الموضوع: الاسبيرانزا a113

بعد حيرة شديدة فى اتخاذ قرار شراء سيارة جديدة كحال معظم الاعضاء هنا ... اشتريت اسبيرانزا A113 ... واليكم

التفاصيل ..

أنا امتلك سيارة ماتريكس .... ولكن زوجتى تحتاج سيارة صغيرة لكثرة مشاويرها .. حيث ان الماتريكس تكون معى

دائما .. . لذا فقد رأت زوجتى انه لا بديل من شراء سيارة شخصية لها تكون صغيرة وبتفر فى شوارع مصر ...

( من حر مالها) ... وطبعا اخوكم الموضوع جه على هواه حفاظا على الماتريكس ... علشان الستات رجليهم تقيلة شوية على العربيات

المهم ... بدأت رحلة البحث عن سيارة صغيرة وماتاكلش بنزين وتكون فيها الحد الادنى للآدمية ( يعنى مش توكتوك) ...

قولت لها عليكى والماروتى ... حلوة وصغيرة وتعدى بيها من تحت عقب الباب ... وفعلا اقتنعت .. بس قالتلى المشكلة

انى حاتسلق من الحر فى الصيف من غير تكييف ...

قلت يبقى ممكن سوزوكى ألتو 800 مكيفة وحلوة بس أغلى 10000 جنيه ....

قال لى ماشى مش مهم اتصرف وادبرهم .... ( ليه هوة مفيش رجالة فى البلد ) .... قولتلها خلاص دول هدية من عندى

المهم من غير ما اطول عليكم ... قولت لها تعالى نروح معرض المصرية ونشوف كل العربيات هناك على الواقع .....

روحنا معرض المصرية .... لقينا الماروتى ... ركبناها من جوة ... مفيهاش اى حاجة خالص ... حتى الكاسيت اللى هما حاطينه جديد شكله نكتة ....

حاجة كدة على اد شريط الكاسيت بالظبط ... قالت لى لا لا لا لا

رحنا على الراجل اللى واقف .... هية فين الالتو 800 ؟

مفيش يا باشا خلاص وقفوها ....

فيه بدلها دلوقتى السيلاريو اللى قدام حضرتك دى ....

و بعد الفحص والمحص ماعجبتناش خالص ... ولقيناها غالية على اللى فيها

قلت لها تعالى نشوف آخر حاجة ... سبارك شيفورليه .... برضه ما عجبتناش + توكيل منصور ذو الشهرة العالمية فى الغتاتة

قلتلها شاكلنا كدة خلاص مش حانشترى حاجة .....

واحنا خارجين لقينا ال A113 وشكلها جميل اوى ... بس انا كنت مستبعد الصينى خالص بصراحة ...

قلنا نتفرج مش حانخسر حاجة .... ركبنا العربية لقيناها بصراحة رائعة من جوة بالنسبة للى شفناه فى العربيات التانية ... فول اوبشن بمعنى الكلمة :

1- 4 زجاج كهرباء
2- وحدة رفع زجاج للاربع ابواب (مش عندى فى الماتريكس)
3- تكييف ممتاز
4- مرايات كهربا
5- انذار وسنتر لوك وريموت فى المفتاح
6- عداد كمبيوتر للرحلة يبين لك سرعتك الحالية بتستهلك بيها بنزين اد ايه + عداد للرحلة
7- فرامل ABS
8- مساحة داخلية واسعة ( يعنى العربية بقت مش لزوجتى بس .. ينفع نركبها كلنا لأى مكان) انا وهى والاولاد
9- أماكن تخزين ممتازة فى التابلوه وتحت كرسى السائق
10- الكنبة الخلفية بتتلم بطريقة احسن من الماتريكس بتاعتى وبتدى مساحة اضافية للشنطة
11- مساحات المطر متوفر فيها كل سرعاتها ... عندى غبور شايل الاوبشن ده هية سرعة واحدة بس
12- راديو وكاسيت CD ام بى ثرى + USB
13- مساحة مطر خلفية
14- الفرش شكله شيك (بالنسبة لذوقى انا وزوجتى)
15- متوفرة بأكثر من 13 لون
16- مفيش حجز ... العربية بتتباع بالسعر الرسمى فى كل حتة

المهم العربية عجبتنا جدا بكل الامكانيات دى فى عربية من الفئة دى + انها 1300 cc يعنى اقوى من زمايلها التانيين

فتحت الكبوت .... بدون تفاصيل كتير حسيت ان العربية حلوة مش زى ما كنت متخيل عن الصينى وب 50000 جنيه .. يعنى ارخص من السيلاريو وال سبارك وفول اوبشن

وفعلا استخرنا ربنا واشتريناها ( بس مش من المصرية) وبقالها اسبوعين معانا

طبعا واحد حايقولى ... يا عم انت بتشترى كماليات ؟؟؟؟ المهم العربية عاملة ايه فى الشارع

نكمل انطباعتنا عن العربية بعد القيادة الفعلية فى المرة القادمة ان شاء الله

المشاركة الأصلية كتبت بواسطة bassemali

يظهر أن الأخ صاحب الموضوع زعل لأننا ردينا على موضوعه بعد مده .... ولا أيه ياجماعه؟

لا يا باشا ربنا ما يجيب زعل ... بس حسيت ان الموضوع مش مهم ... علشان كدة مادخلتش هنا من مدة ... مع ان العربية منتشرة جدا فى الشوارع