السلام عليكم، موضوع العفشة ناشفة او طرية ده امره سهل و حله فى الأتي:-
- فحص المساعدين الأربعة و إذا كانوا حركتهم ثقيلة(مقصدش بايظين) بل طبيعتهم كده،فممكن تستبدلهم بأخرين ناعمين الحركة.
- فحص اليايات الأربعة و لو كانوا ناشفين و معصصبين فممكن برده تركب بدلا منهم يايات طرية و حلقاتها ذات ثمك ارفع حتي تحصل على سلاسة الحركة.
- فحص عامودين الإلتواءsway bars فى الأمام و الخلف ولو كانوا بيرججوا العربية جامد و مكتفينها فى المطبات من الميلان يمينا ويسارا بهدوء فممكن تستبدلهم بعواميد التواء ذات قطر ارفع فتحققلك نعومة فى اهتزاز جسم السيارة مثل اهتزاز السفينة على جانبيها فى البحر بس مقابل ذلك حتضحي بالثبات العالى اثناء القيادة الرياضية و خصوصا على السرعات العالية.
- الكشف على الجنوط و مقاسات الكاوتش بالعربية ،الجنط العريض بيكون اثقل فى الوزن من الجنط الكنز(سواء حديد او الومنيوم او سبيكة معادن) والكاوتش العريض بيكون اثقل فى الوزن من الكاوتش الرفيع وبيمثلوا حمل على العفشة و يؤدوا لكثرة اجهادها وكثرة صيانتها ولذلك توجد عفشة عادية و اخرى رياضية و اخرى خدمة شاقة.وكل منهم له غرضه
- كذلك الكاوتش منخفض الجوانب low profile tire بيهد حيل العفشة الأصلية للعربية بس بيحقق ثبات عالى في المناورة و السرعات و الفرامل، ولو العفشة ناشفة بعض الشئ فى المطبات فممكن تستبدل الكاوتش بكاوتش ذات جوانب اعلى من اللى راكب فيخلى العربية انعم فى المدقات و المطبات(ده بالإضافة لما ذكرته سابقا)
وطول ما العربية بقت انعم من الأول بعد التعديلات اللى فاتت يبقى العفشة عمرها حيطول معاك و مش حتفك منك بسهولة و مش حتحتاج تربطها ابدا
المفضلات