الموضوع: تقرير:تقيمى الشخصى للجيتا و السيفيك

بسم الله الرحمن الرحيم

حبيت اشارككم معايا تجربتى للجيتا و السيفيك بعد زياره للمعرض
و بالزات لحيرتى الشديده بين العربيتين دول
طبعا انا مش هقارن السيفيك ال1.6 ال I-VTEC بالجيتا التربو
لا المقارنه بين السيفيك الVTI المستوى الاول بالجيتا البيز

انا شخصيا بحب السيفيك و ما كنتش عايز ادخل فى حوار السيفيك ولا الجيتا بس للاسف كانت موجوده فى المعرض و المقارنه فرضت نفسها

و لحيرتى قررت اشوف ايه الفرق بين العربيتين و بالزات لاحتياجاتى الشخصيه و التقيم لكل عنصر عباره عن نقاط من 0 ل 5 و اللى هاتاخد مجموع اكبر هاتكسب (بالنسبالى) و بالزات ان كل عربيه لها ما يميزها

اسف على الاطاله و نخش فى المفيد



طبعا التقيمات دى شخصيه بحته فمثال بسيط انا اديت فتيس الجيتا 4 من 5 مع انه احسن فتيس فى العالم و لكن يعيبه مشكله انه بيفصل علشان سنسور درجه الحراره بتاعها عايز تظبيط الsetting (و دى الحمد لله بسيطه) بس المصيبه هى سعره

و برده وسع الصالون (انا ظبطت الكرسى بتاع السواق عليا و رحت اقعد وراه ما عرفتش فى الجيتا بس الوضع ماكانش بحر يعنى فى السيفيك بس كان مازال اوسع من الجيتا نسبيا) , و دى مشكله اى حد اطول من 185 سم

و بالنسبه للشنطه طبعا الجيتا اوسع (بحر يا معلم) بس السيفيك شغاله برده

اما الحاجه اللى غيظانى جدا فى السيفيك ان ما فيهاش المفتاح اللى بيعمل لوك لجميع الابواب جنب السواق حتى فى الفي تى اى (نظام يبقى معاك واحد و مش عايز تنزله يقوم فاتح الباب ببساطه و ينزل و يقول فى نفسه انك كنت بتستهبل و بتعزم عزومه مركبيه انك توصله زى تتعشى و لا تنام خفيف)

و الايرباج انا اديت اربعه للسيفيك مع انهم 6 علشان المشاكل اللى فيهم
اما عن النتيجه فهى متساويه تقريبا بفرق 2 بوينت للسيفيك عن الجيتا (و دى مقارنه حسب احتياجاتى الشخصيه)

و تانى انا مش بتكلم عن الجيتا التربو الخليجى يا جماعه و اسف على الاطاله