الموضوع: توكيل العبور و أول تجربة مع توكيلات اللوجان

زى ما حكيتلكم انى أخدت لوجان رومانى 2009 عامله 36000 كيلو ، وطبعا كان لازم أروح أعمل صيانة 40000 فى التوكيل علشان أتأكد من حالة العربيه ، اتصلت بالخط الساخن وحجزت فى العبور بعدها بيومين لأن المقطم عندهم ضغط حجوزات وبيدوا مواعيد بعيده شويه ، رحت التوكيل فى العبور وسلمت مفاتيح اللوجان فى الاستقبال و وقعت اوراق الموافقه على الصيانه والتكلفه ، وكانت 423 جنيه + 10% ضريبة مبيعات ، وكتبوا كل ملاحظاتى ، وانتظرت فى الريسبشن.

- المسئول اللى استقبلنى اسمه م / أمجد وكان متفاهم جدا ونصحنى انى أتصل بالمالك الأول للوجان وأطلب منه فواتير الصيانه الدوريه السابقه لأن الصيانات كلها مش مسجله عنده برغم ان الواضح انها اتعملت فى توكيل تانى للرينو غير المصرية للسيارات ، ودا يخلى العربيه خارج الضمان لغاية ما يشوفوا فواتير الصيانات السابقه .

- انتظرت فى الريسبشن وشربت أكتر من شاى على حساب التوكيل لأن المسأله طولت زى ما انتو عارفين ، بعد حوالى ساعتين نادالى المهندس أمجد وقالى العربيه هتحتاج تغير وصلة كوع الميه والترموستات والتكلفه حوالى 420 جنيه + الضريبه ، طبعا وافقت لأنى محتاج أطمن وآخد التقرير النهائى
- بعد حوالى خمس ساعات شوفت عربيتى واحد من التوكيل أخدها يجربها ورجع بعد حوالى 20 دقيقه ، ونادالى م / أمجد علشان يدينى تقرير عن حالة العربية وكان التقرير كالتالى :
* بالنسبه للصوت العالى للماكينه ده طبيعى صوت اللوجان علشان مافيهاش عزل بين آلة الجر والكابينه ، لكن بالنسبة لعربيتى فيه احتمال اما الشكمان مخروم أو محشور فيه حاجه بتسبب تزبزب درجة علو الصوت ، و المفروض انى كنت اسيب العربيه لتانى يوم عشان يفكوا الشكمان ( مكون من 3 علب ) لكن ما كانش عندى وقت.

* بالنسبة للمكيف قاموا فضوا شحنة الفريون وعملوا اعادة شحن وأصبح طبيعى بعد ما تأكدوا من الشحن.
* بالنسبة لضبط الزوايا مش محتاجه لأن المشكلة محتاجه كاوتش جديد لكن قياس الزوايا مضبوط
*بالنسبة لكمبيوتر الرحلات تم الكشف عليه وسليم 100% بس لو حصل لخبطه تانى فى قراية لترات البنزين هتحتاج تغيير طلمبة البنزين.
* حالة الميكانيكا والعفشه ممتازه وتم اعادة التربيط للعفشه واستبدال الاجزاء اللازمه ودا اتضح فعلا فى الفرق فى آداء اللوجان بعد زيارة التوكيل ، و ادونى الاجزاء القديمه اللى بدلوا مكانها جديد، ولو كنت معايا فواتير الصيانه أو العربيه مسجله عندهم كانوا ركبوا الاجزاء المطلوبه مجانا.

لحد كده بأعتبر زيارتى للتوكيل كانت موفقه وكانت معاملتهم محترمه وبصرف النظر عن الأسعار لكن اهتموا بكل ملحوظاتى وكتبولى ان الشكمان محتاج وقت للفك علشان أمر عليهم فى أى وقت يعملوا اللازم.

دى كانت تجربتى مع التوكيل حبيت انقلها لكم علشان لو تفيد اى حد ، شكرا ليكم