الموضوع: مش هسوق بسرعة تاني مين معايا

بصو يا جماعة انا بقالي داخل على ال4 سنوات بسوق و كنت في حالات بسوق بسرعة و بتجنن و ساعات بسوق بالراحة و فجأة تطلع في دماغي اجري بالعربية الخ...

المهم انا لقيت اني لما بسوق بسرعة بوصل بردو في نفس الوقت اللي لو سقت فيه بالراحة لأن في الاخر الاشارات بتوقفنا كوبري اكتوبر لما يقفل ابقى نط على الطريق التاني علشان تمشي الدائري شرحو و هكذا و في نفس الوقت بوصل اي مكان متوتر نظرا لأني لازم مع الجري اكون مستعد في اي لحظة علشان اضرب فرامل او افادي حاجة و كدة و لما بسوق بالراحة بلاقي الدنيا جميلة و لو حد رمى عليا بخنوقوا بالراحة بردو و بعمل اللي انا عاوزو معاه بدون ماعرض نفسي للخطر او اعرضوا للخطر

كمان بتبقى معايا عيلتي او اصحابي فبتخيل لو عملت حاجثة و حد منهم جرالوا حاجة هل ممكن اسامح نفسي طول حياتي اني كنت السبب في حاجة كدة؟!

هل لو وانا ماشي بسرعة الكاوتش فرقع هعرف اتصرف زي ما لو كنت ماشي عادي؟!

هل لما اجيب 160 و 170 او اقفل العداد هاخود نيشان مثلا؟!

هل لما طول مانا ماشي بشد مع خلق الله و يجي واحد دمو خفيف يزنقني في عربية راكنة اضيع وش عربيتي و ظهر عربية الراجل الي راكن في امان الله ده ان طلعت منها سليم؟!!

هل لما اكسر العربية ده مش هيبقى حرام!!!

بالاضافة الى ان في عضو فاضل هنا حط فيديو من بعد ما شفتو قررت القرار ده و الفيديو اهه

[youtube]http://www.youtube.com/watch?v=yt823zEGyMY&feature=player_embedded[/youtube]

و الموضوع اهه http://www.nilemotors.net/Nile/149529-a.html

فليه يا جماعة منعملش حملة في اننا كلنا مش هنسوق بسرعة ونحاول نحافظ على الناس و على نفسنا و على عربياتنا

اللي هيحصل ايه؟!
1- عربيتك ان شاء الله ميجرلهاش حاجة بسببك
2- استهلاك البنزين هيقل
3- مش هتعرض نفسك ولا اسرتك ولا غيرك للخطر
4- مش هنتلقط رادار
5- كل بني ادم هيعمل كدة هتاخد ثوابو
6- مش هتشد اعصابك

و حاجات تانية كثير

مين هيجي معايا و مين يقلي ازاي اني مرجعش للجري و الكلام الفاضي ده؟!