بفضل الله...انا مش مصدق اني قدرت
السلام عليكم..اخوكم بقاله فترة مشغول بموضوع البايكس خصوصا الريس..
بصراحة..مش فاكر امتى وفين بالضبط لقطت الفيروس ده..
لكن اللي حصل اني بقالي كام اسبوع كده مش ورايا غير القراءة والبحث عن
كل ما يتعلق بالبايكس وانواعه وازاي تبدأ تسوق وكده..
والحقيقة كان قسم الدراجات في المنتدى هو المصدر الاول والمتميز في المعلومات..
ادخل في الموضوع
امبارح كانت اول ركوبة لي لبايك في حياتي ..مش بس اول سواقة لالالالا..اول ركوبة فعلا..عمري ما ركبت "موتوسيكل" اصلا قبل كده
وللاسف بعد لما ركبت اتحسرت على اني ما بداتش الموضوع ده من فترة..
المهم..
مواصفات البايك:
النوع :ريس
ماركة :هوندا
الموديل: Fire blade CBR
السعة ودي المفاجأة..(بالنسبة لي) rr 400
وكانت مفاجأة بالنسبة لي لاني كنت مرعوب من كتر اللي سمعته عن مخاطر البدايات وانك لازم تبدأ ب حجم صغير يعني 250 وكده
المهم..كانت متعة لا توصف..واحساس اختراق جسمك للهواء رائع فعلا
كان معايا صاحب البايك (ايجار)عرفني على الاجزاء الاساسية وخصوصا الدبرياش والفرامل
وقالي توكل على الله..وقد كان -بفضل الله- اني سوقت فورا بدون اي مشكلة وكمان لفيت يمين وشمال:colsmil:..
كل ده وانا حقيقي مش مصدق اني كان ممكن اوزن نفسي اصلا على البايك..حتى صاحب البايك اتفاجئ وسألني انت متاكد انك ما سقتش قبل كده..:E_braces[1]:
المهم..قضيت 3 ساعات من المتعة والاثارة الحقيقية وشديت لغاية 100 وما رضيتش ازود ودخلت في اماكن مزدحمة واشارات لا وكنت واخد صاحب البايك ورايا
والحمد لله
ملاحظات سريعة:
- البايك الريس ده تقيل فعلا..واتاكدت انه رياضة لان رجلي وايدي وجسمي كله كان مشدود ورجعت كأني كنت في سيشن جيم
الفرامل الامامية (اليد) حساسة جدا..والخلفية في السرعات المنخفضة
كتير من اللي بيركبوا الريس ماعندهمش ثقافة السيفتي والقيادة الدفاعية ..صاحب البايك اتفاجئ اما قلتله مش هينفع اطلع الا بالخوذة والجوانتي
اللي بيسوق عربية خصوصا المانيوال..بتسهل عليه قصة تعلم النقلات والدبرياش والكلام ده
قعدة الريس متعبة شوية..مش عارف يمكن علشان لسه جسمي مش متعود عليها؟
استخدام المرايات في رأيي رقم واحد في السلامة اثناء القيادة ..
رغم ارتداء الخوذة..ضوضاء الموتور عالية برضه..ومتعبة كل ما زاد وقت الركوب..EAR PLUGS فعلا ضرورية
بس..
حبيت انقلكم احساسي واشارك معاكم وبالمناسبة لازم اشكر كل الاخوة اللي انا استفدت من ملاحظاتهم ومداخلاتهم في مواضيع المنتدى المختلفة ونصايحهم اللي كانت في دماغي طول ما انا سايق وخصوصا.. الاخ otefa
وان شاء الله الشراء قريب:F_eyeb1[1]: