الموضوع: ارفض الإرهاب الفكرى

ياسيد سبعاوي
فكرتك في حد ذاتها لا غبار عليها وأتفق معك فيها ولكن بضوابط وشروط !!
نعم أنا مثلك لا أسمح لأحد أن يكمم فمي عن التعبير عن رأيي ولكن لابد من روابط لا بد من مراعاة مسلمات القيم المجتمعية وقبلها المعتقدات الدينية !!
وإلا لو هاعمم كلامك دا يبقى نقول نسيب كل اللي يشتم فينا وفي رموزنا يقول اللي هو عايزة تحت مسميات حرية التعبير والديموقراطية زي ماحصل في موضوع الرسوم المسيئة للرسول (ص)
والله ونا باكتب ردي عليك مش عايز أجيب سيرة الدين خالص علشان لا أُتهم بتوصيل الموضوع إلى حائط سد وإنما أردت تبسيط فكرتي معك من حيث الاتفاق في المبدأ والاختلاف في ضوابط التنفيذ !!

المشاركة الأصلية كتبت بواسطة casber

أخويا العزيز سبعاوى
انت راجل محترم جدا والحقيقة انا نفسي اقابلك واتعرف عليكى ، لانك متميز فى تفكيرك
لكن
لازم الواحد يكون ليه مرجعيه دينية يرجعلها
لكن كل واحد يقول رايه وهواه ومنسمعش الدين بيقول ايه هتبقى كارثه
والمثال اللى انته ذكرته هو للدنيا ومتاع الدنيا
والاصل ان كل شىء مباح الا اذا جاء دليل على التحريم
مش عارف انا قدرت اوصلك تفكيرى ولا لا
لكن اللى يكفر مسلم ده مش صح ابدا
وفيه علماء اجلاء معروفين بارائهم وفتواهم ، وبالتالى مش اى حد هوا اللى نسمعه او ناخد برايه فى الدين

لحد ديلوقوتى احنا مش مختلفين ، لأنى بتكلم فى الأساس على قضاية دنيوية بحته وليس مسائل دينية او مقطوع فيها برأى دينى، لكن المشكلة ان هناك تيار نجح اولا فى حقبة ماضية فى خلق حالة من الرعب لدى الناس من ان مصير الجميع الى جهنم وبئس المصير، ثم اصبح يمرر اى فكرة يريدها بسلاح الرعب من سوء العاقبة وكل من يفكر فى فتح فمه بالمعارضة فى مسائل قابلة للمناقشة يجد يجد تهمة الكفر والعلمانية والشيوعية جاهزة له فانقسم المعارضين الى قسمين، قسم يخشى ان يربط على ظهر الحمار بالمقلوب ويسير به المنادى فى شوارع المدينة معلنا الجميع بأنه كافر فيقفل فمه على رأيه المعارض، وقسم اخر لا يخشى تهمة الكفر وا يفتخر بها فيناقش مع تحمله التام لتبعات انه اصبح فى نظر الجميع كافر، وانا ارفض ان اكتم رأييى وارفض ان اتهم بالكفر، لذلك انادى بأن ترفع مقصلة الطرد من الملة عن كل من يعارض رائ فى مسالة مرتبطة بالكثير من الأمر الدنيوية اراد احدهم ان يمررة مستندا على ذريعة دينية

مثالين بسيطين جدا فى المناقشات المفتوحة على المنتدى: موضوع قضية غزة الذى هو بالأصل موضوع سياسى شديد التعقيد تم اقحام الدين فيه (ولن اقول من صاحب اليد الأولى فى اقحام الدين فيه على مستوى النقاش فى مصر كلها لكن الروابط معروفة بين من يحركون الأمور هناك ومن يحركون شريحة عظمى من الرأى العام هنا) ، واصبح كل من يجرؤ على مناقشة تبعات فتح الحدود هو خارج عن الملة لدرجة ان احد اعضاء المنتدى قالها صراحة انه يوجد عملاء لاسرائيل هنا وهناك، وتخيل مدى الرعب الذى يمكن ان يصيب من يقول الرأى المعارض من ان يتهم بأنه عميل لأسرائيل
والموضوع الآخر هو موضوع تحديد النسل الذى يخضع لمعايير لا آخر لها ومع ذلك تجد من يريد ان يمرر فكرة ان تحديد النسل مرفوض يحاول ان يكمم افواه المعارضين بمسألة الدين

