الموضوع: المحترم المهندس حاتم و تقرير السبع صيانة 15000 و المفاجأة

المشاركة الأصلية كتبت بواسطة largeman

طبعا ً انا لسة جاي دلوقتي من سفر ساعتين من مركز السبع في زهراء المعادي و ده تقريري عن صيانة 15000

أولا ً : انا احب ان اشكر و بكل فخر المحترم المهندس حاتم اللي بصراحة الواحد و لأول مرة في حياتي اقابل شخص بصراحة من الصعب ان الواحد يلاقي شخصية زي حضرته في وقتنا الحاضر .. المهندس حاتم يتعامل و بكل حب اكثر من اخ و متابعته للاعمال اللي اتعملت في العربية اننهارده اتصل بيا اكتر من 6 مرات اننهارده ده غير متابعته للمهندس المحترم / محمد عمر و المهندس المحترم / كريم اللي فعلا شوفت محبتهم الحقيقية للمهندس حاتم حتي بعد عمله في مكان أخر في وقتنا الحاضر وده ان دل علي شيئ فيدل علي الانطباع الرائع اللي تركه المهندس حاتم قبل مغادرة السبع اوتوسيرفيس
معلش انا طولت لكن الوحد لازم يعطي حق الناس المحترمة ديه و خصوصا اخويا الحبيب المهندس حاتم.

ثانيا ً : صيانة 15000 :-
انا كنت طبعا رايح التوكيل و كان معايا لستة مشاكل بالعربية و هعرض كل حاجه كانت في اللستة و كيفية التعامل مع كل بند .
العربية دخلت بعد ساعة من وصولي للتوكيل و انا بصراحة عذرتهم لأن اننهارده كان التوكيل زحمة موت
المشاكل اللي كانت مقبلاني :

1- الكلاكس لا يعمل جيدا ً .
تم التعامل مع الهدف بنجاح و تم تغيير فردة الكلاكس البايظة .
2- الهاندبريك خفيف .
تم ضبط الهاندبريك لأنه كان خفيف جدا و بيرفع بزياده .. المهم انه اتظبط و بقي كويس
3- العربية بتسحب بنزين غير عادي متوسط من 135كيلو حتي 160 كيلو في الصفيحة
طبعا كنت رايح متضايق اوي من الموضوع ده جدا لكن المهندس عمر قالي احنا دخلنا العربية علي الكمبيوتر و برمجوا حاجات كده هوايات و حاجات مش فاهمه لكن المختصر قالي جرب تفول العربية و تمشي بيها 200 كيلو و بعدين تفولها تاني و تمشي بيها تاني 200 كيلو بس علي 90 و الار بي ام ميزدش عن 3000 عشان نعرف هل العربية فعلا بتاكل بنزين بعد تظبيط الكمبيوتر ولا ايه. و علي فكرة هما فكوا بوجيه عشان يشوفوا حالة ضفيرة الكهربا فوجدوا علي حد قولهم ان البوجيه حالته كويسه .. فأنا مش عارف بقي انا هجرب و هنشوف .
4- الدركسيون بالعربية يحدث به ثقل في الحركة في بعض الاوقات .
تم التعامل مع الهدف بنجاح عن طريق الرجلاش منها الدريكسيون بقي خفيف و الخبط اللي كان قدام اتلغي تماما ً
5- المساعد اليمين في الخلف ثقيل في المطبات . (العربية بتتهبد عند النزول من المطب).
و ده برده كان مضايقني جدا لكن فعلا كله بقي تمام لاقيت المهندس بيقولي ان العفشة كانت عايز تتربط كويس و الحمدلله فعلا العربية بقت كويسة جدا في المطبات .
6-النور العادي في الكشاف اليمين عالي من يوم شراء العربية حتي الآن و العيب لم يصلح رغم مجيئ للتوكيل من قبل :
طلع ان اللمبة كانت متركبة غلط و فعلا لما ظبطوها النور بقي تمام.
7- ميل بالعربية من الناحية الشمال من الخلف :
المهندس قالي في ناس جاءوا قبل كده عشان الموضوع ده و قالي ده عادي و هو ده تصميم العربية .

.... علي فكرة انا ركبت النهارده في التوكيل صدادات هواء للاربع ابواب لعربيتي صني و كان تمنهم بالتركيب 145 جنيه و طلعوا حلوين اوي ز و جبت يد جلد للفتيس الاوتوماتيك و سعره 25 جنيه.
.... كنت هركب سينيور باركينج 4 عدسات لكن التوكيل كان زحمة و كان هيبقي صعب تركيبه النهارده و كان تمنه 375 جنيه بالتركيب و رشه باللون العربية كمان .
.... من الاسعار اللي لفتت نظري شاشة عرض بتدخل و تطلع مكان الكاسيت تمنها 900 جنيه

ده كل اللي حصل اننهارده في التوكيل

....* علي فكرة التوكيل دلوقتي بقي في كماليات جميلة اوي للنيسان صني و التيدا و اسعارها في المعقول و بصراحة انا طلبت من الادارة انهم يدوني price list للكماليات لكن الادارة موفقتش مع اني قولتلهم اني هعرضها في المنتدي .. علي العموم كل ادارة و ليها منظومتها اللي تحترم من قبل اي حد .

