الموضوع: هي فوضي ؟!

السلام عليكم

دلوقت يا جماعة احنا عندنا جراج في الشارع كان الشارع كله بيركن فيه .. و لكن اللي حصل ان ارض الجراج دي اتباعت .. و اللي اشتراها واحد من حيتان مافيا سيارات التاكسي .. و قرر انه يطلع كل العربيات برة الجراج و يخلي الجراج مقتصر علي عربياته التاكسي بس .. تيجي التاكسيات مرتين في اليوم تغير الورديات و تتغسل و تدي حصيلة اليوم و الناس اللي ساكنة في الشارع يولعوا بجاز .. و بقينا ننام و نصحي علي خناقات سواقين التاكسي مع بعض ومع مالك العربيات (بتاع 30 تاكسي تقريبا !) .. رحت اتكلم مع الراجل قاللي و الله معنديش مكان للملاك ده المكان يادوب مقضي عربياتنا بالعافية .. اتجهنا لأننا نركن العربيات تحت العمارة .. سكان العمارة ظهرت عندهم مشكلة جديدة و هي الخناق مع المحلات اللي فاتحة تحت العمارة ! لأن محدش عايز حد يركن ادام المحل بتاعه و يسدهوله (طبعا حقه) .. و لكننا قلنالهم استحملونا الفترة دي نشوف هتخلص علي ايه .. و المشكلة اني كل ما انزل الاقي المنظر مرعب .. اكصدام لازق فيا من ادام و اكصدام لازق فيا من ورا .. مستحيل بكل المقاييس العربية تطلع الا لو العربية اللي قدامي اتحركت .. و عشان العربية اللي قدامي تتحرك لازم اللي قدامها تتحرك ! و هكذا .. ! و بقي من المستحيل الخروج بالعربية بعد الساعة 6 .. و المشكلة ان مفيش جراجات فاضية قريبة من البيت .. اقرب جراج فيه مكان هبقي محتاج تقريبا اخد تاكسي لغاية عنده !

و لذلك انا و والدي محتاسين مش عارفين نودي العربيتين فين .. خاصة انا بوصل والدتي الشغل الصبح .. و هي عندها التواء في القدم مش هعرف امشيها لغاية جراج تاني لازم اروح اجيب العربية و ارجع بيها البيت .. و ده معناه اني لازم انزل بدري ساعة الا ربع مثلا عشان اضمن اعرف اخرج العربية و تتمسح و الذي منه و ارجع بيها .. و اخرج تاني .. و ده معناه اني بدل ما بصحي الساعة 7 المفروض اصحي الساعة 5 بعد كدة ولا حاجة !

اللي انا عايز اعرفه هو من حق صاحب الجراج انه يقصره علي التاكسي بتاعه بس ؟
هو مفيش اي قانون اي حاجة بينظم احقية و اولوية السكان و الملاك في الخدمات اللي في الشارع .. و لا اي حد كدة ييجي يشتري الجراج اللي قدام بيتنا و يطردنا منه !؟