الموضوع: كيفية اختيار التخصص الطبى محتار جدا يا دكاترة؟؟؟

انا طبيب امتياز ومضى على امتيازى 3 شهور ....منذ وانا فى الجامعة احلم بان اكون طبيب اطفال ولكن للاسف كان هذا الحلم بناء على تفكير من جهة واحدة وهى انى كان لى صديق يكبرنى ب 5 اعوام وكان طبيب اطفال وحديثى الولادة وكنت اراة ناجحا منذ اول سنوات التكليف وفتح مركز حضانات وكدة وكنت اراة كيف كان يتعامل مع تلك الكائنات الملائكية فاحببت ذلك التخصص وكان اى حد بيسألنى من وانا فى سنة 5 اقولة انا دكتور اطفال ....ولكن تأتى الرياح بما لاتشتهية السفن فانا تقديرى العام 78 فى المية لانى كنت مهمل جدا السنوات الثلاث الاولى وكنت بنجح بالعافية لكن الثلاث السنين الاخرى اجتهدت وكنت بجيب امتياز عالى .....المهم علشان ما اطولش عليكم

انا ال 3 شهور الامتياز دول كنت مقضيهم فى مستشفى وزارة صحة وكنت تقريبا بدوس فى كل حاجة واى حاجة غرز واستقبال وطوارئ وعضم وكنت ساعات بساعد بتوع التخدير ومرتين ولادة وكدةوعشت حياة اغلب انواع التخصصات كاساسيات طبعا مش كخبرة ................بس اللى جايبلى احباط دلوقتى حاجات كتير
1:كنت من اول الامتياز بدأت اذاكر زمالة بريطانية اطفال املا فى انى اخلصها بدرى بدرى وابقى اخصائى اسرع من دهاليز وحوارت وزارة الصحة سنة امتياز و9 شهور تكليف و3 سنين جيش ولسة امسكب 5 سنين نيابة وحوارت

2:بقيت بكرة اكشف على العيال الصغيرة ولما بشوف طفل داخلى الاستقبال بيبقى يوم

3:مش بحب خالص الامراض المزمنة ولا الكشف على الناس الكبيرة دة خالص

4:بحب الشغل بالايدى اوى وبيجيلى احساس من النشوة كدة والجونطى بيترقع من ايدى بعد ما اخد غرزتين ولا بعد المساعدة فى ولادة

5:فكرت اشتغل نسا لان فيها مجالات واسعة باطنة على جراحة على ميكانزمات على اشعة على حقن مجهرى وحوارت بس مجموعى هيجيبلى نيابة فى حتت تعبانة اشهرها الحوامدية والبدرشين والحتت دة فخايف اعك ومبقاش دكتور شاطر

6:خايف من تخصص النسا الصراحة لان انا لو مش دكتور هودى مراتى عند ست مش عند راجل والصراحة البنات كترو دلوقتى فى النسا

7:عجبنى اوى تخصص التخدير وانو بيلم معرفة عن تخصصات كتير وبلاوجع العيادة ولا بتاع وكمان تخصص ملح ومطلوب فممكن يجيلى فى اماكن صحة جنب بيتى بس طبعا الشغل مش هيبقى فى مستشفى الصحة لانها مفيهاش امكانيات لكن هيبقى فى البرايفت والعيادات الجراحية

8:خايف لاحسن ما اتعلمش كويس تخدير وساعتها ولا هعرف ابيع كلام فى العيادات زى بتوع الباطنة والاطفال طبعا انا مش قصدى ان بتوع الباطنة والاطفال بيبيعو كلام بالعكس لكن قصدى ان العيادة دة باب رزق

9:اعرف نايب تخدير بيقولى انا بعمل 5 او 6 عمليات فى اليوم برايفت وبروح بيتى ب 500 او 600 جنية وشكرا
طبعا الرزق بتاع ربنا بس انا مش عارف

اخد اطفال وخلاص واعيش مع الزمالة البريطانية دةوممكن ابقى احب الاطفال اكتر
اخد جراحات ونسا وادوس فى الصخر وخلاص واروح اى مستشفى بعيدة واهى الستات مش بتبطل خلفة
اخد تخدير فى مستشفى صحة جنب بيتى واريح دماغى من قصة العيانين واعيش ايفوريا التخدير واظبط علاقاتى فى الوسط المحيط بية

ولا اشيل من دماغى فكرة التخصص والزمالات دة دلوقتى واستسلم للواقع المرير واتعلم كل حاجة كدة وخلاص...

مشكلتى كمان فى شخصيتى شوية صفات عجيبة يمكن تبقى عيوب:
1:بحب ابقى الكل فى الكل وابقى برنس الحاجة اللى شغال فيها
2:بحب اتنطط اوى واشتغل حاجات كتير برة الطب يعنى كنت بشتغل زمان وانا فى الجامعة فى العربيات كنت بسوق لمعرض عربياتة واخد نسبة......واشتغلت سنة مرة فى المصرية اللى فى المعادى اى نعم بعقد صورى ومرتب تعبان بس لانى بحب مجال العربيات

3:مبحبش كلمت نايب الجامعة حاجة وانت حاجة حتى لو كان مجموعى قليل
4:مش فارق معايا تخصص معين الاهم انى ابقى ناجح ومتوفرة كل وسائل النجاح
5:احب القيادة والسيطرة وانى ابقى مسئول عن الاخرين وتنظيم عملهم
6:بحب علم التسويق والدعاية اوى وليا تجارب فية مع ناس كتير والحمد لله نجحت مشروعاتهم بفضل الله ثم بعض افكارى البسيطة
7:بحب التجاره جدا جدا جدا

مش عارف اة دخلنى طب بس بردك نفسى اطلع دكتور ..........انما بتاع اة مش عارف؟؟؟؟