ثالثا ً المفاجأة :
اننهارده اصبح لي صديق جديد عزيز جدا و في حوارنا مع بعض بكارفور المعادي .. كنا مشتركين في الرأي في حاجات كتيرة جدا في شخصيتنا و بصراحة انشان محترم و مهذب الي ابعد الحدود و هو الاستاذ (أحمد مصطفي ) و بصراحة شخصية طيبة و محترم جدا و لما قعدنا مع بعض و لمدة ساعتين كاملين كنت حاسس اني اعرفه من زمان . فدي طبعا ً احلي مفاجأة ليا النهارده و مش ببالغ لو قلتلكوا ان لما التقيت بالشخصية كان اسعد حاجه في يومي النهارده .
الواحد بصراحة بيفرح اوي اوي لما بيقابل شخصيات حلوة كده و بصراحة النهارده برده اتصل بيا كتير اوي ليطمأن علي العربية في التوكيل و ايه الاخبار .
انا كسبت صديق جديد النهارده و علي فكرة كمان مش صديقين فقط بل اسرتين كمان حيث ان مدام الاستاذ احمد و المدام بتاعتي تبادلوا مكالمة تليفونية اليوم و دي برده كانت يعني حاجه كبيرة اوي بالنسبة لأسرتي و ربنا يكمل المحبة دي علي خير انشالله .

ممكن اعرف من حضرتك اة هي الصدادات
وبخصوص الشاشة ماهي
وهل بتركب علي الكاسيت

و حضرتك دفعت كام في الصيانة دي؟؟

المشاركة الأصلية كتبت بواسطة k_morsy

هو المهندس حاتم لسة ليه علاقة بالسبع ...

المهندس حاتم لا يعمل حاليا ً في السبع .. لكن هو صديق عزيز عليا و متأخرش عليا لما قولتله اني هروح اعمل صيانة 15000 و في حبة مشاكل في العربية .. فبصراحة قام بالواجب و انا بشكره علي المحبة الغالية ديه

المشاركة الأصلية كتبت بواسطة dahmedsamir

الف شكر على التقريرو عقبال ال500000 و كنت عاوز اعرف انطباعك عن الصنى بعد ال 15000 الف كيلو هل لو رجع بيك الزمن هتشتر الصنى برضة و لا هتفكر؟؟؟ لانى مقبل على الشراء و خايف من التقفيل المصرى اوى بعد فترة يعمل مشاكل
و ربنا يباركلك فى عربيتك و يكفيك شرها.......د احمد

بص يا دكتور احمد نصيحة انك تشتري صني و انطباعي للعربية بعد 15000 رائع جدا و متنساش انها عربية ياباني و محترمة جدا و متقلقش خالص

المشاركة الأصلية كتبت بواسطة ahmed.tv

اولا انا اللى سعيد جدااااااااا يا بيشوى بجد بمقابلتك والتعرف عليك وعلى اسرتك الكريمة , وباذن الله يكون فى تواصل دايم بينا , وانت شخص محترم جدااااااااااااااااااااااا اااااا , , وفعلا اجمل حاجة ان شخصيتنا متقاربة مع بعض جدا , وبعدين فعلا انا مكنتش عاوز اسيبك وامشى تانى والله بس زى ما انت شوفت عشان كنت سايب الشغل وكنت مضطر ارجع تانى , بس المرة الجاية حيكون يوم طويل وبعد المقابلة حنكمل اتفقنا مع بعض وحيكون فى تواصل بينا دايما ,
وزى ما قولت يابيشوى فعلا كنت حاسس انى اعرفك من زمان , وده بسبب الطيبة اللى جواك , وفعلا كنت منور القاهرة , والحمد لله انك عملت الصيانة على خير , وعقبال صيانة المليون
ومرة تانية انا ليه الشرف بجد انى اتعرفت عليك وعلى اسرتك الكريمة , وفعلا اجمل شى انك تلاقى اخ وصديق محترم جدا وابن ناس واصل زيك
وكان يوم جميل بيك بجد

تقبل تحياتى
اخوك احمد مصطفى

انا مش عارف اقول ايه علي الكلام الحلو ده .. بس انا مبسوط فعلا بكسبي صديق عزيز جدا ليا

المشاركة الأصلية كتبت بواسطة atefadel

ممكن اعرف من حضرتك اة هي الصدادات
وبخصوص الشاشة ماهي
وهل بتركب علي الكاسيت

الصدادات حضرتك دي بتتركب فوق قايم زجاج العربية بحيث انه يعيق الهوا انه يدخل علي عربيتك و في حاجه انا حاسس هيظبطها برده ان المطر ميدخلش العربية برده لو عايز تفتح الزجاج و الدنيا بتمطر
بالنسبة للكاسيت في انواع كتيره هناك انما بالنسبة اللي قولت عليه هو عباره عن جسم كاسيت عادي بيركب في العربية و بيطلع و يدخل منه شاشة عرض صغيره بحيث توصل عليه اي جهاز دي في دي بوصله فيديو و اوديو ان .... و تمنه 900 جنيه

المشاركة الأصلية كتبت بواسطة ouba2

و حضرتك دفعت كام في الصيانة دي؟؟

المشاركة الأصلية كتبت بواسطة د.محمود صلاح

حكاية الميل البسيط من الجانب الأيسر الخلفي دي مش طبيعية !!..

بصراحة يا دكتور محمود انا لاحظت بعض العربيات النيسان فيها نفس الموضوع ده بس هو مش ملحوظ اوي و علي العموم انا هقيس المسافة من النحيتيين و اقولكم ايه الاخبار