عدم توافر بنزين 80 و لزيادة أسعار البنزين , هل تستخدم أسطوانات الغاز !؟

**AMA** · 28-05-2010 01:32 AM

كنت بسأل على عربية 2000 سى سى نوعها دودج و الناس قالتلى تبقى جميله جدا بس لو لقيت بنزين 80 أنا كنت سمعت زمان أن بنزين 80 هيقل من الدولة لدرجة الأنعدام لكن مكنتيش متخيل بالسرعة القصوى دى و دلوقتى بنزين 90 مخلوط من 90 و 80 و محدش فاهم حاجة يعنى مش هتنزل تبص على لون البنزين أو تجيب كوباية و تشرب منه عشان تشوف دا مضروب ولا لأ و طبعا مش كل أسبوع هتصرف 50 جنيه بنزين يعنى بما أن الغاز موجود بـ12 جنيه يعنى توفير مفيش بعده العيب الوحيد أنه بيضعف الماتور بعد فتره طويله و بيأثر على عمره الأفتراضى بس طبعا مش بنزين 80 إلى بيبلع الماتور فأنتوا أية رأيكم فى تركيب أسطوانات الغاز الطبيعى

و أنت مؤيد لفكرة أسطوانات الغاز الطبيعى ولا معترض على الفكرة ؟
و هل شايف خطورة فى تركيب أسطوانات الغاز الطبيعى ؟

منتظر أرائكم و ردودكم

**exact** · 28-05-2010 02:24 AM

أؤيد وبشدة وبالذات مع السعة 1500 فما فوق ومفيش منه اي خطورة طالما بتبيت العربية وتسخنها عالبنزين عن تجربة 100000 في تويوتا

**zyadahmed** · 28-05-2010 02:40 AM

الظاهر ان ده الحل الامثل للشعب المقهور اللجوء للغاز الطبيعى
لكن ساعتها غالبا الحكومة هاتغليه بسبب زيادة الطلب عليه واللى اكيد هايأثر على الغاز المدعوم اللى بيروح لاولاد العم باسعار تفضيلية .

**تامر.محمد** · 28-05-2010 10:53 AM

انا متابع

و لكن اظن ان فعلا ناس كتير قلبت عربياتها غاز هايروحوا مغليين الغاز بمنتهى البساطة ( لأن اللي عربيته 800 سي سي حرام يتعمل له دعم مفروض يروح لأرملة بتصرف على عيالها , ده لو راح لها الدعم ده اصلا طبعا)ـ