الاهلى خسر بسبب ضياع كورة محمد فضل
عرض للطباعة
الاهلى خسر بسبب ضياع كورة محمد فضل
حقيقي أنا ماليش في الكورة و لا شوفت مباراة الامس و لكني مستغرب من جمهور الكرة في مصر
أزاي من يومين فقط كان حسام البدري (مدرب النادي الاهلي) مدرب عظيم و صاحب انجاز و النهاردة بعد الخسارة أصبح مدرب سئ و لاعبي الاهلي هم الذين يلعبون من غير الحاجة الي مدرب ؟؟
لازم نعرف ان الرياضة غالب و مغلوب و مش كلها فوز و انتصارات و زي مابنفرح لما فرقتنا بتفوز لازم برضه نفرح للفريق المنافس لما يفوز و نهنيه لأن هيا دي الرياضة أخلاق قبل أي شئ
و تقبلوا تحياتي
م/ سمير الشهاوي
انا عندي تعليق بسيط ان الفكرة مش فكرة لعيبة و بس
لو هنقارن لعيبة برشلونة بلعيبة الانتر هنلاقي تفوق برشلونة مع ذلك تغلبوا عليهم بحسن توظيف المدرب للعيبته يعني برده المدرب ليه دور قوي جدا و مورينيو اثبت كدا .
الف مبروك للحرس ولطارق العشرى على المجهود الذى بذل من جانب اللاعبين فى ايقاف مفاتيح الاهلى وحظ اوفر للاهلى فى كل ما هو قادم وبجد استمتعت بالماتش ولولا تخلى التوفيق عن لاعبلى الاهلى كان الوضع بقى غير الوضع
وشكرا للاعبى الاهلى لانهم فعلا عملوا اللى عليهم ومعهلشى سوء الحظ وده شئ وارد فى الكورة وفى الاخر لازم يكسب وحد يخسر
والف مبروك للحرس مرة تانيه
يا ابنى أبعد عن سكتى يا أبنى
بص يا حاج طارق أنت عاوز أيه من مدرب ينفع بصمة ليه ؟؟؟؟؟؟
الراجل أخد الدورى و نافس على الكأس و وصل للنهائى و ماشى فى دورى الأبطال حتى الأن.....كل ده و هو مطلع حوالى 5 أو 6 لاعبين من الأشبال و الموسم ملئ بالأصابات للنجوم الأساسية.
على فكرة أنا مش مقتنع بيه 100% ولا حتى 70% و عارف أن ممكن يبقى فى أحسن من كده.......بس على رأي المثل so far so good :)
موضوع أحمد بلال ده حظه كده......هو كده كده ماشى.....البدرى كان منزله أخر دقيقتين لسبب من الأتنين.....تكريم له أو عشان يلعب ضربات جزاء.....و الراجل وقف على الخط فى أنتظار التغيير لمدة دقيقة تقريباً و بعد كده الحكم صفر قبل ما الوقت الأضافى يخلص ب 40 ثانية و هو لسه واقف على الخط.........حظه كده.....مش أغتيال معنوى ولا حاجة....هيغتاله معنوياً ليه يعنى....ما هو البدرى مستغنى عنه بمزاجة.....مش بلال اللى ماشى عافية.
و بعدين لعيبة الأهلى كويسين أيوة.....بس من غير مدرب ممكن ياخدوا بطولة واحدة مثلاً......بس مش تبقى بطولة و يطلع من التانية فى النهائى و لسه بينافس على التالتة و برضه من غير مدرب...........لو كده بقى يبقى إدارة الأهلى تمشيه و يلعبوا من غير مدرب.....و لا هى فلوس وخلاص ؟؟؟؟
الفارق الوحيد بين البدري وطارق العشري ..
إن طارق العشري حتى النهاية بيدرب فرقة وخايف عليها ومفكرش في نفسه ..
استخدم دايماً الأنسب بغض النظر عن السن والخبرة وخلافه .. حتى حط واحد ناشئ للضربة الحاسمة والأخيرة ..
لكن البدري لما لقى المباراة بتخرج من إيده ..
رمى الحمل على الكبار وبس علشان ينفد بجلده من أي انتقاد
ساب أبو تريكة وهو منهك القوى تماما
ومعوض اللي مكانش في المود أصلاً
ونزل كل اللي الناس عايزنهم
أحمد حسن .. أحمد شكري
أحمد حسن كان موفقاً
لكن شكري ومعوض غلوشوا على بعض جامد
وآخر الافتكاسات كانت نية تغيير أحمد بلال
علشان لو بلال ضيع يبقى بالسلامة بره النادي
ويتحمل المسئولية
ولو جاب جون يبقى تغيير سليم مية مية ..
وهذا الفارق هو الذي جعل العشري يتفوق ..
التفكير في الفرقة حتى النهاية
لا محاولة تسديد الخانات حتى أخرج من لوم الإدارة والجماهير ..
ودي وجهة نظر شخصية بحتة
وكل موسم وانتم طيبين