الموضوع: متى سينتهى مسلسل حوادث كورنيش الاسكندرية

هو اكيد لازم يبقى حل من 3

1- زيادة اعداد الأنفاق وقربها من بعض
2- انشاء سور حديد عالى بطول الشارع فى منتصف الطريق بين الأتجاهين
3- يبقى فيه بين كل نفق والتانى ميكروباص صغير يبقى تابع للمحافظة يركًب الناس ويعديها الحهة الأخرى

انا حماتى ساكنة على البحر فى سبورتنج عند اوسع منطقة وكل يوم والتانى بشوف حوادث بشعة لغاية لما نحست من رؤية المناظر دية

والله المعاناة مشتركة بين المشاة وقائدى السيارات ( الملتزمين منهم طبعا ) السواقة على الكورنيش بشكله ده معاناة وانا لما باضطر اسوق عليه باقرأ الفاتحة على روحى وروح اى حد هايفكر يعدى امامى من المشاة ( المعذورين فى كتير من الاحيان )
تخطيط الكورنيش وعدد حاراته شئ شاذ وغريب لا يصلح لمدينة وانما لطريق دولى ... وحتى الطريق الدولى الساحلى حاراته أأقل من الكورنيش
انا اتعرضت لمواقف كتير جدا على طريق الموت ده ( الكورنيش ) المغطى بدماء الاف السكندريين والمصطافين اللى فكروا يعدوا منه
وأكتر من مرة كنت هاشيل حد من المشاة ومش انا الغلطان والله وملتزم بسرعتى القانونية وباهدى كمان لما بالاقى حد هايعدى رغم خطورة ده عليا من الاخوة بتوع الغرز لكن باقول انقاذ الارواح اهم من الحديد

مرة بنتين من المصيفين عند لوران تقريبا قامو ا بمحاولة العبور الانتحارية ووصلوا للجزيرة الوسطى قطعوا نص الطريق وعايزين يكملوا للبحر وكنت شايفهم من بعيد وكان الطريق مش زحمة قوى وعدو من اول حارة والتانية كنت فيها ريحت رجلى على الفرامل شوية وعديتهم لكن للاسف الحارة التالتة الى بعديا كان فيها عربية جاية بسرعة فوق ال100 كيلو
وفى لحظة الانستين الفاضلتين رجعوا ليا فى الحارة الثانية بعدت ما كنت هاكمل طبعا فرملت خطر والعربية كانت هاتلف منى وادخل فى الجزيرة وفى عربية كانت مسرعة فى الحارة اللى شمالى وكان معايا الاولاد اتخبطوا وعياط وصويت كل ده فى اجزاء من الثانية والانستين خلاص هادوسهم ... واحدة جريت بسرعة ورجعت الجزيرة والتانية تخيلوا عملت ايه ؟؟؟!!

قعدت فى الارض والله فى حارتى من خضتها و مستنيانى اجيلها
المهم ربنا ستر وكانت الاضرار فى اقل الحدود ووقف الطريق على صوت فرملتى والحمد لله العربية ما زحفتش ناحيتها والا كنت هاعيش بذنبها رغم انى ماليش ذنب فى اللى حصل ...
ربنا يهديك يا اللى فى بالى .. وكل لبيب بالاشارة يفهمُ.

المشاركة الأصلية كتبت بواسطة baskota

يا محمد بيك اولا مبروك عالماجيستير
سور حديد يعنى الناس متعرفش تعدى
طيب هتمنع الناس تعدى يعنى تجبرهم انهم يروحوا يعبروا الانفاق اللى هى على مساافات بعيدة جدا
او كل الناس تركب تاكسى عشان ينزلهم قدام المكان اللى هم رايحينه
كمان خلينا نتكلم بصراحة كام واحد بيلتزم بالسرعة اللى هى 60 ك فى طريق مغرى زى ده
ده طريق مصر اسكندرية الصحراوى اضيق منه
وطبعا صعب يزودوا الانفاق لانهم مش هيحفروا تحت الطريق كله
هو مش احنا المواطنين ومن حقنا نعيش فى امان
عاوزين اشارات الكترونية.... عاوزين مرور حازم
هو حد بيشوف عسكرى مرور واحد عالكورنيش فى الاماكن ذات السعة المهولة دى
الى متى ستستمر هذه المأساة ؟؟
لحد ما يموت ابن وزير ولا رجل اعمال!!!


يا بختك نحست
انا مش بستحمل منظر الدم
انا شوفت الحادثة اغمى عليا

الله يبارك فيكى ... الف شكر
لما بقول سور حديد فى النصف علشان فعلا نجبرهم انهم يعبروا من الأنفاق
بدون مبالغة 80 % من الحوادث اللى بشوفها بتكون قريبا جدا جدا جدا من الأنفاق
ده حتى احيانا بتكون فوق النفق نفسه وده شوفته كذا مرة من البلكونة

السنة اللى فاتت كنت فى فرنسا .. وكان فيه طريق شبيه لطريق الكورنيش بتاعنا ولما كنت بحب اعدى الشارع كان بيبقى فيه نقاط معينة على الطريق فيها اشارات انا اللى بدوس عليها علشان اعدى ولما اوصل لمنتصف الشارع ادوس على الأشارة تانى ..الأولانية تفتح واللى ح اعدى منها تقفل علشان اكمل تعدية ... حد فهم حاجة :)

ياريت موضوع الأشارات الألكترونية يتنفذ عندنا ....
عادل بك لبيب كان منفذ الأشارات الألكترونية فى دمنهور قبل ما يمسك الأسكندرية وكانت كلها اشارات اتوماتيك وبالثانية وتصور المخالف كمان ......

بصراحة اى حد يفكر يعدى الكورنيش على رجله يستاهل الى يحصله

لو حكمت ممكن الناس تركب تاكسى لحد اقرب نفق غير كده تبقى مخاطرة

المشاركة الأصلية كتبت بواسطة eng.m mahran

بصراحة اى حد يفكر يعدى الكورنيش على رجله يستاهل الى يحصله

لو حكمت ممكن الناس تركب تاكسى لحد اقرب نفق غير كده تبقى مخاطرة

وفين حق البنى ادم اللى عايز يعدى يروح يشوف حاله !!

هيقعد بقا رايح جاى يركب فى تاكسيات تعديه الناحيه التانيه , يا فندم اللى بيعدى من مكان مش ملزم انه يمشى كيلو علشان ينزل من نفق يعدى منه

ده فضلا عن ان النفق ده اصلا وسيله لا تلائم ابدا كبار السن والمعوقين ولو حد عدى من فوق وهو جنبه النفق برده ليه العذر زى كبارى المشاه ام ارتفاع 4 ادوار اللى بتتعمل على الطرق السريعه بالظبط

يبقى العيب عيب تخطيط مش عيب مواطن يستاهل