الموضوع: زحام الطرق فى الاسكندرية

المشاركة الأصلية كتبت بواسطة ama

الصيف جاى و هنشوف الزوار من كل المحافظات و المدن فى أسكندرية بيطيروا بعربياتهم دا غير زيادة الحوادث بسبب التعود على نوع معين من السواقة كل واحد أتعود عليها فى محافظتة أو بلده
دا غير البطيخ و الفراخ إلى بيترمى فى البحر هههههههههههههههههه
للأسف أسكندرية فى الصيف مش بتاعة أهلها (عايز تشوف أسكندرية على حق شوفها على البحر من أول أبو قير للأنفوشى لحظة الفجر و أتمتع بيها مع عدد قليل من الناس هتحس أنك فى أيطاليا أو رومانيا) لكن يعدى حوالى 5 ساعات و هتشوف وشوش الناس هتلاقى نفسك رجعت تانى أسكندرية

+11111111111111111

المشاركة الأصلية كتبت بواسطة m.mostafa80

لكن الصراحه ملمستش زحام لدرجه واستخدمت الكورنيش (حلبه السباق)واستخدمت ابو قير واستخدمت طريق الترام ووسط البلد وحتت تانيه كتير ملمستش الزحام اللى عندنا انتم فى نعمه مش زينا خالص هو بس ربنا يعينكم على ضيوفكم فى الصيف

صحيح ان الزحام عندنا مش زى القاهرة ولا نصها لكن فى اوقات واماكن معينة بيكون فيها الزحام ضعف القاهرة وللاسف ما فيش حل غير الصبر عندنا وعود من 20 سنة بكهربة خط قطار ابوقير ووعود من 15 سنة بمحور المحمودية ووعود من سنين طويلة بمترو لبرج العرب والخط موجود من محرم بيه لمطروح وممكن يتعمل الوصلة لبرج العرب مترو محترم هايخفف الزحام على الصحراوى لعشرات الالاف اللى بيشتغلوا فى العامرية والبرج وبينقلهم اسطول خرافى من الباصات الصبح وبيرجع تانى العصر فى نفس التوقيت

وفى حاجة رهيبة مسكوت عنها وناسينها كلنا وهى النقل والترلات الخارجة والداخلة لميناء الاسكندرية ( اللى هو قدرها ) ومش عارفين نفصلها عن الطرق الرئيسية بتاعة السيارات الاصغر واللى كتير منهم ومن ركابهم بيموت تحت عجلات الترلات دى بسبب عدم تحديد مسارات واوقات خاصة بيهم واللى زاد وغطى عطب وتلف كوبرى باب 27 فى القبارى بعد افتتاحة بفترة مش كبيرة

للاسف ملخص مشكلة اسكندرية ان قدرها تبقى مصيف جميل وفى نفس الوقت ميناء كبير بمعنى ان ميناء مصر الاول هو مصيف مصر الاول ....