انت دلوقت معاك العربية و عرفت عيوبها فتعامل مع العيوب وتلاشى الوقوع في مشكلة بسبب العيوب وده شئ جميل انك تعرف حدود العربية اللى راكبها وحاول تكتشف وتحدد المميزات الموجودة بالعربية و تستمتع بها وتتعايش معها وترضى بها،لأن مفيش حاجة كاملة في الدنيا لأنها من صنع الإنسان والكمال لله وحده.
و من خلال خبرتي فى عالم السيارات فلقيت ان كل العربيات اللى موجودة على وجه الأرض لازم تلاقى فيها حاجة ناقصة او مش حترضيك او تلاقى شئ مؤاخذ عليها، بدءا بأرخص سيارة ممكن تتخيلها و انتهاءا بأغلى عربية على وجه الارض.
ومش لازم تكون العربية الغالية بها كل شئ تتخيله اعلى فى الأداء من اخرى رخيصة او انها تشتمل على كل شئ موجود فى اي عربية اخرى.
بس الإختلاف بين البشر يتمثل فى الحاجة اللى كل واحد بيدور عليها وعايزها فى العربية اللى يتمناها او يمتلكها
يعني مثلا واحد عايز عربية صاجها جامد وواحد تاني عايز عربية تكييفها حكاية وواحد اخر بيدور على الصالون الواسع و اخر بيدور على الرفاهيات بالعربية وواحد بيدور على اتزان العربية وواحد بيدور على صغر حجم العربية و اخر بيدور على توافر قطع الغيار او رخص ثمن قطع الغيار و اخر بيدور على العربية اللى بتحافظ على ثمنها قدر الإمكان عند البيع واخر عايز عربية رخيصة الثمن وواحد عايز عربية اقتصادية فى الوقود وواحد عايز عربية موتورها جبار وواحد عايز عربية تستحمل المطبات وواحد عايز عربية يكون شكلها مميز ونادرة وواحد عايز عربية روحها خفيفة وعملية.
لولا اختلاف الأزواق لبارت السلع