الامر أتحسم للكروز

**ahmeeeeeed** · 31-05-2010 04:32 AM

السلام عليكم لكل الاعضاء والمشرفين مش عارف ابدا منين ولا اقول اية لان دي اول مشاركة لي في المنتدي بس

بصراحة كل الي عاوز اقولة لكي محبي وعشاق العربية الكروز ان الامر اتحسم لصالح الكروز الاجمل في فئاتها

انا النهاردة زرت توكيل رسمي لمنصور شيفرولية في الاسكندرية واتفرجت على العربية الكروز بصراحة تحس انك راكب

الماني ودة الي ممكن يكون اكدهولي مسئول المبيعات هناك لما دردشت معاة كتير و سألتة عن سبب أرتفاع اسعار الكروز مقارنة

بالعربيات التانية المنافسة لها في فئاتها فقالي والله العظيم بالحرف الواحد ان العربية دي متكلف عليها جامد في الماتيرا

بتعاتها والبودي والعفشة وكل حاجة فيها وخصوصا ان معظم قطعها من شركة بوش الالمانية العالمية كالجيربوكس وغيرها

وغيرها ولما سألتة عن مشكلة التوكيل الي بيعاني منها ناس كتير وبيتكلموا عنة قالي والله العظيم انا كان عندي

عميل العربية بتاعتة كان فيها عيب تصنيع اخدنا منة العربية وسلمناة واحدة تانية زيها في غضون 24 ساعة وكمان سألتة عن الاسعار فقالي الاسعار هتكون كالاتي

المانيوال زجاج كهرباء امامي وخلفي110000

الاتوماتيك الاليجانس
1210000
الهاي لاين 1310000 وتختلف الاليجانس عن الهاي لاين في خمس حاجات بس اير باج واي بي اس وطارة مالتي وجنوط 16 وكروم نيكل حول الشبكة الامامية

اما بالنسبة للتوب لاين فهيكون سعرها 1410000 جميع الكماليات

وكمان هناك نوع جديد نازل بسعر 150000 جنية الفرق فية سيدي تشنجر وجنوط 17 وفرش جلد وكماليات اخري بس من غير فتحة سقف وقالي لو عاوز فتحة في اي موديل ممكن تعمل اوردر خاص بكدة بداية من الاليجانس بس السعر هيفرق كتير

وكمان لفت انتباهي حاجة فيها الفرش بتاعتها الي بيبقي لونين لما سألتة عن كدة قالي بالنسبة للاحمر المالبورو على حد قولة كان بينزل وبطلوا ينزلوا العربية بية اما الازرق قالي بينزل كل 50 عربية واحدة بفرش ازرق اما الاساسي فهو الفيراني

اتمني ان تكون مشاركتي فعالة ولكم اطيب التمنيات باقتناء العربية الي بتحبوها

ممنوع استخدام اللون الاحمر في المداخلات او التوقيع حيث إنه مخصص فقط للمداخلات الادارية من قبل الاشراف والإدارة
تم تغيير اللون ويرجى مراجعة قوانين المنتدى

31/5/2010
10:55 am

مشرف 12 ب

**harmhanz** · 31-05-2010 09:15 AM

كلم جميل جدااااااااا بس انا مش مقتنع بموضوع تغيير عربية فى خلال 24 ساعة ولا 24سنة حتى

شكرا على المعلومات الجميلة

**ahmedbasto** · 31-05-2010 09:51 AM

ولا انا مقتنع بالموضوع دة

**أشرف العدوي** · 31-05-2010 10:16 AM

عميل العربية بتاعتة كان فيها عيب تصنيع اخدنا منة العربية وسلمناة واحدة تانية زيها في غضون 24 ساعة وكمان سألتة عن الاسعار فقالي الاسعار هتكون كالاتي

أشي خيال يا ناس
كان الاولى يبدل دي الي صاحبها عمل بيها 4 حوادث علشان بتبطل و هي ماشية و لسة ماعملوش اي حاجة معاه
http://www.nilemotors.net/Nile/141086-a.html

**أشرف العدوي** · 31-05-2010 03:32 PM

هو كام واحد في المنتدى معاه كروز
و لما يطلع منهم اتنين فيهم نفس العيب يبقى فردي ازاي نفس العيييييييييييييييييب في العربيتين اكيد مش صدفة او مثلاً خارجين من مكنة واحدة و مجموعة عمال واحدة هما الي قفلوهم الاتنين

انا مش ضد الكروز و لكن ضد منصور و طريقة حل المشاكل و التسعير و طريقة الصيانة و هوية قطع الغيار و النصب و قلة الزوق و كل حاجة وحشة من عند منصور
و اشمعنى العربيات دي بيظهر فيها مشاكل في مصر بس زي الفيكترا و الكروز
متهيالي الفيكترا و الكروز برة مافيهمش مشاكل على حد علمي و بحثي

**أشرف العدوي** · 01-06-2010 12:54 AM

المشاركة الأصلية كتبت بواسطة zeznia

سيدي الفاضل
سبق وذكرت في الاستطلاع ان مافيش صوت ظهر غيرصوت الناس اللي حصل عندها عيوب للاسف او لحسن الحظ الناس اللي مش عندها مشاكل متكلموش خالص طب ليه التجني علي سياره لاحول لها ولاقوه اتحطت في ايد توكيل فاشل طبعا كان نفسي السياره تبقي كامله مكمله من ناحيت التوكيل بس نعمل ايه في النصيب
اعتبر انك اشتريت سياره بدون توكيل
انا متاكد ان الناس اللي سيارتها محصلش فيها حاجه لو اتكلمت هتغطي تماما علي مشاكل السياره طبعا مش مشاكل الوكيل اللي كلنا معترفين ومتفقين عليه بغض النظر عن ان السياره بتدخل بدون حجز والمعامله الخاصه والخ...
انا هاسيب السياره تدافع عن نفسها عاشان انا عارف ان الناس هاتقول اني مندفع للسياره و...........
وشكرا واسف للاطاله

يا استاذي الي في الاستطلاع 6 فقط و هم بدون مشاكل و يوجد 2 عندهم مشاكل مصوتوش
يبقى المجموع 8 نسبة 25% منهم عنده مشاكل كبيرة ( انت متخيل يعني ايه عربية تبطل و هي ماشية ) يبقى في مشكلة في العربية ( المنيوال فقط حتى الان ) غير طبعاً مشاكل التوكيل الي معظم الناس متفقين عليها
و الي يخلي واحد يشتري كروز و هو متشكك انه ممكن يكون فيها مشاكل و لو لا قدر الله حصلت المشاكل و لاقي التوكيل موقفش جنبه ما يروح ييشتري لاسيتي احسن بسعر ارخص و محرك اقوى الماني و كماليات اكتر و ممكن يشتريلها ضمان كمان
ايه الي يخليه يجيب كروز بقى طالما هي بدون وكيل فعلاً يبقى اللاسيتي احسن بكتير