فى بيتنا برص

**HAMZAWY** · 30-05-2010 04:53 PM

من يومين نقلت لشقة جديدة واكتشفت فيها شىء مش ظريف وهو البرص وبسم الله ما شاء الله زى مايكون تمساح صغير المشكلة الاكبر انو مش واحد بس لا دى تقريبا العيلة كلها عندى فى الشقة مش حقولوكو بقى اصلى بقرف منهم بقى والكلام الفاضى ده لا انا بصراحة بترعب منهم
دلونى يا ولاد الحلال على طريقة اخلص بيها من الكائن ده نهائيا وبسرعة الله يكرمكم

**youssefmustang** · 30-05-2010 05:00 PM

فى ناس بتوع رش بيجو يرشو الشقة ولابسين بدلة زى بتوع رواد الفضاء كده وحضرتك بتسيب الشقة لمدة 3 او 4 ايام تقريبا وساعتها لو فيه اسد مش برص هتلاقيه ميت
وفيه حل اخر انك تشترى مبيد حشرى قوى غير بتاع النمل والصراصير مع انو بأثر عليه وترش
وفي اجهزة الكترونيه بتشتغل بالموجات الفوق سمعية ودى مهمتها طرد الفئران والذى منه لكن مش بتموتهم
يا رب اكون افدتك وشوف اراء الاخوة الاعضاء
اخوكم يوسف

**ali.mahmoud** · 30-05-2010 05:02 PM

شبشب هيخلص الموضوع

**kemoelord** · 30-05-2010 05:04 PM

حلو العنوان اوي بجد ههههههههههههه وبعدين يا عم حاول تموتهم بايدك (اقصد تقتلهم بنفسك) علشان تاخد ثواب

جاء في صحيح مسلم من طريق خالد بن عبد الله عن سهيل بن أبي صالح عن أبيه عن أبي هريرة أن النبي صلى الله عليه وسلم قال ( من قتل وزَغة في أول ضربة فله كذا وكذا حسنة . ومن قتلها في الضربة الثانية فله كذا وكذا حسنة لدون الأولى وإن قتلها في الضربة الثالثة فله كذا وكذا حسنة لدون الثانية ) .
وفي رواية : { من قتلها في الضربة الأولى فله مائة حسنة ، ومن قتلها في الضربة الثانية فله دون ذلك وفي الثالثة دون ذلك } .

ولو مش هتعرف حاول تتصل بشركة رش طالما انهم عندك بالعائلات تلاقيهم بس بيصفوا عندك قبل رمضان ههههههههههههههههه

**chicobon** · 30-05-2010 05:13 PM

اكيد شقة حضرتك قي الدور الارضي او الاخير عشان بيكتر اما في السطوح بتاع العمارة لوجود كراكيب و هما بيعششو في الخربات او في الدور الارضي و بيكون بيجي من الشارع و بيدخلو الشقة حاجة تقرف انا حاسس بيك
الحل انك ترش عليهم موبيد حشري كده و هما بيدوخو من الريحة و ساعتة بي الشبشب و الجزمة بي كل قوة خالي بالك مش بيموتو بسهولة

**pro_samir** · 30-05-2010 05:19 PM

ربنا يعينك بجد كائن مقرف

ويا سلام تيجي تضربة بالشبشب ديلة يتقطع وهو يطلع يجري وديلة يقعد يلعب زي ميكون بيطلعلك لسانة

ومتنساش تقفل الشقة كلها سلك علشان مش كل يومين تلاقي واحد جاي يزورك

**youssefmustang** · 30-05-2010 05:31 PM

وانا اكتر حاجتين ممكن يجبولى سكته قلبية حادة العنكبوت الضخم والصراصير اللى بتطير
يا ساتر يا رب
انت حطنى قدام اسد على الاقل الاسد هيخلص على طول لكن ده بيخلى الواحد يقشعر لدرجة انى بحس ان جلدى بيعرق من شدة القشعرة
اما البرص فا بموته بميه مغليه من السخان

**Akram** · 30-05-2010 06:09 PM

انا هقولك على فكرة جامدة ,

المكونات :----
==========
1- جيب شطة سوداني بس متكونش مغشوشة , يعني من واحد ثقة و محترم مش عطار أي كلام ,
أو مشوار على السريع للخرطوم ... :)

2- جيب فحم و أي حاجة تحط فيها الفحم ده لما يولع و اتأكد إن الفحم كويس مش مرطب ,

طريقة الإستخدام :--
=============
في كل أوضة تحط الفحم طبعاً بعد ما يولع كويس و تحط عليه شطة اسكندراني و تجري بره الأوضة على طول و تقفل الباب و طبعاً تكون مقفل الأوضة كويس و ميكونش فيه أي فراغات في الشباك أو الباب ,

و هكذا في كل الغرف , و بعدين في الريسبشن تعمل نفس الحكاية و تخرج بره الشقة لمدة ساعتين ,

و لما ترجع طبعاً تفتح الشقة كلها علشان التهوية ,

و إن شاء الله مش هتلاقي أي كائن حي بعد القصة دي ,

جرب و قوللي على الأخبار ....