-
اللانسر 1300 رخصت؟
يا جماعة أنا شفت النهاردة كام إعلان فى ملحق الجمعة فيهم لانسر 1300 مانيوال جميع الكماليات
فيه اعلانين كانت فيهم ب 84,000 واعلان ب 85,000
أنا فاكر إن كان سعرها لحد فترة قريبة 89 أو 90
أو يمكن أنا اللى مش متابع كويس ومش واخد بالى
معلش أنا عندي حبة أسئلة وأرجو إني ماتقلش عليكم :
هل دي موديل 2007 وبيخلصوا منها؟
والشكل القديم أصلا بينزل منه موديلات جديدة ولا كله خلاص الشكل الجديد؟
ودي مصرى ولا خليجي؟ وعليها ضمان ولا لأ؟ وإيه الفرق أساسَا بين الاتنين؟
وإيه الكماليات اللى فيها بالظبط؟
وياتري موتور 1300 يكون كويس على عربية بالحجم ده؟
ياريت لو حد يقدر يفيدني، انا حاليا ناوى اشتري وكنت بافكر في الحاجات اللى بين 75-80
أفيو وكليو وجيتز ونيو اكسنت إلخ
وسألت واتفرجت عليهم في معارض وعرفت معلومات كتيرة عنهم، بس أنا جاهل تماما فى اللانسر لأني طبعًا مكنتش بافكر ابص للانسر خالص لأني كنت باشوف اسعارها بتبدأ من 90
وبالتالي محطيتهاش فى اعتبارى
بس طبعا كده الواحد ممكن يقرص على نفسه شوية ويجيب اللانسر أحسن بكتير من عربيات ال75-80
ياريت لو حد يقدر يقولي إيه قصة العربية دي
متشكر جدًا جدًا
-
اخي الكريم
اولا ..اعلانات الجرايد معمولة علشان متتصدقش ..اللي بينك و بين الاعلان : تليفون المعرض
ثانيا : اللانسر اللي بالسعر ده (اذا كانت بالسعر ده فعلا )..حتكون حاجة من اتنين ..يا اما مانيوال تكييف و باور فقط ( خليجي ) ..يا اما مانيوال فل اوبشن ( خليجي اردني )
ثالثا :العربية دي 2007 او 2008 متفرقش ..مفيش فروقات بين الاثنين ..
رابعا .الخليجي ملهوش ضمان في مصر ..ممكن المعرض يديلك ضمان تبع اي مركز خدمة ( الرواس مثلا ) و لكنه ليس ضد عيوب الصناعة و انما للصيانة فقط
خامسا : الموتور 1300كويس و ظريف للمانيوال ..للاتوماتيك ادائه ممكن ميكونش مقبول اوي ..العزم ضعيف شوية ..و لما العربية بتكون علي سرعات عالية السحب بتاعها بيضعف جامد .
سادسا : اللي حيدفعك 85000 في لانسر 1300 بدون ضمان ..ممكن تدفع 87000 في نيسان جميع الكماليات مانيوال 1600 بالضمان .
تحياتي
-
شكرًا على النصيحة يا باشا وأنا عمومًا راجعت حساباتي وميزانيتي و حتى لو كانت مصرى وبالضمان ف شكلي مش هعرف أزق الكام ألف الفاضلين دول وهرجع لفئات ال75
وحتى لو عرفت فبلاش المخاطرة أحسن برضه
الواحد كان بيحلم كده لوهلة بلانسر، بس يالا الحمد لله
والباقى مش وحش برضه :)
شاكر جدًا لحضرتك
-
بالتوفيق ..و ان شاء الله ربنا يباركلك في اختيارك ايا كان
-
-
فى بعض الأوقات يقوم صاحب الإعلان بتقليل سعر العربية ب 1000 أو 2000 جنية ده فى الإعلان بس لكن يفرض عليك أنها للبيع بالتقسيط ويقوم بتعويض الفرق ده فى نظام الأقساط أو يكون بيحرق الأسعار ودة دلوقتى نادر لان العربية دى مش عربية واقعة عشان يتبع تلك السياسة
وشكرا
ولازم تفرق بين السيارات المعروضة يعنى مش عربية 1300 والسلام الفرق ممكن يجى منين
سيارة خليجى -سعودى أم سيارة مصرى بضمان
سيارة Glx أم سيارة GL
بها كاسيت الفبريقة ولا كاسيت عادى أو بدون
وشكرا
Content Relevant URLs by
vBSEO 3.6.0 PL2