الموضوع: استفسار بخصوص صيانة العفشة

وعليكم السلام ورحمة الله وبركاته

أولا موضوع العفشة بصراحة حتي الأن العربية ما عملتش فيها حاجه في العفشة وماعنديش فكرة عن الأسعار ولا عن اللي المفروض يتعمل
ولكن اللي أعرفه ان بيض وجلب المقصات دي حاجه مستهلكة في العربية بسبب الطرق بتاعتنا المقرفة والمطبات والكسر والأتربة كل ده بيؤدي الي استهلاك الاجزاء دي وبتحس وهي بايظة ان العربية ناشفة وتحس بنقر الطريق وخشونته وتحس ان العربية مفككة خيف مش حتة واحده مع المطبات الغريبة اللي بتخلي العربية تترج جامد
والمفروض لما تصلح الحاجات دي وتغيرها تحس بنعومة في العربية وثبات أكتر
علي فكرة انا كشفت مرة علي العفشة من سنة تقريبا وبرضه قلي نفس الكلام بس قلي لو مشيت بيها كده عادي بس مع الوقت تعمل مشكلة اكبر وبصراحة مكبر دماغي وكويسة العربية والحمد لله رغم البهدلة اللي بتشوفها و ان شا الله ناوي اروح قريبا اظبطها واغير كل المطلوب

وكل الناس بتشهد بأن أقوي عفشة هي عفشة العربيات الألماني و معمرة جدا
ثانيا بخصوص موضوع صوت النقلات ده ظهر عندي بوضوح بعد ما غيرت طقم الدبرياج الأصلي ودي بيكون بسبب ان طقم الدبرياج والبلية وخاصة البلية بتكون مش زي الأصلي ولا بنفس الكفاءة لا في الخامة ولا في تركيبه عشان كده بتسمع الاصوات دي وخاصة مع النقلات البطيئة ولكن كل ما تعلي النقلة مش هتحس بيها عشان بتكون العربية أخده سرعه وليها صوت طبيعي مضيع ظهور هذا الصوت بس بالاضافة لأن الفتيس نفسة كمان داخليا بيكون فيه نسبة استهلاك وتأكل برضه بيحسسك بأصوات زي كده وبيساعد علي ظهورها
عايزك تحاول تتعايش مع الموضوع لأنه طبيعي في عربية شغالة بقالها 16 سنة

المشاركة الأصلية كتبت بواسطة egman

اخى الكريم / المهندس ايهاب

الله يكرمك يا اخى والله ريحيتنى لحسن انا كنت حاسس ان العربية بتخرب مني وقد ايه كنت متعقد من الموضوع ده .

معلش تانى لو سمحت افهم من كلامك ان الموضوع ده عادى وطبيعي ومافيهوش ضرر جسيم على العربية ؟

وهل معظم العربيات بتكون كده او ده حاجه متعارف عليها ووضعها طبيعي ؟

انا آسف لكثرة أسئلتى لكنى عايز اطمن اكتر واكتر جزاك الله كل الخير خاصاً ان ده اول عربية ليا وانى سواق جديد كمان :) وخايف اكون انا بعمل حاجة غلط فى سواقتى ....

وبخصوص طقم الدبرياج والبلية دول بيكونوا سعرهم كام لعربيتى موديل 94 وصناعتهم ايه ؟

الفتيس الى حضرتك بتقول انه بيكون فيه نسبة استهلاك برده ده يا ترى بيتغير ولا بيتعمله صيانة ازاى وهل تزويد زيت الفتيس ممكن يظبطه شوية ؟

يعنى بمعنى اصح اية هى الصيانة الى بتتعمل فى الحاجات ده طقم الدبرياج والبلية والفتيس ؟

انا اسف للتطويل يا باشا ...

بالنسبة للوضع ده فهو مش طبيعي لكن احنا بنقول عليه طبيعي لأن العربية مستهلكة بقالها كتير واتغير فيها حاجات كتير وممكن تكون غير اصلية واللي بيركبها غير مهاري بس ومعظم العربيات اللي بتتعرض لنفس الظروف كده برضه
عايز تتجنب ظهور هذا الصوت تعامل مع العربية بهدوء يعني انقل غياراتك ودوس وشيل رجلك بهدوء هتلاقي الموضوع ده راح ومش ظاهر قوي لأن اللي بيظهره اكتر هو النتش والنقل بسرعه وتسيب دواسة الدبرياج بسرعه ...... كده يعني اكيد فهمتني

بخصوص صيانة طقم الدبرياج فهو له مشاكل لما بتظهر بنعرف بيها انه فيه مشكلة وهدور علي مشاركتي في الموضوع ده واجيبهالك عن مشاكل الطقم وأنواعه هتلاقي منه فاليو وده موجود أسباني وده اللي انا غيرته وكان ب 550 جنيه كامل بالبلية ومش عجبني خالص لأن بليته باظت بسرعه وغيرتها وفيه نوع ساكس ألماني وده كان ب 800 جنيه وأعتقد انه افضل من الفاليو وبعدين لف واسأل اكتر من واحد حتي لو مش هتغير عشان تكتسب خبرة وتعرف واتفرج علي الحاجه عند محلات قطع الغيار

بخصوص الفتيس فتكشف فقط علي الزيت وتشوف منسوبه كويس ولا لأ وتشوف الاولسيل بتاعه بينقط زيت ولا لأ ولو بينقط غيره وزود الزيت بزيت اسو 90 وبس وكبر دماغك من اي حاجه تانيه فيه لأن تغييره مش مضمون وصيانته صعبه وغير مجديه ولما يحصله حاجه يبقي تخلص عليه وتغير موتور بفتسيه بحاجته أحسن وأنضف واوفر

وتحت أمرك يا باشا وربنا يوفقك ويباركلك فيها

المشاركة الأصلية كتبت بواسطة egman

أ/ ايهاب
انا مش عارف اشكرك ازاى .

ربنا يكرمك يا اخى ويجازيك خير ان شاء الله ويوسع رزقك .

عارف حضرتك الى انت قولته فى اول مقطع من اجابتك الاخيرة هو ده بالضبط بالضبط بالضبط الى بيحصل معايا ، وفعلا لما بنتش بيحصل كده ولما بشيل دبرياج بهدوء الصوت تقريبا بيقل جدا جدا جدا وممكن ما يتسمعش خالص هو ده بالضبط الى بيحصل زي ما حضرتك قولت .

الله يكرمك يا باشا وانا متشكر جدا جدا لحضرتك ,,,

وجزاكم مثله