الموضوع: مخالف وماسك الشمال ومنور النور فى مدينة العبور الفاضلة

امبارح يا اخوانى الاعزاء حدث فى العبور مايلى
فيه شارع هادى قبل مساكن الشباب وبالمناسبة هو شارع المدارس فى العبور
كنت ماشية بعد المغرب بشوية كدة وفى امان الله الاقى واحد لطيف اوى ماشى فى الاتجاه المخالف وماسك الشمال وكأن الشارع رايح جاى وانا اللى مش عارفة ومنور النور وانا برده منورة النور بس لان ده طريقى يعنى لازم انوره او الله يسامحهم اللى علمونى قالولى كدة
طبعا توقعت انه على الاقل يطفى النور ....... ابدا لحد مابقينا فى وش بعض فقررت انى ارمى ناحية الشمال علشان يحس ان فيه حاجة غلط
تخيلو بقى تصرفه يكون ايه
طبعا اكيد فى نفسيته كان حاسس ان اللى بيسوق قدامه ده شخص متخلف ولازم يعلمه الادب
قام رامى عليه هو كمان فى حركة استعراضية علشان طبعا احرم اعمل كدة واحترم كل اللى هو عامله ده وامشى واقول دع الخلق للخالق
لما جيت جنبه باقوله يعنى ماشى مخالف وماسك الشمال ومنور النور ومش عاجبك
تخيلو ولا بص ولا اعتذر ولا كإن حاجة حصلت
انا عايزة اعرف ايه التصرف اللى المفروض اعمله فى موقف زى ده خصوصا ان الشارع ده بقى اللى بيمشى فيه مخالف اكتر من اللى بيمشى فيه صح
يعنى اخد نمرهم واعملهم محاضر مثلا والا ابلغ جهاز المدينة والا ماروحش انا الشوارع دى تانى
معلش طولت عليكم بس عندى امل كبير ان شبه البنى ادم ده يكون بيدخل المنتدى ويقرا الموقف ده
وبعدين برده انا متغاظة جدا وحاسة انى كان المفروض احرق دمه بس بنتى كانت معايا وانا ماحبش اعرضها للمواقف دى
فى انتظار ردودكم واتمنى من كل قلبى ان محدش يقوللى انى كان المفروض اقلبله علشان ياخد باله لانى كدة ابقى باقر بشكل رسمى ان الشارع اتجاهين وفى انتظار الردود برده

التصرف السليم ممكن حضرتك توقفى العربية بحيث إنها تقفل الشارع و إعملى إنك بتدورى على حاجة و ممكن تبطلى العربية و تقولى إنها بطلت لوحدها

المشاركة الأصلية كتبت بواسطة محمد عز

تعقيبا على الجمله ده

نور المصابيح الامامى درجتين

درجة اولى او واطى (كما يحب البعض تسميته) والدرجة الثانيه النور العالى

طول ما انتى ماشيه بليل سواء الطريق منور او ضلمة لازم تكونى مشغلة النور الواطى لعده اسباب

تعزيز الرؤية لاعتبارات السلامة الغائبه عن الطرق المصريه
عند التقاطعات لتفادى الحوادث لان اللى جاى فى الطريق المتقاطع عليكى هيقدر يشوف تور المصباح الامامى فيعرف ان فيه عربيه جايه والعكس صحيح

لكن الوضع الشائع فى مصر

ان معظم السائقين يطفوا النور الواطى وساعه لما يحب يستخدم النور يستخدم النور العالى وده طبعا اكبر غلط

حاجة كمان النور بالواطى بيتقاد عشان الناس تعرف تشوف العربية مش فى التقاطعات إنما فى الطرق العادية