الموضوع: كلاكيت التجربة الأولى مع العربية برودوا كانشل

بصوا يا جماعة أنا أساسا عربيتى دايو لانوس و إحنا متعودين فى القسم ده إن كل عضو يعمل شغل فى عربيته يكتبها علشان باقى الأعضاء يستفيدوا منه سواء من قطع غيار أو تصليح. و ماشاء الله الواحد بالطريقة دى خلال شهرين عرف كل مشاكل اللانوس و أماكن التصليح و أسعار قطع الغيار و تكلفة التركيب.
و فعلا هذا القسم من أفضل الأقسام. علشان كده أنا حبيت أضع هذة المشاركة. و أنا بشيك على عربية المدام اللى أشترتها مستعملة من كام يوم و طبعا لازم من شوية تغييرات بعد الشراء للإطمئنان على العربية.

روحت لميكانيكى و لعفشجى فى فيصل و هو بالمناسبة بيزبط زوايا و إتزان و قالى عليه المستشار محمد ممدوح فى قسم الدايو. و بعد الكشف على العفشة قالى العربية محتاجة الأتى:
1- طقم مساعد خلفى
2- طقم فلاتر بنزين و هواء
3- طقم سيور كاتينة و دينامو و تكييف
4- طقم بوجيهات
5- 2 كاوتش جديد يركب قدام
العفشجى أخد 5 جنية كشف و الميكانيكى لسه ماحسبتوش لأنه لسهحيشتغل فيها بكره.

طبعا أنا عارف زى معظم الأعضاء أن قطع غيارها فى الحرفيين أو التوكيل بس قلت أسأل الأول فى شارع فيصل. طبعا دوخت من غير فايدة. قلت مبدهاش أطلع على المنيل على محل الشياطين الحمر. و أنا فى الطريق عديت على كهربائى الانوس بتاعى فى بين السرايات و قال لى فى محل أسمه السرساوى فى شارع الدقى بيجيب حاجات الكانشل. طبعا طرت عليه فى الأول (مرفق صورة بمكانه) و ما شاء الله لقيت عنده كل حاجه خاصة بالميكانيكا فقط (كبالن-مقصلت-فلاتر-سيور-بيض ...) بس صاج لأ (ماعندوش إكصدامات أو شبكة أو ...)
المهم جبت من عتده كل اللى إطلب منى و الأسعار كالأتى:
جوز مساعدين خلفى 220 – سير دينامو 15 – سير كاتينة أصلى 85 – سير تكييف 15 – فلتر هوا 65 – فلتر زيت 25 - 3 بوجيهات NGK 40 – فلتر بنزين 25

طبعا الأسعار دى مش عارف كويسة ولا لأ (يا ريت اللى جرب يقول رأيه بس اللى لاحظته أنها كلها أصلية و يابانى (مرفق صور ليهم) بس بصراحة أنا ماصدقت لقيت حد قريب منى و عنده معظم حاجاتها. المهم رجعت من هناك و أنا راجع لقيت لمبة الزيت بتنور و تقطع . قلت أه ده قرف إنك تجيب عربية مستعملة و مش عارف عنها حاجة. المهم ركنت و شفت زيت الموتورو الفتيس لقيت زيت الموتور أسود و ناقص. قلت المهم فالأهم كلمت الميكانيكى و قلتله أنا جبت الحاجات كلها بس حغير زيت الأول قال لى و بالمرة أغسل الموتور كويس علشان أشوفها كويس بكره. و فعلا رحت عند محل الزيت اللى بتعامل معاه فى الهرم سألته إذا كان بيعرف يغير فلتر العربية دى و الحمد لله طلع ناصح و أروبه ضحك و قال لى بص حغيره إزاى. و لقيته فك النمرة الأمامية و لقيت بعدها صندوق فى الشبكة الأمامية و دخل جهاز طويل و فى ثانية واحده طلع الفلتر و ركب الجديد وغير الزيت. الحمد لله طلع الموضوع سهل. و أنا مروح غسلت العربية و جهزتها لرحلة الغد. و الى ما يحدث الغد.

أسيبكم مع الصور (ملحوظة العفريت الصغير للى فى أخر صورة اللى قدام محل السرساوى يبقى إبنى)