أؤيد هذه الفكرة
فقد تكون القضية دنيوية بحته من الأمور المباحة وتجد من يحاول إثبات رأيه فيها عن طريق الإدعاء بمناصرة الدين له في رأيه

لو كان كلامه صحيحاً والدين يقف أمام رأيه ورأيه يتفق مع الدين (مش هينفع أقول الدين يقف خلف رأيه)
هنا نقول سمعاً وطاعة لربنا عز وجل ولنبينا المصطفى صلى الله عليه وسلم

أما أن تكون المحاولة عبارة عن فهلوة لإثبات الرأي عن طريق التمسح في الدين بأسلوب ملتوي
فهنا لابد أن نوقف ذلك الفهلوي الذي جعل الدين سلعة في يده يستخدمها ليعلي من نفسه الهابطة

المشاركة الأصلية كتبت بواسطة hh

مع احترامي الكامل للاستاذ سبعاوي و اهتمامي الشديد بأرائه التي تكون في اغلبها موضوعية,فأنا مختلفة معه كلية في هذا الموضوع. فين الارهاب الفكري في ردود الناس على الموضوعين اللي حضرتك بتقول عليهم؟ اصلا موضوع تحديد النسل حضرتك اللي فتحته و السؤال اصلا له علاقة مباشرة بالدين و بيسأل الناس في رأيهم الديني هل هو حلال ام حرام,يبقى طبيعي الردود تاخد منحنى ديني ما بين مؤيد و معارض.و موضوع غزة كمان موضوع سياسي صحيح لكن له شق ديني و قومي أيضا. و بعدين بغض النظر عن الموضوع ده أو غيره ايه المشكلة ان الناس ترد ردود ليها علاقة بالدين في أي موضوع؟ المفروض ان الدين الاسلامي لا يفصل بين الدين و الدنيا بل انه ينظم شتى امورنا الحياتية. ثم ان مش معنى ان حد بيقول رأي ديني يبقى بيكفر اللي يخالفه زي ما حضرتك بتقول, ده حتى الفقهاء بيختلفوا. و بعدين اللي يقول على حاجة انه شايفها ضد الدين ده رأيه و هو حر فيه و اعتراض حضرتك على الرأي ده حقك برضه لكن حضرتك كدة بتعترض على ابدء الرأي ده و هنا بقى اختلف معاك. كدة حضرتك بتشتكي أن الناس بتستخدم الدين عشان تسكت اللي يخالفها و حضرتك بتستخدم نغمة الارهاب الفكري بنفس الطريقة!!!!
و بعدين اسمحلي اعاتب حضرتك على استخدام لفظ "الارهاب الفكري", هو احنا حنعمل زي الغرب و اي حاجة ليها علاقة بالدين (الاسلامي بس) تبقى ارهاب؟ ما هو الناس بتختلف في السياسة و الكورة و الاقتصاد و و و و... حتى العربيات شوف الناس هنا في المنتدي بيقعدوا يجادلوا ازاي في الياباني و الاوروبي...الخ. يعني ينفع نناقش و نختلف في كل حاجة لكن الدين من المحرمات محدش يجيب سيرته؟ طبعا اهم ما في الموضوع ان محدش يصادر رأي غيره يعني اللي له رأي يقوله من غير أي تجريح أو تسفيه و ده في أي رأي مش بس لو ديني. يعني محدش من حقه يحجر على رأي غيره بحجة الدين, بس اللي عنده رأي ديني له أسانيد و ليس من دون معرفة حقيقية من حقه بل من واجبه انه يقوله واللي يختلف معاه برضه يرد بأسانيده و في الاخر اللي بيقرا له عقل و يقدر يكون رأي خاص بيه.

