل يقفل شبابيك البيت لأن الجو ممكن يشد بالتراب ده ويبهدل الدنيا فى الشقق , وياريت كمان الكل ياخد حذره فى السواقه لأن الرؤية نهارا اكيد هتبقى ضعيفه وربنا يعديها على خير