الموضوع: محتار فى صفقة تبادل سيارات

لما عرفت إن السيارة الإلنترا نزلت 3000 جنيه فى معرض أوتوماك قلت فرصة أشتريها زيرو أحسن لكن المدام لما عرفت كده قالت

هقول لبابا الأول علشان ما يزعلش ، فلما قالتله إن الإلنترا نزلت 3000 جنيه هتبيع ولا هتعمل إيه .. طبعا الراجل اتصدم وعرفت

إنه أصلا كان ناوى يكرمنى ويبعلى كسر الزيرو أقل 3000 جنيه عن سعر الزيرو وده طبعا مش عرض مغرى وبالطريقة دى طبعا

حماية قال مش هبيع واشتروها من المعرض .. وبكده عرفت كان بيفكر فيه حماية فى تقديره لكسر الزيرو وعلى العموم كده

يبقى الموضع انتهى من ناحية عربيته وبقى عندى حرية أشترى من أى مكان .. ويبقى كده فاضل عربيتى عربيتى اللانوس إللى

هو لسه متمسك بيها وكان كلامه إنه هيشتريها زى سعر السوق لما نجيب واحد أو أكتر يفصلها .. وبصراحة أنا مش مستريح قوى

للموضوع ده لأنه نسبى جدا وكل واحد له رأيه .. بس الرأى الأخير لصاحب العربية ومدى تمسكه بالسعر اللى شايفه مناسب

ومش هيتنازل عنه .. بس هقول إيه هو فى الأول والأخر حماية ومش عايز يكون شكلى وحش ... المدام لما آخد رأيها فى

الموضوع ده بتقولى ما ليش دعوه تبيع لبابا أو لحد تانى إنت حر ما تدخلنيش فى الموضوع .. طبعا هى عندها حق لأنه أبوها وأنا

جوزها .. لكن طبعا لو كنت هبيع لحد غريب كانت هتتمسك معايا بالسعر اللى انا عاوزه لأن دى مصلحتنا إحنا الاثنين ... على كل

حال أنا هروح معرض أوتوماك وأتفرج تانى على العربيات .. وبرضه مش هسبق الأحداث و هفصل عربيتى يمكن تجيب السعر

اللى أنا عاوزه خصوصا إنى لسة جايبلها إمبارح فردتين كاوتش أمامى هانكوك كورى جديد كلفونى 450 جنيه لأنى كنت ناوى أسافر

اسكندرية اليومين الجايين .. وطبعا لو جبت الإلنترا يبقى هسافر بالإلنترا .. ولا أستنى لما أستهلك الكاوتش الجديد .....

ههههههههههههه ... طبعا بهزر ... أنا مراعى العربية أول بأول ولو كانت محتاجة حاجة قبل ما بيعها بيوم هعملها بدليل إنى جبت

كاوتش غالى شوية على الرغم من إنى هبيعها قريب وكان قدامى البريللى التركى عليه عرض الفردتين عاملين 220جنيه ..

وكمان غيرت طقم سيور وزيت باور علشان هى عدت 40 ألف وما قلتش ما دام هبيعها يبقى اللى هيشتريها يغير هو بقه .. الحمد

لله أنا مهتم بالعربية والمشكلة الوحيدة فيها هى الصاج بتاعها متخبط كتير وأغلبه وهى واقفة وده مش بإيدى ولو كانش موضوع

السمكرة والدوكو هيقلل من تمنها أنا كنت عملتها .. بس عندنا فى مصر يقولك ما دام العربية رشت يبقى فيها عيب .. أهو

العربية هى لا رشة ولا حاجة ومبروك على اللى هيخدها بخبطتها ما دام ده بيرح الزبون علشان يتأكد إنها فابريقة ..

قريبا هبلغكم بنتائج زيارتى للمعرض وتقييم سيارتى اللانوس ...

الحمد لله حجزت سيارة إلنترا كاملة مانيوال من معرض أوتوماك .. بصراحة المعرض كان جامد قوى وخصوصا عرض الجيب رانجلر

الجديدة خطير جدا ...

لما رحت المعرض كنت محتار أختار ما بين الإلنترا والسيراتو وأجيب الأوتوماتيك ولا المانيوال ... لكن بعد لما عاينت السيارتين

كويس فى المعرض وركبتهم وتفحصتهم كويس لقيت فعلا إن السيراتو توأم الإلنترا اللهم إلا فى الشكل .. لكن الحق يتقال كنت

مستريح نفسيا أكتر للإلنترا لأنها أوسع وأريح وكمان باور الإلنترا كهرباء أما السيراتو زيت وعفشة الإلنترا أفضل .. لقيت إن

السيراتو علشان تكون فعلا جميلة وتستحق لازم أجيبها هاى لاين وأعلى فئة لكن لما استقريت على المانيوال حسيت إن مش

هتفرق وإن الإلنترا هتكون أفضل مع التضحية بشكل السيراتو الجميل والحقيقة تتقال برضه الإلنترا شكلها جميل كل عربية من

الآخر ليها شكلها وطابعها الخاص والجمال مسألة نسبية مسألة أذواق .. لما قررت أختار المانيوال علشان أن بحب الشد و الجرى

ومش عايز أوتوماتيك يتحكم فيا .. قلت يبقى الإلنترا أحسن لأنى لو اخترت السيراتو يبقى علشان الشكل بس لأنى زى ما قلت

قبل كده لو هختار السيراتو لازم تبقى هاى لاين غير كده يبقى ما فيش داعى والإلنترا توفى بالغرض والموتور واحد والقوة واحدة

ومش مهم بقى إن شكل الإلنترا هتغير فى موديل 2011 لأن طبعا ده هيكون قدامه أسعار أعلى ...

وبكده اتحلت مشكلة شراء السيارة الجديدة ويتبقى بيع السيارة اللانوس وإللى محتار فى تقييمها حتى الآن علشان دى هتكون

لحماية .. ربنا يسهل بس وأستلم الإلنترا بعد أسبوع زى ما قالولى فى المعرض ..

عندى شوية استفسارات للناس اللى عندهم الإلنترا

1- السيارة المانيوال ما فيهاش فوانيس شبورة ... سألت البياع من غبور قالى ممكن تركبهم فى التوكيل بـ 800 جنيه والسؤال هل ده بيحتاج تغيير ذراع الفوانيس ولا هى التوصيلة معمول حسابها فى الضفيرة .. وهل ممكن أشترى فوانيس الشبورة من بره عن بتوع قطع الغيار أرخص ..

2- عايز أغير الجنوط العادية بجنوط هيونداى النترا اسبور ... يعملوا كام ولم هبيع الأصلى العادى بتاع العربية أول لما أستلمها يجيبوا كام والطاسات الأصلى يجيبوا كام ..

3- ممكن أركب وحدات رفع زجاج فى التوكيل ولا ما عندهمش أصلا

4- هل تكييف الإلنترا كويس .. علشان أنا اللانوس بتاعتى تكييفها تلاجة وسريع جدا

مع خالص الشكر للجميع ..

بص أنا رأيى انك تجرب تسوق الالنترا الاتوماتيك و تشوف سحبها و الكيك داون بتاعها .. عشان أنا متأكد انك هتغير رايك فى الاتوماتيك .. و فى نفس الوقت هتكون فيها الكماليات اللى انت عاوزها.