شكرا لردك ولإثرائك الحوار، وان كنت ارجوا ان تسمحى لى بالتعليق على بعض النقاط، فهدفى الأساسى من الموضوع ليس فرض راييى وتكميم افواه الآخرين ، ولكن مجرد الخروج من حالة الحصار الفكرى التى اعيش فيها حاليا لأننى كلما فتحت فمى لاقول راييى فى موضوع ما اجد كمامة الكفر والعمالة والتبعية والإنبطاح جاهزة لسد فمى ، سواء كان ذلك على منتديات الإنترنت او فى محيط العمل او الأسرة

بالمناسبة فلست انا من فتح موضوع تحديد النسل، انا فقط كان لى مداخلة او اكثر فية، لكن على ذكر هذا الموضوع ففيه ظاهرة غريبة جدا هناك، عدد المصوتين حتى هذة اللحظة فى صالح تحديد النسل(المسالة التى يراها البعض حرام) اكثر من عدد المصوتين لصالح حرمانية تحديد النسل، ومع ذلك ستجدين معظم المداخلات لأاصحاب الرأى القائل ان تحديد النسل حرام ، وهذا يقودنى الى تدعيم نظريتى القائلة ان هناك الكثيرون ممن يحجمون عن قول رأيهم، خوفا من الإتهامات فى دينهم ، فاكتفوا بالتصويت، ولو نظرت لما يطبقة الناس حولك ستجدين ان معظم الأسر حولك تحدد النسل مما يدل على ان هناك المزيد ممن يؤمنون بفكرة لكن يرفضون الكلام فيها خوفا من المقصلة التى كممت جميع الأفواه

اما عن مثال غزة فكما ذكرت بوضوع ان الأمر وصل للتليمح بوجود عملاء لاسرائيل هنا وهناك، والمقالة التى نقلها احدهم تتهم جميع من يعارض الراى القائل بفتح الحدود وتحمل الضرب على قفانا بالتصهين ، يعنى انا لو شايف ان مصلحة بلدى واهلى تقوم على ترشيد مسألة فتح الحدود يبقى حاجة من اتنين ، يا إما اسكت واحط لسانى فى بقى يا إما اقبل تهمة التصهين ، طب بالذمة ده اسمه كلام ؟وهو مثال لما اعنية بالإرهاب الفكرى

لما اقصد بكلمة الإرهاب الفكرى ان اقلد الغرب وامريكا ، لكن قصدت بها التعبير عما اشعر به من تكميم بسبب احتكار الدين من قبل البعض وتحول الكثير من المتعلمين المصرين الى ابواق تردد كلامهم باعتبار انه صحيح الدين وما عداه كفر بين، خاصة ان الكثير من أرائهم تكون مبنية على اجتزاء بعض النصوص الدينية وترك الآخر الذى يعارض ما يقولون، لكن نظرا للتأثير الإعلامى الواسع لخطاب هؤلاء البعض فإن من يجرؤ على معارضتهم حتى لو كان ذلك بنصوص دينية فانه يتحول لزنديق وكافر ،مع ان من تعلمنا عنه ديننا كله رايناه فى كثير من مواقف حياته يتراجع عن رايه ليأخذ بالرأى الآخر كما اوردت فى مداخلتى الأولى

وعلى هذا فمن كان فكره معارضا لسياسة البعض التى قرر تمريرها بنصوص دينية عليه ان ينافق المجتمع ويتظاهر بالإقتناع بعكس ما يراه مناسبا لأن سيف الطرد من الملة مسلط على رقبته، او ان يجاهر برايه المخالف للسائد ويتهم بالكفر والإنبطاح والعمالة وجاحات تانية كتير جدا

الخلاصة ان اعتراضى ليس على وجود المرجعية الدينية ولكن اعتراضى على تخويف الأخرين بالدين ومقصلة الألقاب المرعبة التى يتم اطلاقها على من يخالف رأيا هو فى النهاية يخص مسألة دنيوية

وانا لن اكون منافقا ، وفى نفس الوقت لن اقبل اتهامى بالكفر، ولهذا ارفض هذا النوع من تكميم الأفواه والإرهاب الفكرى

بيقى ان اضيف ان اتهامك لى بممارسة الإرهاب الفكرى -الذى انتقده-على الأخرين هو اتهام على شئ من الظلم لأننى لم اطلب تكميم افواه الآخرين ولم اسعى خلفه لكن كل ما اسعى خلفه هو رفع الكمامة عن فمى انا

يا أستاذ سبعاوي فين تكميم الأفواه اللي بتتكلم عنه ، وفين التكفير اللي بتقول عليه
أرجو إعطائي مثال على حدوث ذلك ، بالعكس ياأخي دا أنا اللي حاسس إن في "سوليتيب " على فمي ومش عارف " أتبحبح " في الكلام علشان لا يُقال إن كل حاجة بتتقلب للدين !!