الموضوع: الدكتورة او الصيدلانية ممكن تقعد فى بيتها ساعة الجواز ؟؟؟

المشاركة الأصلية كتبت بواسطة أحمد كمال

طيب و لو الزوج ربنا كارمه و هو مش متاخر في حاجة و مكفيها هي و عيالها و بيتها و مع ذلك تلاقي الزوجة مصممة تشتغل و تضيع وقتها و صحتها و مجهودها للغريب بملاليم



لا مش نباطشي

بس حضرتك شغل البيت ما بيخلصش

و مفيش واحدة بتشتغل - و اتحدى - الا و بيتها مش كامل 100%

شغل البيت و تربية العيال - في رأيي - مهمة أدق و اصعب و اعظم و اكثر تعبا من الشغل برة البيت

من طبخ لغسيل لتنضيف لتوضيب لتربية العيال لاكلهم و شربهم و مذاكرتهم ..... بالاضافة لحقوق زوجها عليها من انها تبقى بشوشة و لابسة كويس و و و و

نجاح الزوجة في بيتها هو اللي بيخلي الزوج مرتاح البال و الجسد و النفس فيبذل اقصى طاقته في العمل و ده بيعود عليها و على اولادها

و كمان نجاحها في تربية و تعليم اولادها بينعكس على مستقبلهم و تكوين شخصيتهم ..... تدين و علم و نجاح دراسي و تكوين الشخصية السوية ......

لما تبقى واحدة بتشتغل من 9 الى 5 و بترجع البيت 6 .....

مبدئيا العيال هيقعدوا فين بعد رجوعهم من المدرسة؟ لوحدهم؟ ده أس البلاء و الفساد أصلا !!!!!

ثانيا لو هنقول انها بتنام الساعة 12

في 6 ساعات هتغير هدومها و هتطبخ و تغسل و تنشر و توضب و تأكل العيال و تغير لهم و تحط الاكل لجوزها و تذاكر للعيال و تشوف المسلسل و تقعد مع جوزها شوية ؟؟؟؟؟؟؟؟

و هل هيبقى عندها طاقة انها تستحمل جوزها اللي جاي قرفان من شغله و مش طايق نفسه و محتاج واحدة تحتويه نفسيا و تروقه؟ و لا هتبقى مش طايقة نفسها و واقفاله عالكلمة؟



اليوم 24 ساعة مش 48 و صاحب بالين كداب ...... و كفاية رفص للنعمة و دي رسالة لكل زوجة مش محتاجة الشغل ماديا و مع ذلك مصممة تضيع تعبها و مجهودها للغريب بملاليم بدل جوزها و عيالها .......

برضه حضرتك مصمم تعمم رأيك الشخصي و بتتكلم على انه واقع لا يقبل النقاش. رأيك يحترم طبعا لكن مش معنى كدة انه يناسب غيرك.

أولا مش صحيح ان كل الستات اللي بيشتغلوا بيتهم مش 100% زي بالظبط ما هو مش صحيح انه كل الستات اللي قاعدين في البيت بيتهم مافيهوش الهوا. و بعدين تاني حقول لك ان ده يرجع لها هي و جوزها, لو هو مش متضايق انت متضايق له ليه؟؟؟

و بعدين موضوع تربية الأولاد ده غريب جدا بصراحة, مين اللي قال لك ان الست اللي بتشتغل بتسيب ولادها مش متربيين.؟؟ حضرتك زعلان انها ممكن ترجع الساعة 6 و يرجعوا هما الساعة 4 و ده معناه انهم باظوا؟؟؟ ده معنى كدة انها لو قاعدة في البيت بس بتنام ساعتين الضهر الدنيا حتخرب بقى؟؟؟ و بعدين السن اللي حضرتك بتتكلم فيه ده انت عارف كويس ان المصايب اللي ممكن يعملوها لغاية ميعاد رجوعهم من المدرسة متتعدش يعني مش موضوع ساعة و لا اتنين, مع العلم اني مقولتش يقعدوا في البيت لوحدهم و لا النقاش في الأولاد حيكونوا فين ده مجاله, لأن انا بقول كل واحد و ظروفه. مش عارفة نظرية ان الأم اللي بتشتغل متعرفش حاجة عن ولادها و سايباهم من غير تربية دي جت منين. في الحياة العملية حضرتك قابلت كام انسان فاسد و شايف ان ده بسبب شغل الأم؟؟؟ حتى في الأطفال اللي في عيلة حضرتك و أولاد أصحابك مثلا, فعلا شايف ان النماذج السيئة هما اللي أمهم بتشتغل و الأولاد الكويسين هما اللي أمهم قاعدة في البيت؟؟؟ أصل التربية دي موضوع كبير قوي داخل فيه القواعد و الأخلاقيات اللي بتتحط للأولاد في التعامل, القدوة الجيدة منذ الصغر, الأهتمام بشكل خاص بالدين و تعاليمه....الخ, مش موضوع قاعدة في البيت و لا بتشتغل.

الحاجة اللي بجد بقى اثارت دهشتي هما الجملتين دول
" نجاح الزوجة في بيتها هو اللي بيخلي الزوج مرتاح البال و الجسد و النفس فيبذل اقصى طاقته في العمل و ده بيعود عليها و على اولادها"
"هل هيبقى عندها طاقة انها تستحمل جوزها اللي جاي قرفان من شغله و مش طايق نفسه و محتاج واحدة تحتويه نفسيا و تروقه؟ و لا هتبقى مش طايقة نفسها و واقفاله عالكلمة؟"

هو ايه علاقة تعامل الزوجة مع زوجها و احتوائه و أهتمامها براحته النفسية بأنها تكون بتشتغل أو لأ؟؟ هو حد قال لحضرتك ان الست اللي بتشتغل بتقابل جوزها بتكشيرة و خناقة كل يوم؟؟؟؟ طيب و الست اللي قاعدة في البيت أكيد مهنية جوزها و مش مخلياه نفسه في حاجة؟؟؟ بتستحمل جوزها اللي جاي قرفان من شغله و مش طايق نفسه و لا بتسمعه الأسطوانة بتاعت هو انت بس اللي بتتعب ما أنا قرفانه طول النهار من شغل البيت و من عيالك اللي طلعوا عيني؟؟؟
أنا من واقع التجارب اللي حوالية شايفة أزواج سعداء جدا و الست بتشتغل, و شايفة ستات مطلعين عين أزواجهم رغم أنهم قاعدين في البيت. راحة الزوج النفسية و سعادته مع مراته ترحع لمدى تفاهمهم و حرصهم على اسعاد بعض مالهاش أدنى علاقة بموضوع الشغل ده.

تاني بقول أنا شايفة ان من حق أي واحد يبقى مش عايز مراته تشتغل, انما الغريب انه يبقى شايف انه مش المفروض مرات أي واحد في الدنيا تكون بتشتغل و مصر انه ده الرأي الوحيد الصح!!!!!!!!!!!!!!!!!

انا ضد عمل المرأة المتزوجة بشكل قاطع ..... بغض النظر عن المهنة

الست شغلتها انها تظبط عيشة جوزها ..... نفسيا و معنويا و في البيت .... و تربي اولادها صح بحيث انهم يطلعوا ذرية صالحة ..... و الراجل مهمته السعي للرزق ..... ال overlap بين الاتنين هو سبب كل المشاكل الزوجية دلوقتي .....

باااااشاااااااااااااا
انا معاك وهجيب الحباره وابصملك بالعشره عالشاشه وعالكيبورد كمان
هو ده الكلام الصح